កម្ពុជាទទួលបានទុនវិនិយោគប្រមាណ៧,៥ពាន់លានដុល្លារអាមេរិកក្នុងរយៈពេល១ឆ្នាំចុងក្រោយ
ដោយៈ គង់ សូរិយា
ភ្នំពេញៈ ក្នុងរយៈពេលមួយឆ្នាំចុងក្រោយ កម្ពុជាទទួលបានទុនវិនិយោគ សរុបប្រមាណ៧,៥ពាន់លានដុល្លារអាមេរិក គិតចាប់ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤នេះ។
ខេត្តកំពង់ស្ពឺ ជាខេត្តទទួលបានគម្រោងវិនិយោគច្រើនជាងគេ ដែលមានចំនួនរហូតដល់៩៥ ក្នុងចំណោមគម្រោងវិនិយោគចំនួនជិត៤០០ ក្នុងចំណោមរាជធានី ខេត្តទាំង២៥។
ជាឆ្នាំដំបូងនៃរាជរដ្ឋាភិបាលដឹកនាំ ដោយសម្តេចធិបតីហ៊ុន ម៉ាណែតនាយករដ្ឋមន្ត្រីនៃកម្ពុជា ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី និងគម្រោងពង្រីកផលិតកម្មចំនួន ៣៩១គម្រោង មានទុនវិនិយោគប្រមាណ៧,៥ពាន់លានដុល្លារអាមេរិក និងអាចបង្កើតការងារ បានប្រមាណ៣៤ម៉ឺនកន្លែង។ នេះបើតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី២៨ ខែសីហា។
ចំនួនគម្រោងវិនិយោគនេះ បង្ហាញពីការកើនឡើងចំនួន ១៦៨គម្រោង ខណៈទុនវិនិយោគ ក៏បានកើនឡើងចំនួន ៤៦៧២លានដុល្លារ ស្មើនឹងប្រមាណ១៦១ភាគរយ ធៀបនឹងរយៈពេលដូចគ្នា១ឆ្នាំចុងក្រោយ។
ក្រុមប្រឹក្សាអភិវឌ្ឍន៍កម្ពុជាបានបង្ហាញថា “ការកើនឡើងយ៉ាងគំហុកនេះ ដោយសារវត្តមាននៃគម្រោងថ្មី នៅក្នុងវិស័យហេដ្ឋារចនាសម្ព័ន្ធ, វិស័យឧស្សាហកម្ម, វិស័យទេសចរណ៍ និងគម្រោងបង្កើតតំបន់សេដ្ឋកិច្ចពិសេស”។
ក្នុងចំណោមគម្រោង ដែលលេចធ្លោរួមមានទាំងអាជីវកម្មសណ្ឋាគារផ្កាយ៥ មានបន្ទប់ចំនួន២៨៧០ និងមជ្ឈមណ្ឌលពាណិជ្ជកម្ម នៅក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ៥៧៤លានដុល្លារ និងអាចបង្កើតការងារបានចំនួន៣៨៦០កន្លែង។
លើសពីនេះក៏មានគម្រោង សាងសង់វារីអគ្គិសនីស្ទឹងមេទឹក មានអានុភាព១៥០មេហ្គាវ៉ាត់ តាមរូបភាពសាងសង់ ប្រតិបត្តិការ និងផ្ទេរ (BOT) នៅស្ទឹងមេទឹក ស្រុកមណ្ឌលសីមា ខេត្តកោះកុង ក្នុងទុនវិនិយោគជាង៤៤០លានដុល្លារផងដែរ។
បន្ថែមពីលើនេះ គម្រោងវិនិយោគ នៅក្នុងតំបន់សេដ្ឋកិច្ចពិសេសក៏មានការកើនឡើងដែរ ដែលមានទឹកប្រាប់ជាង១ពាន់លានដុល្លារ និងបង្កើតការងារបានជាច្រើនពាន់កន្លែង។
ក្រុមប្រឹក្សាអភិវឌ្ឍន៍កម្ពុជាបញ្ជាក់ថា ក្នុងរយៈពេលពេញមួយឆ្នាំនេះ ប្រភពទុនវិនិយោគមកពីប្រទេសចិន បានឈរនៅលំដាប់លេខរៀងទី១ ដោយបានរួមចំណែក៦០,៤៤ភាគរយនៃទុនវិនិយោគសរុប ខណៈពេលដែលការវិនិយោគក្នុងស្រុកគ្របដណ្តប់៣២,៣១ ភាគរយនៃទុនវិនិយោគសរុប។
បើគិតពីការវិនិយោគតាមវិស័យវិញ ឧស្សាហកម្មឈរលំដាប់ថ្នាក់ទី១ មានទំហំស្មើនឹង៥២ភាគរយ បន្ទាប់មកគឺហេដ្ឋារចនាសម្ព័ន្ធមាន៣៩ភាគរយ និងទេសចរណ៍ (៨ភាគរយ) ខណៈដែលវិស័យកសិកម្មមាន២ភាគរយ។
លោកបណ្ឌិតហុង វណ្ណៈ អ្នកស្រាវជ្រាវផ្នែកសេដ្ឋកិច្ចនៅរាជបណ្ឌិត្យសភាកម្ពុជា ថ្លែងថា កំណើននៃគម្រោងវិនិយោគទាំងនេះ បង្ហាញពីបរិបទថ្មីក្រោយកូវីដ១៩ និងក្នុងពេលមានវិបត្តិផ្សេងៗ នៅបន្តកើតឡើងនៅលើពិភពលោក។
លោកថ្លែងថា “ការហក់ឡើង នៃគម្រោងវិនិយោគនេះជាមោទនភាពមួយ របស់យើងទាំងអស់គ្នា ដោយសារតែអ្នកវិនិយោគមើលឃើញពីសក្ដានុពល និងឱកាស សុខសន្តិភាព និងជាលទ្ធផល នៃការទូតសេដ្ឋកិច្ចរបស់រដ្ឋាភិបាល និងទំនាក់ទំនងរបស់កម្ពុជាជាមួយប្រទេសដៃគូ និងការប្រឹងប្រែងរបស់កម្ពុជា ក្នុងការកែសម្រួលលក្ខខណ្ឌវិនិយោគ ការពង្រីកហេដ្ឋារចនាសម្ព័ន្ធ។ ទាំងអស់នេះធ្វើឲ្យវិនិយោគនៅកម្ពុជា”៕
