ដោយ: គង់ លាងហួរ
អន្តរជាតិ: ប្រទេសកូរ៉េខាងត្បូងបានដាក់ចេញនូវចំណាត់ការថ្មីដើម្បីទប់ស្កាត់តម្លៃអចលនទ្រព្យ ខណៈវិធានការកន្លងមកមិនមានប្រសិទ្ធភាពគ្រប់គ្រាន់ និងជំរុញឱ្យធនាគារកណ្តាលកូរ៉េមានក្តីបារម្ភជុំវិញការកើនឡើងនៃបំណុល ដោយសារការសម្រុកខ្ចីប្រាក់ទិញផ្ទះ។
រដ្ឋាភិបាលកូរ៉េខាងត្បូងបានប្តេជ្ញាជំរុញការផ្គត់ផ្គង់ផ្ទះថ្មីនៅក្នុងទីក្រុងសេអ៊ូល និងខេត្តជាប់រដ្ឋធានីរបស់ខ្លួន។ ទំហំនៃការផ្តល់ប្រាក់កម្ចីធៀបនឹងតម្លៃផ្ទះក្នុងតំបន់មួយចំនួននឹងត្រូវកាត់បន្ថយពី៥០ភាគរយមកនៅត្រឹម៤០ភាគរយ។
វិធានការដែលបានដាក់ចេញពីមុន រួមមានការកំណត់ទំហំប្រាក់កម្ចីអតិបរមាសម្រាប់ការទិញផ្ទះក្នុងតំបន់រដ្ឋធានីសេអ៊ូល និងការរឹតបន្តឹងលើជនបរទេស ដោយតម្រូវឱ្យពួកគេស្នើសុំការអនុម័តពីអាជ្ញាធរមូលដ្ឋាន មុនពេលទិញផ្ទះ។
យ៉ាងណាមិញ វិធានការថ្មីចុងក្រោយផ្តោតលើការបង្កើនការផ្គត់ផ្គង់ផ្ទះថ្មី។ នៅឆ្នាំ២០៣០ កូរ៉េខាងត្បូងនឹងចាប់ផ្តើមសាងសង់ផ្ទះថ្មីសរុបចំនួន១,៣៥លានយូនីត កើនឡើងជិត២ដងបើធៀបនឹងការផ្គត់ផ្គង់ផ្ទះថ្មីកាលពី៣ឆ្នាំមុន។
ជាមួយគ្នានេះ រដ្ឋាភិបាលកូរ៉េក៏គ្រោងបន្ធូរបន្ថយបទប្បញ្ញត្តិផងដែរ ដើម្បីពន្លឿនកាជួសជុលឡើងវិញនូវផ្ទះចាស់ៗ ហើយអង្គភាពរដ្ឋាភិបាលថ្មីមួយត្រូវបានបង្កើតឡើងដើម្បីត្រួតពិនិត្យ និងស៊ើបអង្កេតឧក្រិដ្ឋកម្មទាក់ទងនឹងអចលនទ្រព្យ៕ប្រភព: Bloomberg៕
