ដោយ: គង់ លាងហួរ
អន្តរជាតិ: យោងតាមកាសែត Bloomberg បានរាយការណ៍ថា តម្លៃជួលអាផាតមិននៅសង្កាត់ Manhattan ក្នុងទីក្រុងញូវយ៉ករបស់សហរដ្ឋអាមេរិកបានហក់ឡើងដល់កំណត់ត្រាខ្ពស់បំផុតជាលើកទី៥ ក្នុងរយៈពេល៦ខែកន្លងមកនេះ។
នៅខែកក្កដា ការជួលអាផាតមុិននៅសង្កាត់ Manhattan មានតម្លៃជាមធ្យមចំនួន៤.៧០០ដុល្លារក្នុងមួយខែ ហក់ឡើង៧៥ដុល្លារបើធៀបនឹងខែមិថុនា។នេះបើយោងតាមទិន្នន័យពីក្រុមហ៊ុនវាយតម្លៃ Miller Samuel និងក្រុមហ៊ុនភ្នាក់ងារឈ្មួញជើងសា Douglas Elliman ។
យោងតាមកាសែត Bloomberg បានឱ្យដឹងទៀតថា តម្លៃជួលអាផាតមុិនបានកើនឡើងក្នុងរង្វង់៩,៣ភាគរយបើធៀបនឹងឆ្នាំមុន។ តួលេខនេះជាអត្រាកំណើនប្រចាំឆ្នាំខ្ពស់បំផុតលើកទីពីរ គិតចាប់តាំងពីឆ្នាំ២០០៨។
លោក Jonathan Miller ប្រធានក្រុមហ៊ុន Miller Samuel បានលើកឡើងថា ខែកក្កដាតែងតែជាពេលវេលា ដែលមានតម្រូការជួលអាផាតមុិនខ្ពស់បំផុតក្នុងទីក្រុងញូវយ៉ក ដោយសារលំហូរសិស្ស-និស្សិតថ្មីចូលមកកាន់មជ្ឈមណ្ឌលហិរញ្ញវត្ថុពិភពលោកមួយនេះ។
ការប្រកួតប្រជែងដើម្បីជួលអាផាតមុិនបានកើនឡើងយ៉ាងគំហុកកាលពីខែកក្កដា ខណៈកិច្ចសន្យាចំនួន២៩ភាគរយនៃចំនួនកិច្ចសន្យាសរុបត្រូវបានចុះហត្ថលេខា បន្ទាប់ពីឆ្លងកាត់សង្រ្គាមដេញថ្លៃ។ តួលេខនេះជាកំណត់ត្រាខ្ពស់បំផុត។
តម្លៃជួលអាផាតមុិនបានកើនឡើងនៅគ្រប់កម្រិត។ ជាក់ស្តែង តម្លៃអាផាតមុិនកម្រិតទាប(Lower-end)បានហក់ឡើង១៤ភាគរយដល់ទំហំទឹកប្រាក់ចំនួន៣.២០០ដុល្លារក្នុងមួយខែ ខណៈតម្លៃជួលអាផាតមុិនប្រណីតបានកើនឡើង៥ភាគរយដល់ទំហំទឹកប្រាក់ចំនួន១០.៥០០ដុល្លារក្នុងមួយខែ៕ប្រភព: Bloomberg៕
