ដោយនៅ វឌ្ឍនា
ភ្នំពេញ៖ ដោយមើលឃើញប្រទេសកម្ពុជាមានការរីកចម្រើនខ្លាំង សហព័ន្ឋសម្ភារៈសំណង់នៃប្រទេសចិន គ្រោងចូលមកវិនិយោគនៅប្រទេសកម្ពុជានាពេលខាងមុខនេះ។
រដ្ឋលេខាធិការក្រសួងរ៉ែ និងថាមពល លោកទី នរិន្ទ និងសុខ ខាវ៉ាន់ រដ្ឋលេខាធិការ អមដោយមន្រ្តីជំនាញ បានទទួលជួបពិភាក្សាការងារ ជាមួយតំណាងសហព័ន្ធសម្ភារៈសំណង់ចិនកាលពីដើមសប្តាហ៍នេះ។
ថ្លែងក្នុងជំនួបពិភាក្សាការងារនេះ តំណាងសហព័ន្ធសម្ភារៈសំណង់ចិន មានការចាប់អារម្មណ៍ខ្លាំង ទៅលើសក្តានុពលនៃការអភិវឌ្ឍ និងការវិនិយោគលើវិស័យរ៉ែ ជាពិសេសរ៉ែអលោហៈនៅកម្ពុជា។
លោកទី នរិន្ទ បានសម្តែងនូវការសា្វគមន៍ និងលើកទឹកចិត្តដល់សហព័ន្ធ ក៏ដូចជាក្រុមហ៊ុនដែលជាសមាជិកដែលមានចំណាប់អារម្មណ៍ សូមមកធ្វើការសិក្សាបន្ថែម ដើម្បីឈានដល់ការវិនិយោគក្នុងគោលបំណងជំរុញ និងលើកកម្ពស់ផលិតកម្មនិងអាជីវកម្មក្នុងស្រុកឱ្យកាន់តែប្រសើរឡើង៕
