អគារខ្ពស់ៗដែលបានសាងសង់ និងកំពុងសាងសង់នៅទីក្រុងភ្នំពេញ។ រូបភាព៖ ម៉ៃ វីរៈ
ដោយ វុត្ថា
ភ្នំពេញ៖ អ្នកជំនាញជាតិ និងអន្តរជាតិបានឲ្យដឹងថា ការវិនិយោគលើវិស័យអចលនទ្រព្យក្នុងប្រទេសកម្ពុជា ទទួលបានផលចំណេញច្រើនពីការវិនិយោគ(Return of Investment) ច្រើនជាងប្រទេសក្នុងតំបន់។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុនៅកម្ពុជា លោក ច្រឹក សុខនីម
ប្រធានសមាគមអ្នកវាយតម្លៃ និងភ្នាក់ងារអចលនវត្ថុនៅកម្ពុជា លោក ច្រឹក សុខនីម បានឲ្យដឹងតាមរយៈទូរស័ព្ទនៅថ្ងៃទី ៣ ខែឧសភា ឆ្នាំ ២០១៩ កន្លងមកថា មានកត្តាជាច្រើន ដែលធ្វើឲ្យមានការចំណេញច្រើន ដោយសារតែប្រទេសកម្ពុជាកំពុងអភិវឌ្ឍន៍ ដីនៅមានលទ្ធភាពទិញក្នុងការអភិវឌ្ឍន៍សាងសង់អគារខ្ពស់ ស្ថេរភាពនយោបាយ ភាពជឿជាក់លើវិស័យអចលនទ្រព្យ ព្រមទាំងសេដ្ឋកិច្ចក្នុងប្រទេសមានការរីកចម្រើន។
លោកបន្តថា “កត្តាទាំងអស់នេះ ហើយបានធ្វើឲ្យប្រជាជន និងជនបរទេសបានមកវិនិយោគនៅក្នុងប្រទេសកម្ពុជាកាន់់តែច្រើន” ។ លោកបន្តថា “តម្លៃអចលនទ្រព្យនៅក្នុងប្រទេសកម្ពុជា មានតម្លៃទាបជាងបណ្តាប្រទេសមួយចំនួននៅក្នុងតំបន់អាស៊ាន ក៏ជាកត្តាចម្បងមួយដែលទទួលបានផល និងមានលទ្ធភាពច្រើនក្នុងការវិនិយោគក្នុងវិស័យអចលនទ្រព្យ”។
-->
ការវិនិយោគលើវិស័យអចលនទ្រព្យនៅកម្ពុជាទទួលបានផលចំណេញចន្លោះ៧ទៅ ៨ភាគរយ ខណៈប្រទេសថៃទទួលផលចំណេញចន្លោះ៣ទៅ៤ភាគរយ ម៉ាឡេស៊ីចំណេញ៣ទៅ៤ភាគរយក្នុងមួយឆ្នាំជាដើម។
ជាមួយគ្នានេះលោក Jame Hodge អនុប្រធានក្រុមហ៊ុន CBRE Cambodiaបានឲ្យដឹងដែរថា វិស័យអចលនទ្រព្យនៅក្នុងប្រទេសកម្ពុជា ជាពិសេសរាជធានីភ្នំពេញ ជាមូលដ្ឋានគ្រឹះដ៏សំខាន់ក្នុងការជំរុញកំនើនសេដ្ឋកិច្ចកម្ពុជាក្នុងក្នុងរយៈពេលវែង ដោយពុំមានបញ្ហាអ្វីច្រើននោះទេ ដែលបណ្តាលឲ្យអ្នកវិនិយោគក្នុងវិស័យនេះ ទទួលបានផលច្រើន និងយូអង្វែង។
លោកបន្តថា “មានកត្តា៥ដែលអ្នកវិនិយោគ ទទួលបានផលចំណេញច្រើន លើការវិនិយោគលើវិស័យនេះ ពោលគឺតម្លៃដីធ្លីនៅទាប ប្រជាពលរដ្ឋវ័យក្មេងច្រើន សេដ្ឋកិច្ចមានការរីកចម្រើនខ្លាំង ការវិនិយោគក្នុងវិស័យអចលនទ្រព្យមានរយៈពេលវែង និងតម្រូវការអចលនទ្រព្យច្រើន ជាពិសេសលំនៅដ្ឋាន”។
លោកបញ្ជាក់ទៀតថា ក្នុងរយៈពេលប៉ុន្មាននេះ តម្រូវការអចលនទ្រព្យពីសំណាក់ប្រជាពលរដ្ឋខ្មែរមានការកើនឡើងខ្ពស់ និងច្បាប់វិនិយោគនៅក្នុងប្រទេសកម្ពុជាមានភាពងាយស្រួលដល់វិនិយោគិនបរទេស ដែលធ្វើឲ្យវិស័យអលចនទ្រព្យក្នុងប្រទេសកម្ពុជា មានការកើនឡើជាលំដាប់រហូតមកដល់ពេលនេះ បានធ្វើឲ្យអ្នកវិយោគក្នុងវិស័យនេះ ទទួលបានផលច្រើនជាងបណ្តាលប្រទេសមួយចំនួននៅក្នុងតំបន់អាស៊ាន។
លោក David Kim អគ្គនាយកក្រុមហ៊ុន Informax បានសម្តែងការយល់ស្របនឹងការលើកឡោះងខាងលើ ដោយលោកបានមានប្រសាសន៍ថា ការវិនិយោគលើវិស័យអចលនទ្រព្យនៅក្នុងប្រទេសកម្ពុជា ទទួលបានផលប្រយោជន៍ ដោយសារប្រទេសកម្ពុជាប្រើប្រាស់ប្រាក់ដុល្លារ ពន្ធលើវិស័យអចលនទ្រព្យនៅទាប ចំនួនប្រជាជនមានកំណើនលឿន លំហូរទុនវិនិយោគផ្ទាល់ពីបរទេសមានដំណើរល្អ និងការកើនឡើងនូវផលិតផលក្នុងស្រុក (GDP) មានស្ថានភាពល្អ ។
លោកបន្តថា “កត្តាទាំងនេះហើយ បានធ្វើឲ្យមានអ្នកវិនិយោគមកពីក្រៅស្រុក និងក្នុងស្រុកកើនឡើងខ្ពស់ក្នុងវិស័យអចលនទ្រព្យ ក្នុងប្រទេសកាន់តែច្រើនបែបនេះ”៕
