ដោយ៖ ដួង ចន្ទ្រា
ភ្នំពេញ៖ ស្របពេលកំនើននៃការធ្វើពាណិជ្ជកម្ម ដោយប្រើប្រាស់បច្ចេកវិទ្យា និងការទូទាត់រូបិយប័ណ្ណតាមប្រព័ន្ឋបច្ចេកវិទ្យា ធនាគារជាតិនៃកម្ពុជាបាននិងកំ ពុងសិក្សាលទ្ធភាព ក្នុងការប្រើប្រាស់រូបិយប័ណ្ណឌីជីថល សម្រាប់ការទូទាត់នៅក្នុងទីផ្សាររូបិយប័ណ្ណ អន្តរជាតិធនាគារផងដែរ។
លោកជំទាវនាវ ច័ន្ទថាណាទេសាភិបាលរងធនាគារជាតិនៃកម្ពុជាលោក បានថ្លែងក្នុងពិធីបើកសន្និសីទម៉ាក្រូសេដ្ឋកិច្ចលើកទី៤ ស្តីពីតួនាទីរបស់បច្ចេកវិទ្យាក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា នាព្រឹកថ្ងៃទី៥ ខែធ្នូនេះថា ពីមួយឆ្នាំទៅមួយឆ្នាំ ការចូលរួមក្នុងការស្រាវជ្រាវបានកើនឡើង ស្របពេលដែលសេដ្ឋកិច្ច និងហិរញ្ញវត្ថុរីកចម្រើនឥតឈប់ឈរ និងស្របពេលដែលបច្ចេកវិទ្យាបានវិវត្តន៍យ៉ាងឆាប់រហ័ស ក្នុងនោះបច្ចេកវិទ្យាថ្មីៗត្រូវបានយកមកប្រើប្រាស់ក្នុងវិស័យហិរញ្ញវត្ថុ និងសេវាជាច្រើនដើម្បីឆ្លើយតបទៅនឹងតម្រូវការអតិថិជន។
លោកជំទាវបន្តថា “បច្ចេកវិទ្យាហិរញ្ញវត្ថុបានផ្តល់គុណសម្បត្តិជាច្រើន តាមរយៈការជម្រុញ ឲ្យវិស័យសេវាហិរញ្ញវត្ថុកាន់តែមានប្រសិទ្ធភាព ចំណាយតិច ឆាប់រហ័ស សមាហរណកម្មខ្ពស់ លើកកម្ពស់បរិយាប័ន្នហិរញ្ញវត្ថុ និងគាំទ្រដល់ កំណើនសេដ្ឋកិច្ច។ លោកជំទាវបន្តថា “បច្ចេកវិទ្យាហិរញ្ញវត្ថុ ក៏បានបង្ករឲ្យមានហានីភ័យប្រតិបត្តិការផងដែរ រួមមានហានីភ័យCyber ហានីភ័យនៅក្នុងក្រុមហ៊ុនគតិយភាគី ដែលមិននៅក្រោមច្បាប់ ការចែងមិនច្បាស់លាស់នៅក្នុងច្បាប់ ហានីភ័យកម្រិតមីក្រូ និងម៉ាក្រូ និងកង្វះខាតទិន្នន័យក្នុងការវាយតម្លៃហានីភ័យជាដើម។
លោកជំទាវនាវ ច័ន្ទថាណា បានបន្តទៀតថា ធនាគារជាតិនៃកម្ពុជាបានអភិវឌ្ឍន៍ ប្រព័ន្ធទូទាត់ផ្អែកលើបច្ចេកវិទ្យាហិរញ្ញវត្ថុថ្មីៗ នឹងបានអនុញ្ញាតឲ្យផ្តល់សេវាបច្ចេកវិទ្យាហិរញ្ញវត្ថុ ដោយគ្រឹះស្ថានធនាគារ និងហិរញ្ញវត្ថុផងដែរ ក្នុងនោះធនគាជាតិនៃកម្ពុជា បានដាក់ឲ្យប្រើប្រាស់ប្រព័ន្ធទូទាត់រាយ នៅឆ្នាំ២០១២សម្រាប់ផាត់ទូទាត់មូលប្បទានបត្រ និងបញ្ជាផ្ទេរឥណទាន។ ចំណែកប្រព័ន្ធសេវាទូទាត់រហ័ស ក៏បានដាក់ឲ្យដំណើរការនៅក្នុងឆ្នាំ២០១៦ សម្រាប់សម្រួលដល់ការទូទាត់ភ្លាមៗនូវរាល់ការផ្ទេរមូលនិធិ ។
លោកជំទាវបន្តថា ប្រព័ន្ធ Cambodian Shared Switch (CSS) សម្រាប់សម្រួលដល់ប្រតិបត្តិការម៉ាស៊ីន ATM និងម៉ាស៊ីន POS គឺទើបដាក់ឲ្យដំណើរការក្នុងពេលថ្មីៗនេះផងដែរ ហើយក្នុងពេលបច្ចុប្បន្នធនាគារជាតិនៃកម្ពុជាក៏កំពុងសិក្សាលទ្ធភាព ក្នុងការប្រើប្រាស់រូបិយប័ណ្ណឌីជីថល សម្រាប់ការទូទាត់នៅក្នុងទីផ្សារអន្តរជាតិធនាគារ។ លោកឆារស៍ វ៉ាន់ប្រធានស្តីទីសមាគមធនាគារកម្ពុជាបានថ្លែងថា ប្រព័ន្ឋទូទាត់បែបនេះមិនទាន់មាននៅកម្ពុជាទេ ប៉ុន្តែនៅប្រទេសជឿនលឿននានាបាន អនុវត្តន៍ហើយ ហេតុនេះយើងត្រូវសិក្សាលើប្រព័ន្ឋនេះជាក់លាក់សិន ដើម្បីកំណត់ថាគួរជ្រើសរើសយកប្រព័ន្ឋណាមួយ យកមកប្រើប្រាស់ឲ្យមានប្រសិទ្ឋិភាពខ្ពស់។លោកបន្តថា ការប្រើប្រាស់ប្រព័ន្ឋនេះក៏មានហានិភ័យផងដែរ ហេតុនេះការរៀបចំប្រព័ន្ឋនេះឲ្យបានច្បាស់លាស់ មានសារៈសំខាន់ណាស់ ដើម្បីបញ្ចៀសហានិភ័យនានា។
លោកបន្តថា “ប្រព័ន្ឋថ្មីនេះផ្តល់ប្រយោជន៍ច្រើនដល់អ្នកប្រើប្រាស់ និងអតិថិជន ហើយធនាគារគ្រាន់តែដើរតួនាទីជាអ្នកសម្របសម្រួលប៉ុណ្ណោះ ប៉ុន្តែការរៀបចំប្រព័ន្ឋឲ្យបានច្បាស់លាស់មានសារៈសំខាន់ណាស់ ដើម្បីការពារហានិភ័យពីការលួច”៕
