ដោយ ៖ គង់ សូរិយា
ភ្នំពេញ ៖ មន្ត្រីជំនាញនៃក្រុមហ៊ុនវិនិយោគ ព្រលានយន្តហោះកម្ពុជា (SCA) បានអះអាងថា បើសិនជាមានការសាងសង់ព្រលានយន្តហោះក្នុងស្រុក នៅខេត្តស្ទឹងត្រែង នឹងមានអ្នកដំណើរច្រើន ដោយសារប្រជាពលរដ្ឋកម្ពុជាធ្វើដំណើរតាមយន្តហោះកើនឡើង។
ប្រធានផ្នែកបង្កើនជើងហោះហើរនៃក្រុមហ៊ុនអាកាសយានដ្ឋានកម្ពុជា លោក ពេជ្រ សុប៉ុនតារា បានមានប្រសាសន៍ឲ្យដឹង តាមទូរស័ព្ទនារសៀលថ្ងៃទី២៦ មិនានេះថា តាមរបាយការណ៍ក្នុងចំណោមអ្នកដំណើរ តាមផ្លូវអាកាសចំនួន១០លាននាក់នៅឆ្នាំនេះ មានអ្នកដំណើរជនជាតិខ្មែរចំនួន២៨ភាគរយ ដែលបង្ហាញថាការធ្វើដំណើររបស់ប្រជាជនខ្មែរតាមផ្លូវអាកាសកាន់តែច្រើនជាងមុន ខុសពីកាលពីពេលមុនដែលប្រជាជនខ្មែរមានការភ័យខ្លាច មិនសូវហ៊ានធ្វើដំណើរតាមយន្តហោះ។
លោកបន្តថា “ហេតុនេះបើសិនជាមានការសាងសង់ព្រលានយន្តហោះ នៅភូមិភាគឥសាន្ត ចំនួនអ្នកដំណើរតាមផ្លូវអាកាស នឹងកើនឡើងទៅកាន់ខេត្តទាំងនោះ”។លោកបន្តថា “បច្ចុប្បន្នការធ្វើដំណើរទៅកាន់ភូមិភាគឥសាន្ត ត្រូវចំណាយពេលស្ទើរពេញមួយថ្ងៃ ដោយសារផ្លូវឆ្ងាយ ទោះជាផ្លូវធ្វើដំណើរស្រួលជាងមុនក្តី”។ លោក ពេជ្រ សុប៉ុនតារា បានបន្តថា ការចំណាយពេលយូរ ធ្វើឲ្យប្រជាជនមិនចង់ធ្វើដំណើរ ប៉ុន្តែបើមានយន្តហោះ គឺចំណាយពេលត្រឹមតែ៤៥នាទី គឺទៅដល់ ហេតុនេះពួកគេនឹងមានពេលវេលាច្រើនក្នុងការដើរកំសាន្ត។
កាលពីសប្តាហ៍មុន សម្តេច តេជោ ហ៊ុន សែន នាយករដ្ឋមន្រ្តីកម្ពុជាបានប្រកាសពិចារណាសាងសង់ព្រលានយន្តហោះនៅភូមិភាគឥសាន្ត ចន្លោះខេត្តរតនគិរី និងមណ្ឌលគិរី ដែលអាចសំដៅដល់ខេត្តស្ទឹងត្រែង ដោយសារខេត្តស្ទឹងត្រែងមានព្រលានយន្តហោះស្រាប់ និងជាទីតាំងសមស្រម ដែលមានការសិក្សានិងផ្តល់អនុសាសន៍ពីធនាគារអភិវឌ្ឈន៍អាស៊ី (ADB) ឲ្យរដ្ឋាភិបាលសាងសង់ព្រលានយន្តហោះក្នុងខេត្តនេះឡើងវិញ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាធ្លាប់បានមានប្រសាសន៍ គាំទ្រចំពោះការសាងសង់ព្រលានយន្តហោះ ខេត្តស្ទឹងត្រែងឡើងវិញ ដែលលោកស្រីថា វានឹងជំរុញធ្វើឲ្យចំនួនភ្ញៀវទេសចរទៅទស្សនាខេត្តនេះ ក៏ដូចជាបណ្តាខេត្តស្ថិតនៅភូមិភាគឥសាន្តកើនឡើង ដោយសារការធ្វើដំណើរចំណាយពេលតិច មិនខាតពេលវេលា។ លោកស្រីបន្តថា “វាមិនត្រឹមជំរុញភ្ញៀវទេសចរណ៍ទេ តែវានឹងធ្វើឲ្យសេដ្ឋកិច្ចនៅបណ្តាខេត្តទាំងនោះកាន់តែរីកចម្រើនផងដែរ”៕
