(រាជធានីភ្នំពេញ)៖ នាព្រឹកថ្ងៃចន្ទ ទី២០ ខែវិច្ឆិកា ឆ្នាំ២០២៣ លោកជំទាវ ជា រដ្ឋា រដ្ឋលេខាធិការក្រសួង ពាណិជ្ជកម្មតំណាងដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានទទួលជួបពិភាក្សាការងារជាមួយ Mr. Deng Yongzhi អគ្គនាយកនៃក្រុមហ៊ុន Gaungdong SageRAN Network Technology Co., Ltd. ដែលមានការចូលរួមពី ឯកឧត្តម អនុរដ្ឋលេខាធិការនាយកដ្ឋានពាក់ព័ន្ធ និងមន្រ្តីជំនាញនៃក្រសួងពាណិជ្ជកម្ម ។ 
គោលបំណងនៃជំនួបពិភាក្សាការងារនេះ ដើម្បីស្វែងយល់ពីលក្ខណៈច្បាប់ពាណិជ្ជកម្មកម្ពុជា សិក្សាពីទីផ្សារកម្ពុជា និងស្វែងរកដៃគូពាណិជ្ជកម្ម សម្រាប់សហការវិនិយោគទាក់ទង នឹងការពង្រីកវិសាលភាព នៃប្រព័ន្ធអ៊ីនធឺណេត5G នៅប្រទេសកម្ពុជា ។
នាព្រឹកថ្ងៃទី២១ ខែវិច្ឆិកា ឆ្នាំ២០២៣ នៅទីស្ដីការក្រុមប្រឹក្សាអភិវឌ្ឍន៍កម្ពុជា ឯកឧត្តម ជា វុទ្ធី អគ្គលេខាធិការគណៈកម្មការវិនិយោគកម្ពុជា បានអនុញ្ញាតឱ្យលោក Deng Yongzhi នាយកក្រុមហ៊ុន SageRan និងសហការីចូលជួបសម្តែងការគួរសម និងពិភាក្សាការងារ ដោយមានការអញ្ជើញចូលរួមពី តំណាងក្រសួងពាណិជ្ជកម្ម, តំណាងក្រសួងប្រៃសណីយ៍ និងទូរគមនាគមន៍ និងសភាពាណិជ្ជកម្មកម្ពុជា។ 
ជាកិច្ចចាប់ផ្តើម ឯកឧត្តមអគ្គលេខាធិការបានសម្តែងនូវការស្វាគមន៍ និងថ្លែងអំណរគុណចំពោះ ក្រុមហ៊ុនដែលបានអញ្ជើញមកកម្ពុជា ដើម្បីសិក្សាស្វែងយល់ពីកាលានុវត្តភាពវិនិយោគនៅកម្ពុជា។ លោក Deng Yongzhi បានជម្រាបជូនអង្គប្រជុំថាក្រុមហ៊ុន SageRan ជាក្រុមហ៊ុនផ្តល់សេវាទូរស័ព្ទ និងសេវា internet កម្រិត 4G & 5G ដែលមានទីស្នាក់កណ្តាលនៅខេត្ត Guangzhou និងមានសាខានៅរដ្ឋធានី ប៉េកាំង, ទីក្រុង Wuhan, ទីក្រុង Changsha, និងនៅទីក្រុង Zhuhai នៃសាធារណរដ្ឋប្រជាមានិតចិន។ គោលបំណងនៃការអញ្ជើញមកទស្សនកិច្ចនៅកម្ពុជានៅពេលនេះគឺដើម្បីស្វែងរកដៃគូវិនិយោគក្នុងស្រុក។ ជាការឆ្លើយតប ឯកឧត្តមអគ្គលេខាធិការបានជម្រាបជូនថា យោងតាមច្បាប់ស្តីពីវិនិយោគនៃព្រះរាជា ណាចក្រកម្ពុជា ការវិនិយោគក្នុងឧស្សាហកម្មដែលប្រើបច្ចេកវិទ្យាខ្ពស់គឺជាវិស័យអាទិភាពទី១ ដែលទទួល បានការលើកទឹកចិត្តអតិបរមា។ ជាមួយគ្នានេះដែរ ឯកឧត្តមអគ្គលេខាធិការបានស្នើឱ្យក្រុមហ៊ុនធ្វើការ សិក្សាលម្អិតជាមួយនិយ័តករទូរគមនាគមន៍កម្ពុជានៃក្រសួងប្រៃសណីយ៍ និងទូរគមនាគមន៍ និងជួបពិភាក្សា ជាមួយសភាពាណិជ្ជកម្មកម្ពុជា ដើម្បីសិក្សានិងស្វែងរកដៃគូវិនិយោគរួមគ្នា។ គណៈកម្មាធិការវិនិយោគកម្ពុជា/ ក្រុមប្រឹក្សាអភិវឌ្ឍន៍កម្ពុជា គាំទ្រគម្រោងវិនិយោគរបស់ក្រុមហ៊ុន និងរង់ចាំផ្តល់កិច្ចសម្រួលក្នុងការដាក់ ពាក្យស្នើសុំវិនិយោគ។
