ដោយៈ ហ្វីអូណា
ភ្នំពេញៈ ក្រសួងអប់រំ យុវជន និងកីឡា ប្រកាសទទួលស្គាល់សាលាចំនួន១២០ជាសាលារៀនគំរូ និងបានផ្តល់ពានរង្វាន់ក្នុងពេលសន្និបាតអប់រំផងដែរ។
កាលពីពេលថ្មីៗនេះ ក្រសួងក៏ទើបតែស្នើសុំបង្វែរថវិកាឥណទាន ដែលជាថវិកាគាំទ្រសកម្មភាពនានា ទៅចូលរួមគាំទ្រកម្មវិធីស្តង់ដាសាលាគំរូ ឆ្នាំ២០២៤ ស្របតាមអនុសាសន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានប្រកាសដាក់ឲ្យអនុវត្តជាផ្លូវការក្នុងទិវាគ្រូបង្រៀន កាលពីថ្ងៃទី០៥ ខែតុលា ឆ្នាំ២០២៣។
ការថ្លែងនេះរបស់លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី១០ ខែមិថុនា ឆ្នាំ២០២៤ ក្នុងឱកាសអញ្ជើញចុះទៅពិនិត្យ ការអនុវត្តស្តង់ដាសាលាគំរូនៅវិទ្យាល័យ ជា ស៊ីម តាកែវ។
ឧបនាយករដ្ឋមន្ត្រី ហង់ជួន ណារ៉ុន បញ្ជាក់ថា ការចុះទស្សនកិច្ចពិនិត្យការអនុវត្តស្តង់ដា សាលាគំរូនៅវិទ្យាល័យ ជា ស៊ីម តាកែវ នាពេលនេះ ដើម្បីជួយសាលារៀនឲ្យក្លាយជាសាលារៀនគំរូ។
ក្នុងឱកាសនេះដែរ លោកឧបនាយករដ្ឋមន្ត្រីបានផ្តល់អនុសាសន៍ដល់មន្ត្រីក្រោមឱវាទមួយចំនួនរួមមាន សាលារៀនទាំងអស់ជាពិសេសវិទ្យាល័យធនធាន ត្រូវរៀបចំផែនការតម្រូវការគ្រូបង្រៀនរយៈពេល៥ទៅ១០ឆ្នាំ ដើម្បីដោះស្រាយបញ្ហាខ្វះគ្រូបង្រៀននាពេលអនាគត រៀបចំផែនការតម្រូវការគ្រូបង្រៀន និងតម្រូវការសិស្ស ផែនការអភិវឌ្ឍធនធានមនុស្សជាដើម និងត្រូវដោះស្រាយបញ្ហាគន្លឹះគឺការផ្តល់គ្រូទៅតាមមុខវិជ្ជា តាមភូមិសិក្សា តាមគុណវុឌ្ឍិគ្រូ។
ឧបនាយករដ្ឋមន្ត្រីបានបញ្ជាក់បន្ថែមថា “បច្ចុប្បន្ននេះសាលារៀន ត្រូវខិតខំដោះស្រាយបញ្ហាកង្វះគ្រូ ជាពិសេសគ្រូបង្រៀនថ្នាក់ពីរភាសាខ្មែរ-បារាំង”។
សាលារៀនត្រូវពិនិត្យលទ្ធភាពបង្កើនម៉ោងសិក្សា ដោយបង្រៀនបន្ថែមដល់សិស្សរៀនយឺត និងអាចបង្រៀនសិស្សទាំងអស់តាមរយៈការអនុវត្តកម្មវិធីក្រៅម៉ោងសិក្សា ការបង្កើតក្លិបសិក្សាមគ្គុទ្ទេសក៍អាជីព និងការផ្ដល់ប្រឹក្សាដោយមានការគាំទ្រពីមាតាបិតា សហគមន៍ និងអាជ្ញាធរ ដែនដី។ សម្រាប់ការបំប៉នសិស្សបន្ថែមសាលារៀនត្រូវរៀបចំផែនការច្បាស់លាស់ និងត្រូវការពេលវេលាដើម្បីអនុវត្ត ពោលការអនុវត្ត ត្រូវចាប់ផ្តើមពីកម្រិតថ្នាក់ទី៧ និងថ្នាក់បន្តបន្ទាប់ ដើម្បីជាមូលដ្ឋានគ្រឹះ បង្កើនលទ្ធផលនៃការប្រឡង សញ្ញាបត្រមធ្យមសិក្សាទុតិយភូមិ និងដើម្បីទទួលបាននិទ្ទេស A កាន់តែច្រើន។
ក្រុមការងារក្រសួងត្រូវរៀបចំឯកសារបន្ថែម ដូចជា មេរៀនសង្ខេបសម្រាប់សិស្សថ្នាក់ទី១២ ឯកសារណែនាំរបៀបធ្វើពិសោធន៍ជាដើម ហើយត្រូវផ្ដល់ឱ្យសាលារៀនទាំងឯកសារផ្ទាល់ និងឯកសារអេឡិចត្រូនិក ដើម្បីឱ្យគ្រូបង្រៀន និងសិស្សយកទៅសិក្សារៀនសូត្របន្ថែមងាយស្រួលក្នុងការធ្វើស្វ័យសិក្សា និងស្នើឱ្យមានយន្តការវាយតម្លៃការរៀន ការបង្រៀន និងវាយតម្លៃការងារសាលារៀនទាំងមូល។
សាលារៀនត្រូវរៀបចំ ដំណើរទស្សនកិច្ចសិក្សា របស់គណៈគ្រប់គ្រងសាលា លោកគ្រូ អ្នកគ្រូ គណៈកម្មការគ្រប់គ្រងសាលារៀននៅតាមវិទ្យាល័យនានាក្នុងខេត្ត និងក្នុងរាជធានីខេត្តដទៃទៀត ដើម្បីសិក្សារៀនសូត្រ និងយកមកកែលម្អសាលារៀនខ្លួន។ ប្រសិនបើសាលារៀនក្លាយជាសាលារៀនគំរូ នាយកសាលានឹងអាចក្លាយជានាយកល្អ គ្រូបង្រៀនដែលជួយឱ្យសាលារៀន ក្លាយជាសាលារៀនគំរូ នឹងត្រូវទទួលបានការវាយតម្លៃ ក្លាយជាគ្រូបង្រៀនល្អ ហើយក្រសួងនឹងពិនិត្យលទ្ធភាពលើកទឹកចិត្ត តាមរយៈការអនុវត្តគន្លងអាជីពគ្រូបង្រៀន។
ក្រសួងនឹងរៀបចំយន្តការ ចុះជួយសាលារៀនក្នុងការអនុវត្តស្តង់ដាសាលារៀនគំរូ ដោយផ្តោតលើស្តង់ដា និងសូចនាករដែលសាលារៀនមិនទាន់អាចអនុវត្តបាន និងជួបការលំបាកក្នុងការសម្រេចលទ្ធផល។ សាលាវិទ្យាល័យធនធាន និងសាលារៀនដទៃទៀត ដែលមានបន្ទប់កុំព្យូទ័រ ត្រូវលើកទឹកចិត្តឱ្យសិស្សរៀនកំព្យូទ័រ ឱ្យបានទៀងទាត់ដោយគ្រប់គ្រងវត្តមានឱ្យបានហ្មត់ចត់។ ចំពោះបញ្ហានានានៅក្នុងសាលារៀន ត្រូវរកដំណោះស្រាយដោយរៀបចំបញ្ហា ទៅតាមអាទិភាព និងលើកទឹកចិត្តឱ្យមានការចូលរួម ពីលោកគ្រូ អ្នកគ្រូ និងជាពិសេសក្រុមប្រឹក្សា កុមារលើការងារបរិស្ថាន ពង្រឹងវិន័យ សីលធម៌ ចរិយាធម៌ ឥរិយាបថ បំណិនជីវិត ការចេះរៀបចំចាត់ចែងការ ងារដោយផ្តល់ពិន្ទុបន្ថែម ដល់សិស្សដែលចូលរួមអនុវត្តន៍ តបតាមអនុសាសន៍របស់សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា៕
