ដោយ គង់ សូរិយា
ភ្នំពេញ៖ រដ្ឋាភិបាលតាមរយៈក្រសួងសាធារណៈការ និងដឹកជញ្ជូន និងធនាគារអភិវឌ្ឍន៍អាស៊ីបាននិងកំពុងរៀបចំកិច្ចប្រជុំរួមគ្នា សម្រាប់កិច្ចប្រជុំលើកទី៧ នៃគណៈកម្មាធិការរួមការងារដឹកជញ្ជូនឆ្លងកាត់ព្រំដែន។
លោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន និង លោក Hideaki Iwasaki នាយកធនាគារអភិវឌ្ឍន៍អាស៊ី (ADB) ប្រចាំប្រទេសថៃជាសហប្រធានបានអញ្ជើញជាអធិបតីក្នុងពិធីបើក និងដឹកនាំកិច្ចប្រជុំថ្នាក់មន្ត្រីជាន់ខ្ពស់ពិភាក្សាលើការពង្រីកវិសាលភាពក្នុងការដាក់បន្ថែមខ្សែផ្លូវ និងច្រកព្រំដែនមួយចំនួនទៀត និងកិច្ចប្រជុំត្រៀមសម្រាប់កិច្ចប្រជុំលើកទី៧ នៃគណៈកម្មាធិការរួមការងារដឹកជញ្ជូនឆ្លងកាត់ព្រំដែន ក្របខ័ណ្ឌមហាអនុតំបន់មេគង្គ ដែលនឹងប្រព្រឹត្តទៅនៅថ្ងៃទី១៣ខែមីនា ឆ្នាំ២០១៩។
-->
កិច្ចប្រជុំនេះ មានការចូលរួមពីគណៈប្រតិភូមកពីប្រទេស ក្នុងតំបន់មហាអនុតំបន់មេគង្គ រួមមាន៖ ប្រទេសកម្ពុជា ចិន ថៃ វៀតណាម ឡាវ និងប្រទេសមីយ៉ាន់ម៉ា រួមទាំងក្រុមការងារ ADB អង្គការ DFAT និងអង្គការ GIZ ផងដែរ។
កិច្ចប្រជុំលើកទី៧នៃគណៈកម្មធិការរួមការងារ ដឹកជញ្ជូនឆ្លងកាត់ព្រំដែន ក្របខ័ណ្ឌមហាអនុតំបន់ទន្លេមេគង្គ មានរយៈពេល ២ថ្ងៃ ចាប់ពីថ្ងៃទី១២ ដល់ថ្ងៃទី១៣ ខែមីនា ឆ្នាំ២០១៩។ កិច្ចប្រជុំថ្ងៃទី១២ ខែមីនា ឆ្នាំ២០១៩ គឺជាកិច្ចប្រជុំពិភាក្សាលើបច្ចេកទេស និងកិច្ចប្រជុំត្រៀម។ ចំណែកឯថ្ងៃទី១៣ ខែមីនា ឆ្នាំ២០១៩ គឺជាកិច្ចប្រជុំលើកទី៧ នៃគណៈកម្មាធិការរួមការងារដឹកជញ្ជូនឆ្លងកាត់ព្រំដែន ក្របខ័ណ្ឌមហាអនុតំបន់ទន្លេមេគង្គ ក្រោមអធិបតីភាពឯកឧត្ដមទេសរដ្ឋមន្រ្តី ស៊ុន ចាន់ថុល និងលោក Hideaki Iwasaki នាយកធនាគារអភិវឌ្ឍន៍អាស៊ី (ADB) ប្រចាំប្រទេសថៃ៕
