ដោយ: គង់ លាងហួរ
អន្តរជាតិ: ក្រុមហ៊ុនផលិតយន្តហោះពាណិជ្ជកម្ម Commercial Aircraft Corp of China (Comac)របស់ប្រទេសចិន កំពុងព្យាយាមស្វែងរកអតិថិជនអន្តរជាតិដើម្បីនាំយកយន្តហោះដឹកអ្នកដំណើរប្រភេទ C919 របស់ខ្លួនទៅកាន់ទីផ្សារក្រៅប្រទេស។
ក្តីសង្ឃឹមរបស់ក្រុមហ៊ុនរដ្ឋចិន Comac ក្នុងការទាក់ទាញស្វែងរកអតិថិជនបញ្ជាទិញយន្តហោះ C919 របស់ខ្លួនបានកើនឡើង ខណៈការប្រគល់យន្តហោះត្រូវបានពន្យារពេលកាន់តែយូរ ដោយសារបញ្ហាខ្សែសង្វាក់ផ្គត់ផ្គង់របស់ក្រុមហ៊ុន Boeing និងការផ្អាកផលិតកម្ម ដោយសារតែការធ្វើកូដកម្មរបស់កម្មករក្រុមហ៊ុនផលិតយន្តហោះខ្នាតយក្សមួយនេះ។
យោងតាមប្រភពមួយបានទម្លាយឱ្យដឹងថា ថ្មីៗនេះ ក្រុមហ៊ុន Comac ក៏បានធ្វើការទាក់ទងជាមួយក្រុមហ៊ុនអាកាសចរណ៍ SCAT របស់ប្រទេសកាហ្សាក់ស្ថាន និងក្រុមហ៊ុន Angkor Air របស់កម្ពុជា ព្រមទាំងបានបញ្ចុះបញ្ចូលរដ្ឋាភិបាលឥណ្ឌូនេស៊ីឱ្យផ្តល់អាជ្ញាបណ្ណដល់ក្រុមហ៊ុនផលិតយន្តហោះចិន។
-->
យ៉ាងណាមិញ តំណាងក្រុមហ៊ុន Comac មិនបានឆ្លើយតបនឹងសំណើសុំការអត្ថាធិប្បាយទេ។ ជាមួយគ្នានេះ ក្រុមហ៊ុន SCAT Airlines និងក្រុមហ៊ុន Angkor Air ក៏មិនបានឆ្លើយតបនឹងសំណើសុំការអត្ថាធិប្បាយដែរ។
ប៉ុន្តែ គេដឹងថា ក្រុមហ៊ុនចិន Xing Gang Investment Group ក៏ជាម្ចាស់ភាគហ៊ុនមួយនៅក្នុងក្រុមហ៊ុនអាកាសចរណ៍ Angkor Air របស់កម្ពុជាផងដែរ។
ដោយឡែក ប្រទេសឥណ្ឌូនេស៊ីជាឱកាសដ៏ធំមួយសម្រាប់ក្រុមហ៊ុន Comac ខណៈរដ្ឋាភិបាលថ្មី ដែលដឹកនាំដោយលោកប្រធានាធិបតី Prabowo Subianto គ្រោងពង្រីកបណ្តាញផ្លូវហោះហើរអន្តរជាតិរបស់ខ្លួន និងស្តារឡើងវិញនូវក្រុមហ៊ុនអាកាសចរណ៍រដ្ឋ Garuda ខណៈកន្លងទៅ ក្រុមហ៊ុននេះបានជួបប្រទះការខាតបង់ធ្ងន់ធ្ងរ។
បន្ថែមលើនេះ ប្រទេសឥណ្ឌូនេស៊ីមានទំនាក់ទំនងផ្នែកសេដ្ឋកិច្ចយ៉ាងរឹងមាំជាមួយប្រទេសចិន ដែលជាដៃគូពាណិជ្ជកម្មដ៏ធំបំផុតរបស់ខ្លួន ជាពិសេសការវិនិយោគលើការកែច្នៃរ៉ែនីកែល ហើយដំណើរទស្សនកិច្ចនាពេលថ្មីៗនេះរបស់លោក Prabowo ទៅកាន់ប្រទេសចិន ភាគីទាំង២ក៏បានចុះកិច្ចព្រមព្រៀងពាណិជ្ជកម្មជាច្រើនផងដែរ។
ថ្មីៗនេះ ក្រុមហ៊ុន Comac ក៏បានបើកការិយាល័យលក់នៅទីក្រុងហុងកុង និងទីក្រុងសិង្ហបុរីផងដែរ ក្រោយពីបានបើកការិយាល័យសេវាអតិថិជនបរទេសដំបូងគេនៅទីក្រុងហ្សាការតាក្នុងឆ្នាំ២០២៣៕ប្រភព: Bloomberg៕
