ដោយ: គង់ លាងហួរ
អន្តរជាតិ: រដ្ឋាភិបាលឡាវ បានអនុម័តគម្រោងសាងសង់ផ្លូវល្បឿនលឿនឡាវ -ចិនដំណាក់កាលទី៤ ចេញពីទីក្រុងហ្លួងព្រះបាង និងខេត្តឧដុមសៃ (Oudomxay)ឆ្ពោះទៅកាន់ច្រកព្រំដែន Boten ដែលមានទីតាំងទល់មុខទីក្រុង Mohan ក្នុងខេត្តយូណានរបស់ប្រទេសចិន និងមានចម្ងាយពីគ្នាប្រមាណ៦៣គីឡូម៉ែត្រ។
ការអនុម័តនេះធ្វើឡើង បន្ទាប់ពីមានជំនួបរវាងលោក Fang Hong ឯកអគ្គរដ្ឋទូតចិនប្រចាំប្រទេសឡាវ ជាមួយលោក Ngampasong Muongmany រដ្ឋមន្ត្រីក្រសួងសាធារណការ និងដឹកជញ្ជូនឡាវ ដើម្បីពន្លឿនការសាងសង់គម្រោងនេះ។ នេះបើយោងតាមសារពត៌មាន Laotian Times។
ក្នុងជំនួបនេះ ភាគីទាំង២បានពិភាក្សាគ្នា លើបញ្ហាជាច្រើនទាក់ទង នឹងការសាងសង់ហេដ្ឋារចនាសម្ព័ន្ធរបស់ប្រទេសឡាវ និងបានបង្ហាញការឯកភាពគ្នា ក្នុងការពន្លឿនការសាងសង់ផ្លូវល្បឿនលឿន រវាងឡាវ- ចិនបញ្ចប់ឱ្យបានឆាប់រហ័ស សំដៅស្វែងរកផលប្រយោជន៍រួម សម្រាប់ប្រទេសទាំង២។
ទោះជាយ៉ាងណាក្តី ប្រភពខាងលើមិនបានផ្តល់ព័ត៌មានលម្អិត អំពីពេលវេលាជាក់លាក់នៃការចាប់ផ្តើម និងការបញ្ចប់ការសាងសង់នៅឡើយនោះទេ ។
ផ្លូវល្បឿនលឿនឡាវ-ចិន មានចម្ងាយសរុបប្រមាណ៤២៣គីឡូម៉ែត្រ។ ការសាងសង់ចែកចេញជា៤ ដំណាក់កាល ដោយក្នុងនោះ ដំណាក់កាលទី១ មានចម្ងាយ១០៩គីឡូម៉ែត្រតភ្ជាប់ពីទីក្រុងវៀងច័ន្ទ ទៅកាន់ទីក្រុងវ៉ាងវៀង បានបញ្ចប់រួចរា ល់ បន្ទាប់ពីបើកការដ្ឋានសាងសង់ កាលពីខែធ្នូ ឆ្នាំ២០២០។
ដំណាក់កាលទី២ តភ្ជាប់ពីទីក្រុងវ៉ាងវៀង ទៅកាន់ទីក្រុងហ្លួងព្រះបាង មានចម្ងាយ១៣៧គីឡូម៉ែត្រ និងដំណាក់កាលទី៣ តភ្ជាប់ចេញពីទីក្រុងហ្លួងព្រះបាង ទៅកាន់ខេត្តឧដុមសៃ (Oudomxay) មានចម្ងាយ១១៤គីឡូម៉ែត្រ និងកំពុងស្ថិតក្នុងដំណាក់កាលត្រួតពិនិត្យ កិច្ចសន្យាសាងសង់នៅឡើយ៕
ប្រភព:Laotian Times
