ដោយ: គង់ លាងហួរ
អន្តរជាតិ: យោងតាមសារព័ត៌មាន Bloomberg បានចុះផ្សាយថា ការរឹតបន្តឹងច្បាប់របស់ប្រទេសអង់គ្លេសលើជនបរទេសដែលមានទ្រព្យសម្បត្តិស្តុកស្តម្ភ កំពុងជះផលប៉ះពាល់ដល់ទីផ្សារលំនៅដ្ឋានលំដាប់ខ្ពស់នៅទីក្រុងឡុងដ៍។
ក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងថា តម្លៃផ្ទះជាមធ្យមនៅចំកណ្តាលទីក្រុងឡុងដ៍បានធ្លាក់ចុះ៣,២ភាគរយក្នុងរយៈពេល១២ខែគិតត្រឹមចុងខែសីហា ឆ្នាំ២០២៥ ដែលជាការធ្លាក់ចុះលឿនបំផុតចាប់តាំងពីខែមីនា ឆ្នាំ២០២១។
ការធ្លាក់ចុះនេះបណ្តាលមកពីការដាក់សម្ពាធរបស់រដ្ឋាភិបាលអង់គ្លេសលើជនបរទេស និងការភ័យខ្លាចចំពោះការយកពន្ធបន្ថែមលើក្រុមអ្នកមាន ស្របពេលរដ្ឋាភិបាលអង់គ្លេសកំពុងស្វែងរកមធ្យោបាយដើម្បីបង្កើនមូលនិធិសាធារណៈ។
រដ្ឋាភិបាលអង់គ្លេសបច្ចុប្បន្នរបស់លោកនាយករដ្ឋមន្ត្រី Keir Starmer បានកាត់បន្ថយអត្ថប្រយោជន៍ពន្ធចំពោះជនបរទេសដែលមានទ្រព្យធនស្តុកស្តម្ភ។ តួយ៉ាង រដ្ឋាភិបាលរបស់ប្រទេសនេះបានលុបចោលការលើកលែងពន្ធលើការផ្ទេរមរតក និងទ្រព្យសម្បត្តិរបស់ជនបរទេស និងក្រុមអ្នកមាន។
លោក Tom Bill អ្នកជំនាញមកពីក្រុមហ៊ុន Knight Frank បានលើកឡើងថា ការរឹតបន្តឹងពន្ធបានធ្វើឱ្យប្រទេសអង់គ្លេសបាត់បង់ភាពទាក់ទាញចំពោះជនបរទេស។
លោកបានមានប្រសាសន៍ឱ្យដឹងបន្តទៀតថា តម្រូវការពីបណ្តាវិនិយោគិនបរទេសបានធ្លាក់ចុះ ដោយបន្ថែមថា ទីផ្សារលំនៅដ្ឋានលំដាប់ខ្ពស់នៅទីក្រុងឡុងដ៍មានភាពមិនច្បាស់លាស់ ដោយសារការព្រួយបារម្ភអំពីគោលនយោបាយពន្ធ៕ប្រភព: The Business Times៕
