ដោយ: គង់ លាងហួរ
អន្តរជាតិ: សកម្មភាពជួលការិយាល័យនៅទីក្រុងហុងកុងរបស់ប្រទេសចិនបានកើនឡើងក្នុងរយៈពេល៤ខែជាប់គ្នា គិតត្រឹមខែកក្កដា ឆ្នាំ២០២៥។ កំណើននេះបានជំរុញឱ្យអត្រាការិយាល័យទំនេរធ្លាក់ចុះ។
យោងតាមក្រុមហ៊ុនភ្នាក់ងារប្រឹក្សាយោបល់អចលនទ្រព្យ JLL បានរាយការណ៍ថា បណ្តាក្រុមហ៊ុននៅទីក្រុងហុងកុងបានជួលការិយាល័យសរុបប្រមាណ១៩០.០០០ហ្វីតការ៉េកាលពីខែកក្កដា។
ក្នុងចំណោមនោះ ក្រុមហ៊ុន Shell Hong Kong បានជួលការិយាល័យទំហំ១២.៣០០ហ្វីតការ៉េនៅអគារ The Millennity ក្នុងសង្កាត់ Kwun Tong លើកោះហុងកុង បន្ទាប់ពីបានផ្លាស់ប្តូរទីតាំងចេញពីអគារ Landmark East ដែលស្ថិតនៅក្នុងសង្កាត់ដូចគ្នា។
ទោះបីជាយ៉ាងណា តម្លៃជួលការិយាល័យកម្រិត A នៅតំបន់រដ្ឋបាលពិសេសមួយនេះបានបន្តធ្លាក់ចុះក្នុងរង្វង់០,៥ភាគរយកាលពីខែកក្កដា ឆ្នាំនេះ បើធៀបនឹងខែមិថុនា ទោះបីជាតម្រូវការជួលការិយាល័យមានភាពប្រសើរឡើងយ៉ាងណាក្តី។
លោក Alex Barnes នាយកគ្រប់គ្រងក្រុមហ៊ុន JLL ប្រចាំនៅទីក្រុងហុងកុង ទីក្រុងម៉ាកាវ និងកោះតៃវ៉ាន់ បានអះអាងថា តម្រូវការជួលការិយាល័យនៅទីក្រុងហុងកុងបន្តត្រូវបានជំរុញជាចម្បង ដោយសារកំណើននិន្នាការងាកទៅរកអគារការិយាល័យដែលមានគុណភាពខ្ពស់។
យោងតាមទិន្នន័យបានបង្ហាញថា ទីផ្សារការិយាល័យនៅតំបន់ Kowloon East និងតំបន់ Hong Kong East មានស្ថានភាពល្អប្រសើរជាងគេបំផុត ខណៈអត្រាការិយាល័យទំនេរនៅតំបន់ទាំង២នេះ បានធ្លាក់ចុះក្នុងរង្វង់០,៥ភាគរយ និងក្នុងរង្វង់០,២ភាគរយរៀងៗគ្នា៕ប្រភព: SCMP៕
