ដោយ: គង់ លាងហួរ
អន្តរជាតិ: រដ្ឋាភិបាលថៃរំពឹងថា កំណាត់ផ្លូវរថភ្លើងល្បឿនលឿនចម្ងាយ៦០៩គីឡូម៉ែត្រតភ្ជាប់ពីទីក្រុងបាងកកទៅកាន់ខេត្ត Nong Kai ជាប់ព្រំដែនឡាវ នឹងចាប់ផ្តើមដាក់ឱ្យដំណើរការនៅក្នុងឆ្នាំ២០៣០ខាងមុខ ដែលយឺតជាងផែនការគ្រោងទុកដំបូងជិត១០ឆ្នាំ។
លោក Jirayu Houngsub អ្នកនាំពាក្យរដ្ឋាភិបាលថៃបានបង្ហើបឱ្យដឹងថា ការសាងសង់កំណាត់ផ្លូវដែកដំណាក់កាលទី១ តភ្ជាប់ពីទីក្រុងបាងកកទៅកាន់ខេត្តនគររាជសីមា បានសម្រេចវឌ្ឍនភាពចំនួន៣៦ភាគរយ ខណៈការដ្ឋានដែលនៅសេសសល់ ឬមិនទាន់សាងសង់រួចមានចម្ងាយ២២០គីឡូម៉ែត្រ។ ដំណាក់កាលទី១នេះគ្រោងនឹងចាប់ផ្តើមដំណើរការនៅឆ្នាំ២០២៧។
លោក Jirayu បានបន្តថា “ផែនការរចនាផ្លូវដែកដំណាក់កាលទី២តភ្ជាប់ពីខេត្តនគររាជសីមាទៅកាន់ខេត្តណងខៃ (Nong Khai) ដែលជាប់ព្រំដែនជាមួយប្រទេសឡាវត្រូវបានសិក្សាបញ្ចប់រួចរាល់ហើយ និងត្រៀមបញ្ជូនទៅកាន់គណៈរដ្ឋមន្ត្រីដើម្បីអនុម័ត”។
-->
ផ្លូវដែកបាងកក-ណងខៃប្រវែង៦០៩គីឡូម៉ែត្រត្រូវបានគេប៉ាន់ប្រមាណថា មានទំហំទុនវិនិយោគចំនួន៤៣៤ពាន់លានបាត (ប្រហែល១២,៩ពាន់លានដុល្លារអាមេរិក)។ ដំណាក់កាលទី២នេះគ្រោងនឹងចាប់ផ្តើមដំណើរការនៅឆ្នាំ២០៣០។
នៅពេលសាងសង់រួចរាល់ ខ្សែរថភ្លើងល្បឿនលឿននឹងចាកចេញពីខេត្តណងខៃជាប់ព្រំដែនឡាវ តាមរយៈស្ពាន ដែលត្រូវបានសាងសង់ឆ្លងទន្លេមេគង្គឆ្ពោះទៅកាន់រដ្ឋធានីវៀងច័ន្ទន៍ ដើម្បីតភ្ជាប់ជាមួយខ្សែរថភ្លើងពីទីក្រុងវៀងច័ន្ទន៍ទៅកាន់ទីក្រុងគុនមីង(Kunming)ប្រទេសចិន។
នៅពេលដាក់ឱ្យដំណើរការ បណ្តាញផ្លូវដែកបាងកក-វៀងច័ន្ទន៍ នឹងធ្វើឱ្យភ្ញៀវទេសចរណ៍ងាយស្រួលធ្វើដំណើរពីទីក្រុងបាងកកទៅកាន់រដ្ឋធានីប៉េកាំងរបស់ប្រទេសចិន តាមរយៈចំណតនៅទីក្រុងវៀងច័ន្ទន៍ និងទីក្រុងគុនមីងនៅភាគខាងត្បូងនៃប្រទេសចិន ដែលមានសេវារថភ្លើងល្បឿនលឿនដាច់ដោយឡែកទៅកាន់ទីក្រុងប៉េកាំង។
ប្រទេសថៃបានចាប់ផ្តើមបើកការដ្ឋានសាងសង់បណ្តាញផ្លូវដែកល្បឿនលឿនក្នុងឆ្នាំ២០១៧ ក្រោមគំនិតផ្តួចផ្តើមខ្សែក្រវ៉ាត់ និងផ្លូវ(BRI)របស់រដ្ឋាភិបាលចិន ខណៈរដ្ឋាភិបាលថៃទទួលខុសត្រូវលើការវិនិយោគគម្រោងទាំងមូល៕ប្រភព: Bloomberg៕
