ដោយវុត្ថា
ហាន់ណូយ៖ អនុប្រធានទី២ នៃរដ្ឋសភា បានមានប្រសាសន៍ថា ក្នុងរយៈពេលជាង ២ ទសវត្សចុងក្រោយនេះ ជាមួយនឹងសិ្ថរភាពនយោបាយ និងសិ្ថរភាពសេដ្ឋកិច្ច, កម្ពុជាសម្រេចបានកំណើនសេដ្ឋកិច្ចខ្ពស់គួរឱ្យកត់សម្គាល់ជាមធ្យម ៧,៧% ក្នុងមួយឆ្នាំ ហើយបានប្រែក្លាយខ្លួនពីប្រទេសដែលមានចំណូលកម្រិតទាប ទៅជាប្រទេសដែលមានចំណូលមធ្យមកម្រិតទាប កាលពីឆ្នាំ ២០១៥ នឹងឈានទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០។
លោកស្រី ឃួន សុដារី អនុប្រធានទី២ នៃរដ្ឋសភាបានថ្លែង នៅក្នុងពេលជំនួបពិភាក្សាស្វែងយល់ពីវិទ្យាសាស្រ្ត និងបច្ចេកវិទ្យា ជាមួយ លោក ប៊ួយ ថេ ហ្សូយ អនុរដ្ឋមន្រ្តីក្រសួងវិទ្យាសាស្រ្ត និងបច្ចេកវិទ្យាវៀតណាម នៅសួនវិទ្យាសាស្រ្តជាន់ខ្ពស់ Hoa Lac Hi-tech Park នៅទីក្រុងហាណូយ កាលពីថ្ងៃទី ២៤ ខែមីនា ឆ្នាំ២០១៩ ថា មិនត្រឹមតែកំណើនសេដ្ឋកិច្ចខ្ពស់នាពេលនេះ កម្ពុជាក៏បានផ្លាស់ប្តូររចនាសម្ព័ន្ធសេដ្ឋកិច្ចផងដែរ។
-->
លោកស្រីបន្តថា ជាការកត់សម្គាល់ គឺពីប្រទេសដែលមានសេដ្ឋកិច្ចពឹងផ្អែកលើវិស័យកសិកម្មជាស្នូល ទៅជាប្រទេសដែលមានសេដ្ឋកិច្ចពឹងផ្អែកលើវិស័យឧស្សាហកម្ម និងសេវាកម្ម ដោយប្រើប្រាស់វិទ្យាសាស្រ្តទំនើប ព្រោះនេះជាកម្លាំងជំរុញដ៏ខ្លាំងក្នុងការពន្លឿនកំណើនសេដ្ចកិច្ច។
ជាការពិតណាស់សមិទ្ធផល និងមហិច្ចតាដ៏ធំធេងខាងលើនេះ គឺជាការខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការអនុវត្តគោលនយោបាយឈ្នះ ឈ្នះ ដឹកនាំដោយសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃព្រះរាជាណាចក្រកម្ពុជា ហើយដែលថ្មីៗនេះ ក្រសួងសេដ្ចកិច្ចកំពុងកំណត់ទិសដៅ និងរៀបចំក្របខណ្ឌគោលនយោបាយសេដ្ឋកិច្ចឌីជីថលកម្ពុជា។
លោកស្រី ឃួន សុដារី បានមានប្រសាសន៍បន្ថែមថា ក្នុងនាមជាអ្នកតំណាងរាស្រ្ត ដែលជាតួនាទីមួយដ៏សំខាន់ ក៏ដូចជាក្នុងនាម ជាសមាជិករដ្ឋសភា គឺយើងទាំងអស់គ្នាខិតខំប្រឹងប្រែងស្វែងរកចំណុចវិជ្ជមាននៃការវិវត្តវិទ្យាសាស្រ្តបច្ចេកវិទ្យា ព្រមទាំងត្រៀមរាល់បណ្តាការគិតគូរផ្នែកផ្លូវច្បាប់ ដើម្បីធ្វើយ៉ាងណាទប់ទល់នូវបញ្ហាឧក្រិដ្ឋកម្មព័ត៌មានវិទ្យា (Cyber Crime)។
លោក ប៊ួយ ថេ ហ្សូយ អនុរដ្ឋមន្រ្តីក្រសួងវិទ្យាសាស្រ្ត និងបច្ចេកវិទ្យា បានមានប្រសាសន៍ឆ្លើយតបថា វៀតណាមត្រៀមខ្លួនជានិច្ចក្នុងការសហការណ៍បន្តទៀតលើវិស័យវិទ្យាសាស្រ្ត បច្ចេកវិទ្យា ដើម្បីបង្កើនកិច្ចសហប្រតិបត្តិការទ្វេភាគីលើវិស័យនេះឱ្យកាន់តែមានប្រសិទ្ធភាពបន្ថែមទៀត។
ចំណែកឯ គណៈកម្មការជំនាញវិទ្យាសាស្រ្ត និងបច្ចេកវិទ្យានៃរដ្ឋសភាវៀតណាម ក៏បានប្តេជ្ញាចិត្តចូលរួមយ៉ាងសកម្មក្នុងកិច្ចការនីតិកម្មលើការគ្រប់គ្រង និងទប់ស្កាត់បទល្មើសប្រព័ន្ធបច្ចេកវិទ្យា។រាជរដ្ឋាភិបាលកម្ពុជានីតិកាលទី៦ នៃរដ្ឋសភា បានចាត់ទុកការអភិវឌ្ឍសេដ្ឋកិច្ចឌីជីថល ជាវិស័យអាទិភាពយ៉ាងសំខាន់បំផុតមួយ សម្រាប់ការអភិវឌ្ឍប្រទេស ដូចដែលមានកំណត់ក្នុងយុទ្ធសាស្រ្តចតុកោណដំណាក់កាលទី៤។
លោកឃួន សុដារី សង្ឃឹមថា ឈរលើស្មារតីសាមគ្គីភាព មិត្តភាព និងកិច្ចសហប្រតិបត្តិគ្រប់ជ្រុងជ្រោយយូរអង្វែងរវាងកម្ពុជា-វៀតណាមលើគ្រប់វិស័យ តាមរយៈការយកចិត្តទុកដាក់ និងជួយចែករំលែកនូវបទពិសោធន៍លើវិស័យបច្ចេកវិទ្យាទំនើប នឹងបម្រើបាននូវបុព្វហេតុក្នុងការជំរុញកំណើនការអភិវឌ្ឍន៍នៃប្រទេសទាំងពីរ៕
[…] post កម្ពុជាចាប់យកឧស្សាហកម្មទី៤ ដើ… appeared first on PROPERTY AREA […]