ដោយ ៖ គង់ សូរិយា
ភ្នំពេញ ៖ កិច្ចប្រជុំលើកទី៧ នៃគណៈកម្មាធិការរួមការងារដឹកជញ្ជូនឆ្លងកាត់ព្រំដែនក្របខ័ណ្ឌមហាអនុតំបន់ទន្លេមេគង្គ (7th Joint Committee Meeting GMS – CBTA) បានសម្រេចបើកច្រកទ្វារអន្តរជាតិចំនួនពីរទៀតនៅកម្ពុជា ដើម្បីសម្រួលការដឹកជញ្ជូនក្នុងកម្រិតតំបន់។
អ្នកនាំពាក្យក្រសួងសាធារណៈការ និងដឹកជញ្ជូន លោក វ៉ាស៊ីម សូរិយា បានមានប្រសាសន៍ឲ្យដឹងតាមទូរស័ព្ទនាថ្ងៃទី១៣ មិនានេះថា តាមរយៈកិច្ចប្រជុំរយៈពេលពីរថ្ងៃដែលបានចាប់ផ្តើមពីថ្ងៃទី១២ ដល់ ១៣ មីនានេះ ថ្នាក់ដឹកនាំដែលធ្វើការទទួលខុសត្រូវលើការដឹកជញ្ជូនថ្នាក់តំបន់នេះ បានសម្រេចជ្រើសរើសច្រកទ្វារអន្តរជាតិចំនួនពីរទៀត គឺច្រកព្រែកចាក ហាទៀងប្រទេសវៀតណាម និងច្រកស្ទឹងបត់ ណងអៀន ប្រទេសថៃ។
លោកបន្តថា កន្លងមកសម្រាប់ប្រទេសនៃមហាអនុតំបន់ទន្លេមេគង្គ បានសម្រេចលើច្រកទ្វារចំនួន៤រួចហើយ រួមមានច្រកប៉ោយប៉ែត ស្ថិតក្នុងខេត្តបន្ទាយមានជ័យ ច្រកទ្វារអន្តរជាតិបាវិត ខេត្តស្វាយរៀង ច្រកទ្វារអន្តរជាតិចាំយាម ខេត្តកោះកុង និងច្រកត្រពាំងក្រៀល ខេត្តស្ទឹងត្រែង។
កិច្ចប្រជុំថ្នាក់តំបន់នេះ មានការចូលរួមជាអធិបតីភាពពី លោក ស៊ុន ចាន់ថុល ទេសរដ្ឋមន្រ្តីរដ្ឋមន្ត្រីក្រសួងសាធារណការ និងដឹកជញ្ជូន និងលោក Hideaki lwasaki នាយកធនាគាអភិវឌ្ឍន៍អាស៊ី (ADB) ប្រចាំប្រទេសកម្ពុជា ដោយមានការចូលរួមពីគណៈប្រតិភូមកពីប្រទេសក្នុងតំបន់មហាអនុតំបន់មេគង្គរូមមានប្រទេសចិន ថៃ វៀតណាម ឡាវ និងប្រទេសមីយ៉ាន់ម៉ា រួមទាំងក្រុមការងារ ADB អង្គការ DFAT និងអង្គការ GIZ នៅសណ្ឋាគារសុខាអង្គរ ខេត្តសៀមរាប៕
