ដោយ គង់ សូរិយា
ភ្នំពេញ៖ ផលទុនជាតិសរុប (GDP) របស់កម្ពុជានៅក្នុងឆ្នាំ២០១៩នេះ នឹងកើនឡើងដល់ជាង២៧ពាន់លានដុល្លារអាមេរិក ខណៈចំណូលសម្រាប់មនុស្សម្នាក់ៗរំពឹងថា នឹងកើនឡើងដល់១,៧០៦ដុល្លារ ធៀបនឹងឆ្នាំ២០១៨ មានចំនួន១,៥៦៣ដុល្លារ។នេះបើតាមការឲ្យដឹងពីមន្រ្តីជាន់ខ្ពស់រដ្ឋាភិបាល។
លោក ឱក ប៊ុង រដ្ឋលេខាធិការក្រសួងពាណិជ្ជកម្ម បានលើកឡើងក្នុងពិធីបើកវគ្គបណ្តុះបណ្តាលស្តីពី មជ្ឈត្តការពាណិជ្ជកម្មនៅកម្ពុជានៅព្រឹកថ្ងៃទី១៣ កុម្ភះថា កំនើនដែលត្រូវបានរំពឹងទុកនេះ ផ្តោតសំខាន់លើវិស័យសំខាន់ៗចំនួន៣ ដូចជាទី១ កំណើននៃវិស័យឧស្សាហកម្ម ទី២ វិស័យសេវាកម្ម និងទី៣ វិស័យកសិកម្ម។
លោកបន្តថា ទន្ទឹមនឹងមានការរីកចម្រើននៃសេដ្ឋកិច្ចជាតិ វិវាទពាណិជ្ជកម្មក៏បានកើនឡើងដែរ។ ដូច្នេះការរៀបចំឲ្យមានវគ្គបណ្តុះបណ្តាលខាងលើ ពិតជាមានសារៈសំខាន់ណាស់ក្នុងការប្រើប្រាស់យន្តការមជ្ឈត្តការពាណិជ្ជកម្ម ដើម្បីដោះស្រាយវិវាទពាណិជ្ជកម្មបានកំពុងកើនឡើង។
ផលទុនជាតិសរុបក្នុងស្រុកសំដៅដល់ ផលចំណូលរបស់ប្រជាជនដែលរកបានប្រចាំឆ្នាំនៅទូទាំងប្រទេស បូកនឹងប្រាក់ចំណូលរបស់រដ្ឋាភិបាល ដែលយកពន្ឋបានពីវិស័យផ្សេងៗនៅកម្ពុជា។
អ្នកវិភាគសេដ្ឋកិច្ចកម្ពុជា លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា សេដ្ឋកិច្ចកម្ពុជា និងប្រាក់ចំណូលរបស់ប្រជាពលរដ្ឋបាននិងកំពុងកើនឡើង ហើយការព្យាករណ៍របស់សេដ្ឋវិទូនៅក្រសួងសេដ្ឋកិច្ចនិងហិរញ្ញវត្ថុលោកយល់ស្រប ដោយសារពួកគេមានសមត្ថភាព ហើយការវិភាគរបស់ពួកគេប្រកបដោយលក្ខណៈវិទ្យាសាស្រ្ត។
ផលទុនជាតិសរុបកាលពីឆ្នាំ២០១៨ កន្លងមកនេះ មានប្រមាណ ២៣ពាន់លានដុល្លារអាមេរិក៕
