ដោយ: គង់ លាងហួរ
អន្តរជាតិ: រដ្ឋាភិបាលនៃប្រទេសហ្វីលីពីនរបស់លោកប្រធានាធិបតី Ferdinand Marcos Jr. បានដាក់ចេញវិធានការផ្សេងៗ ដើម្បីស្តារទីផ្សារអចលនទ្រព្យនៅក្នុងប្រទេសនេះឡើងវិញ ខណៈដែលអគារការិយាល័យ និងខុនដូជាច្រើននៅក្នុងទីក្រុងម៉ានីលត្រូវបានទុកទំនេរចោល។
ទីផ្សារអចលនទ្រព្យនៅក្នុងទីក្រុងម៉ានីលដែលជារដ្ឋធានី និងមជ្ឈមណ្ឌលសេដ្ឋកិច្ចដ៏សំខាន់របស់ហ្វីលីពីនបានរងផលប៉ះពាល់ពីការផ្គត់ផ្គង់លើសតម្រូវការ បន្ទាប់ពីរដ្ឋបាលលោក Marcos បានសម្រេចប្រកាសបិទទ្វារបណ្តាក្រុមហ៊ុនល្បែងសុីសងអនឡាញបរទេសទាំងអស់ ដែលធ្លាប់ដើរតួយ៉ាងសំខាន់ក្នុងការជំរុញតម្រូវការការិយាល័យ និងខុនដូនៅទីក្រុងម៉ានីល។
ដើម្បីទម្លុះវិបត្តិជាប់គាំងនៃទីផ្សារអចលនទ្រព្យ រដ្ឋបាលលោក Marcos បានបន្តផ្តោតការវិនិយោគលើគម្រោងហេដ្ឋារចនាសម្ព័ន្ធធំៗ ដើម្បីធ្វើឱ្យប្រសើរឡើងនូវការតភ្ជាប់ និងបណ្តាញហេដ្ឋារចនាសម្ព័ន្ធដឹកជញ្ជូន។
-->
គម្រោងហេដ្ឋារចនាសម្ព័ន្ធទាំងនោះរួមមានដូចជា ផ្លូវហាយវេ ស្ពាន និងផ្លូវរថភ្លើង ក្រោមទុនវិនិយោគរាប់ពាន់លានដុល្លារអាមេរិក។ នៅពេលសាងសង់រួចរាល់ ហេដ្ឋារចនាសម្ព័ន្ធសំខាន់ៗទាំងនេះនឹងចាក់បញ្ចូលសក្តានុពលទៅក្នុងទីផ្សារអចលនទ្រព្យហ្វីលីពីន ដោយជំរុញឱ្យតម្លៃអចលនទ្រព្យនៅក្នុងតំបន់ជុំវិញរដ្ឋធានីម៉ានីលមានការកើនឡើង។
ជាមួយគ្នានេះ រដ្ឋាភិបាលហ្វីលពីនបានប្រកាសផ្តល់អាទិភាពដល់ការសាងសង់លំនៅដ្ឋានតម្លៃសមរម្យ ជាពិសេសសម្រាប់លក់ឱ្យគ្រួសារដែលមានកម្រិតប្រាក់ចំណូលទាប។
រដ្ឋបាលលោក Marcos មានគោលបំណងសាងសង់លំនៅដ្ឋានតម្លៃសមរម្យឱ្យបានចំនួន១លានយូនីតជារៀងរាល់ឆ្នាំ ក្នុងគោលបំណងដោះស្រាយវិបត្តិខ្វះខាតលំនៅដ្ឋានចំនួន៦,៥លានយូនីតនៅទូទាំងប្រទេស។
ដោយសារលំហូរវិនិយោគផ្ទាល់ពីបរទេស (FDI) ដើរតួនាទីយ៉ាងសំខាន់ក្នុងទិដ្ឋភាពទីផ្សារអចលនទ្រព្យ ថ្នាក់ដឹកនាំហ្វីលីពីនបានបង្កភាពងាយស្រួលដល់បណ្តាវិនិយោគិនអន្តរជាតិក្នុងការធ្វើធុរកិច្ច ខណៈការវិនិយោគបរទេសជះឥទ្ធិពលវិជ្ជមានដល់វិស័យអចលនទ្រព្យ។
រដ្ឋបាលលោក Marcos Jr. បានសម្រួលដំណើរការនីតិវិធី និងបទប្បញ្ញត្តិផ្សេងៗដើម្បីបង្កើនទំនុកចិត្តរបស់បណ្តាអ្នកអភិវឌ្ឍន៍ និងអ្នកវិនិយោគលើអចលនទ្រព្យ។កិច្ចខិតខំប្រឹងប្រែងទាំងនេះអាចជួយទាក់ទាញលំហូរមូលធនក្នុងស្រុក និងបរទេសចូលមកកាន់ទីផ្សារអចលនទ្រព្យ។
ប្រទេសហ្វីលីពីនបានជំរុញឱ្យមានការសហការក្រោមភាពជាដៃគូសាធារណៈ និងឯកជន(PPP) ដើម្បីលើកទឹកចិត្តឱ្យវិស័យឯកជនចូលរួមជាមួយរដ្ឋាភិបាលក្នុងការវិនិយោគគម្រោងហេដ្ឋារចនាសម្ព័ន្ធ និងគម្រោងអភិវឌ្ឍន៍ទីក្រុង។ការណ៍នេះជួយជំរុញការអភិវឌ្ឍន៍អចលនទ្រព្យ ជាពិសេសនៅតំបន់ទីក្រុង។
បន្ថែមពីលើនេះ រដ្ឋាភិបាលនៃប្រទេសហ្វីលីពីនបានផ្តល់ការលើកទឹកចិត្តផ្នែកពន្ធ និងកញ្ចប់លើកទឹកចិត្តផ្នែកហិរញ្ញវត្ថុផ្សេងទៀត ដើម្បីជំរុញការបណ្តាក់ទុនវិនិយោគលើ វិស័យអចលនទ្រព្យ និងសំណង់ ជាពិសេសសម្រាប់គម្រោងលំនៅដ្ឋានតម្លៃសមរម្យ។
ស្របពេលដែលបណ្តាប្រទេសនានានៅលើពិភពលោកកំពុងបោះជំហានទៅរកនិរន្តរភាព និងភាពបៃតង ហ្វីលីពីនបានយកចិត្តទុកដាក់លើការលើកកម្ពស់ការសាងសង់អគារខ្ពស់ៗឱ្យស្របតាមស្តង់ដារបៃតង និងនិរន្តរភាព។ ការណ៍នេះអាចទាក់ទាញអ្នកទិញអចលនទ្រព្យ ដែលគិតគូរពីបរិស្ថាន និងទំនួលខុសត្រូវសង្គមសម្រាប់បណ្តាក្រុមហ៊ុនសាជីវកម្មធំៗ៕ប្រភព: Inquirer.Net៕
