ដោយ: គង់ លាងហួរ
អន្តរជាតិ: រដ្ឋាភិបាលឥណ្ឌូនេសុីបានប្រកាសដាក់ចេញផែនការគោលនយោបាយថ្មីមួយ ដើម្បីរៃអង្គាសថវិកាពីប្រាក់ខែរបស់កម្មករ-និយោជិតដើម្បីគាំទ្រគម្រោងលំនៅដ្ឋានជាតិ។
នៅក្រោមគោលនយោបាយថ្មី កម្មករ-និយោជិតទាំងអស់ ដែលមានប្រាក់ឈ្នួលអប្បបរមា ត្រូវតែចូលរួមចំណែកបង់ប្រាក់ចំនួន២,៥ភាគរយនៃប្រាក់ចំណូលប្រចាំខែរបស់ពួកគេចូលទៅមូលនិធិកម្មវិធីលំនៅដ្ឋានជាតិ។
កាលពីមុន រដ្ឋាភិបាលតម្រូវឱ្យតែបុគ្គលិករដ្ឋាភិបាលពេញម៉ោងប៉ុណ្ណោះ ដែលមានកាតព្វកិច្ចចូលរួមចំណែកបង់វិភាគទានទាំងនេះ។ ប៉ុន្តែ សម្រាប់ពេលនេះវិញ រដ្ឋាភិបាល បានអះអាងថា “ការចូលរួមបរិច្ចាគរបស់ប្រជាជន នឹងផ្តល់ផលតបស្នងទៅឱ្យពួកគេវិញច្រើនជាងប្រាក់ដែលពួកគេបានបង់ទៅទៀត”។
-->
រដ្ឋាភិបាលបន្តថា កម្មករ-និយោជិតនឹងអាចទទួលបានមូលនិធិ នៅពេលពួកគេទិញអចលនទ្រព្យ។ ប្រសិនបើពួកគេមិនទិញអចលនទ្រព្យ ឬមានអចលនទ្រព្យរួចហើយ ពួកគេអាចដកប្រាក់ នៅពេលពួកគេមានអាយុ៥៨ឆ្នាំ ឬចូលនិវត្តន៍។
ទោះជាយ៉ាងណាក្តី ប្រជាជនមួយផ្នែកធំនៃប្រទេសឥណ្ឌូនេសុី នឹងមិនស្ថិតនៅក្រោមគោលនយោបាយនេះទេ ពីព្រោះ កម្លាំងពលកម្មចំនួន៤៧,១%នៅឥណ្ឌូនេស៊ី ឬស្មើនឹង២៤,៨លាននាក់ ទទួលបានប្រាក់ចំណូលទាបជាងកម្រិតប្រាក់ឈ្នួលអប្បបរមាទៅទៀត។ នេះបើយោងតាមទិន្នន័យផ្លូវការប្រចាំឆ្នាំ២០២៣។
ជាមួយគ្នានេះ ប្រាក់ឈ្នួលអប្បបរមាជាមធ្យមនៅប្រទេសឥណ្ឌូនេសុីក៏មានការប្រែប្រួលចន្លោះពី២០០ដុល្លារ ទៅ៥០០ដុល្លារក្នុងមួយខែ អាស្រ័យលើបណ្តាខេត្ត ដែលកម្មករ-និយោជិតបំពេញការងារ។
យ៉ាងណាមិញ ការប្រកាសគោលនយោបាយថ្មីនេះបានបង្កឱ្យមានការខឹងសម្បារយ៉ាងខ្លាំងក្នុងចំណោមកម្មករ ជាពិសេសអ្នក ដែលកំពុងជួបការលំបាកក្នុងការប្រឈមមុខនឹងការកើនឡើងនៃថ្លៃចំណាយលើការរស់នៅប្រចាំថ្ងៃ។
ទន្ទឹមនឹងនេះ ក្រុមអ្នកជំនាញបានព្រមានថា “ប្រាក់ដែលរៃអង្គាសបាន អាចត្រូវបានប្រើប្រាស់សម្រាប់អាទិភាពផ្សេងទៀតរបស់រដ្ឋាភិបាល”។ ប៉ុន្តែ អ្នកនាំពាក្យនៃក្រសួងហិរញ្ញវត្ថុឥណ្ឌូនេសុីបានចេញមុខបដិសេធ ដោយអះអាងថា ថវិកាទាំងនេះនឹងត្រូវបានប្រើប្រាស់សម្រាប់តែជំនួយផ្នែកលំនៅដ្ឋានប៉ុណ្ណោះ៕ប្រភព:ABC៕
