ដោយ៖ គង់ សូរិយា
ភ្នំពេញ៖ ធនាគារជាតិនៃកម្ពុជា (NBC) បានប្រកាសដល់សាធារណៈជនទូទាំងប្រទេសកុំឲ្យជឿឃោសនាការប្រើប្រាស់កាក់ជំនួសរូបិយប័ណ្ណ ដែលមន្ត្រីជាន់ខ្ពស់ធនាគារជាតិបានចាត់ទុកជាទម្រង់នៃការឆបោកថ្មី និងមានហានីភ័យខ្ពស់សម្រាប់ប្រជាពលរដ្ឋទូទៅ។
លោកជំទាវ ជា សិរី អគ្គនាយកបច្ចេកទេស ធនាគារជាតិនៃកម្ពុជា បានថ្លែងលើកឡើងនៅក្នុងសន្និសីទម៉ាក្រូសេដ្ឋកិច្ចលើកទី៤ ស្តីពីតួនាទីរបស់បច្ចេកវិទ្យា ក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជាកាលពីម្សិលម៉ិញនេះថា កាលពីពេលថ្មីៗនេះមានក្រុមហ៊ុនមួយចំនួនបានធ្វើការផ្សព្វផ្សាយ និងបានបើកសិក្ខសាលា ដើម្បីបញ្ជ្រាបនៃការប្រើប្រាស់កាក់របស់ខ្លួន ដែលជាប្រភេទកាក់ឌីជីថល សម្រាប់ប្រើប្រាស់នៅក្នុងក្រុមហ៊ុនរបស់គេ ពោលគឺនៅពេលក្រុមហ៊ុនលក់ចេញបានច្រើន ហើយក្រុមហ៊ុនលែងប្រមូលទិញវិញ នោះកាក់នេះនឹងធ្លាក់ថ្លៃ ឬអត់តម្លៃដោយខ្លួនឯង ដែលចាត់ទុកជាការឆបោកនៃទម្រង់ថ្មីមួយទៀត។
លោកជំទាវបានបន្តថា កាក់ទាំងអស់នេះធនាគារជាតិនៃកម្ពុជា មិនទទួលស្គាល់ឡើយ ហើយពាក់ព័ន្ធបញ្ហានេះធនាគារជាតិនៃកម្ពុជា បានទាក់ទងទៅធនាគារពាណិជ្ជរួចរាល់ហើយ គឺមិនអនុញ្ញាត្តិឲ្យធ្វើប្រតិបត្តិការណា ទាក់ទិននឹងកាក់ឌីជីថលនេះឡើយ ព្រោះវាជាឧបករណ៍ដែលមានហានីភ័យខ្ពស់ ដូច្នេះសូមឲ្យប្រជាពលរដ្ឋមានការប្រុងប្រយ័ត្នខ្ពស់ ចំពោះការបំផុសបំផុលឲ្យទទួលកាក់នោះជំនួសរូបិយប័ណ្ណ ក្នុងនោះបើធនាគារពាណិជ្ជឥតទទួលយកប្រភេទកាក់ឌីជីថលនេះទេ យើងនឹងជួបបញ្ហាខាតបង់ ។
លោកជំទាវជា សិរីបានបន្តថា ទាក់ទិននឹងការប្រើប្រាស់កាក់ឌីជីថលនេះ ប្រជាពលរដ្ឋដែលចង់សាកល្បងប្រើប្រាស់ គឺជាសិទ្ធនៃការប្រើប្រាស់របស់ពួកគាត់ ប៉ុន្តែធនាគារជាតិនៃកម្ពុជាមិនមានការទទួលស្គាល់នោះឡើយ ព្រោះកន្លងមកនេះធនាគារជាតិ បានចេញសេចក្តីប្រកាសម្តងរួចមកហើយ អំពីការប្រើប្រាស់កាក់ប្រភេទឌីជីថលប្រភេទនេះ។
ប្រធានគណកម្មការមូលបត្រកម្ពុជាលោកស៊ូ សុជាតិបានថ្លែងថា ការងារនេះជាសមត្ថកិច្ចរបស់ធនាគារជាតិនៃកម្ពុជា ប៉ុន្តែកន្លងមកលោកធ្លាប់លឺពីការយកកាក់មកទូទាត់ ក្នុងទម្រង់រូបិយប័ណ្ណឌីជីថល សម្រាប់យកមកធ្វើជាមធ្យោបាយទូទាត់ក្នុងទីផ្សារ ហើយការប្រកាសរបស់ធនាគារជាតិជារឿងត្រឹមត្រូវ។
លោកបន្តថា “ខ្ញុំគាំទ្រការលើកឡើងរបស់ធនាគារជាតិ ព្រោះនៅពេលមិនទាន់ច្បាស់លាស់ មិនទាន់មានព៌តមានគ្រប់គ្រាន់ សូមប្រជាជនកុំប្រឡូកលើរឿងនេះ”៕
