ដោយ រ៉ាណេត
ភ្នំពេញៈ ស្របពេលដែលវិស័យអចលនទ្រព្យនៅកម្ពុជា កំពុងតែមានការអភិវឌ្ឍន៍ខ្លាំង ក្រុមអ្នកជំនាញនិងថ្នាក់ដឹកនាំសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានអំពាវនាវឲ្យអ្នកប្រតិបត្តិក្នុងវិបស័យនេះ ត្រូវមានក្រមសីលធ៌ម និងគោរពវិជ្ជាជីវៈដើម្បីជំរុញឲ្យការអភិវឌ្ឍក្នុងវិស័យនេះធ្វើឡើងប្រកបដោយនិរន្តរភាព។
អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកស្រី តាំង ហួរបានមានប្រសាសន៍ឲ្យដឹងកាលពីល្ងាចថ្ងៃទី៦ ឧសភាកន្លងមក ដោយបានសម្ដែងនូវក្ដីព្រួយបារម្ភ ជាមួយនឹងការស្នើសុំក្រុមហ៊ុន ក៏ដូចជាភ្នាក់ងារអចលនវត្ថុទាំងអស់ចូលរួមគោរពតាមគោលការណ៍ច្បាប់ដែលបានកំណត់ ដើម្បីទទួលបានទំនុកពីសំណាក់អ្នកវិនិយោគ និងលើកកម្ពស់វិស័យអចលទ្រព្យនៅកម្ពុជា។
-->
លោកស្រីបានបន្តថា “យើងសាទរជាមួយនឹងវត្តមានក្រុមហ៊ុន ដែលកំពុងតែមានប្រតិបត្តិការក្នុងវិស័យអចលនទ្រព្យនៅកម្ពុជា ដូចពេលបច្ចុប្បន្ននេះ ប៉ុន្តែនៅក្នុងនោះក៏នៅមានអង្គភាព ឬក្រុមហ៊ុនមួយចំនួនតូចហាក់មិនទាន់បានបំពេញសិទ្ធិឱ្យបានត្រឹមត្រូវ និងស្របច្បាប់ក្នុងនាមជាភ្នាក់ងារលើវិស័យមួយនេះនៅឡើយ ហើយមិនទាន់អនុវត្តបាននូវក្រមសីលធម៌វិជ្ជាជីវៈនោះទេ។ ជាក់ស្ដែងដូចជាការពីពេលកន្លងទៅនេះ នៅខេត្តព្រះសីហនុ មានជនខិលខូចមួយចំនួនបានតាំងខ្លួនជាភ្នាក់ងារ និងជាក្រុមហ៊ុនលក់ដីខ្យល់ដែលមិនមែនជាកម្មសិទ្ធិរបស់ខ្លួនទៅឱ្យអតិថិជន រហូតកើតមានបញ្ហាវិវាទ ប្ដឹងផ្តល់ដល់ប្រព័ន្ធតុលាការ”។ លោកស្រីបន្តថា “ក្នុងនាមជាអ្នកតំណាងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា សូមស្នើដល់អ្នកដែលកំពុងតែប្រកបជំនួញនៅក្នុងវិស័យមួយនេះ ជាពិសេសភ្នាក់ងារអចលនទ្រព្យតែម្ដង ត្រូវអនុវត្តតាមការណែនាំរបស់ក្រសួង ក៏ដូចជាស្ថាប័នពាក់ព័ន្ធ ដើម្បីមានឧត្តមានភាព និងតម្លាភាពក្នុងការប្រកួតប្រជែងនៅលើទីផ្សារ”។
ជាការចូលរួមបង្កើនសមត្ថភាព និងចំណេះដឹងក្នុងនាមជាអ្នកជំនាញផ្នែកវិស័យអចលនទ្រព្យនៅកម្ពុជា តបតាមការចង់បានរបស់ក្រសួងរៀបចំដែនដីនគរូបនីយកម្ម និងសំណង់ និងក្រសួងសេដ្ឋកិច្ច និងហិរញ្ញវត្ថុ។ បច្ចុប្បន្ននេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាននិងកំពុងសហការជាមួយសាកលវិទ្យាសេដ្ឋកិច្ច និងហិរញ្ញវត្ថុ បង្កើតវគ្គបណ្តុះបណ្តាល ផ្តល់ចំណេះដឹងក្នុងនាមជាអ្នកជំនាញអចលនទ្រព្យបានចំនួន៣ជំនាន់រួចមកហើយ។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានទទួលស្គាល់ថា បច្ចុប្បន្ននៅក្នុងទីផ្សារអចលនទ្រព្យកម្ពុជា ពិតជាមានក្រុមហ៊ុន និងភ្នាក់ងារមួយចំនួនមិនបានធ្វើឡើងទៅតាមគោលការណ៍ដែលកំណត់ដោយច្បាប់នៅឡើយ ប៉ុន្តែវាមានចំនួនតិចតួចប៉ុណ្ណោះ។ លោកឧកញ៉ាបានបន្តថា បើទោះជាវាមានចំនួនតិចតួចពិតមែន ប៉ុន្តែវាពិតជាជះឥទ្ធិពល និងបង្កហានិភ័យនៅក្នុងវិស័យមួយនេះ»។
លោកឧកញ៉ាបានបញ្ជាក់ថា “បើចំពោះអ្នកវិនិយោគធំៗដែលមានបទពិសោធន៍ក្នុងវិស័យនេះហាក់មិនមានបញ្ហាជាមួយភ្នាក់ងារ ឬក្រុមហ៊ុនតូចៗដែលមិនស្របច្បាប់នោះទេ ដោយសារតែអ្នកវិនិយោគធំៗទាំងនោះក៏មានជំនាញ និងបទពិសោធន៍នៅក្នុងវិស័យមួយនេះរួចទៅហើយ”។លោកបន្តថា “អ្វីដែលប៉ះពាល់ និងកើតមានហានិភ័យខ្ពស់នោះ គឺអតិថិជនកម្រិតទាបដែលមិនធ្លាប់មានចំណេះដឹងក្នុងវិស័យនេះ ឧទាហរណ៍ ដូចជាអ្នកទិញគម្រោងលំនៅដ្ឋានកម្រិតទាប ដែលមិនមែនជាការអភិវឌ្ឍដោយក្រុមហ៊ុនស្របច្បាប់ អ្នកដែលទិញដីដោយមិនបានស្គាល់ពីសាវតារបស់ក្រុមហ៊ុន ក៏ដូចជាអ្នកទិញគម្រោងដីឡូតិ៍មួយចំនួនតូចជាដើម”។
ជាការចូលរួមចំណែកក្នុងការបញ្ចៀសហានិភ័យក្នុងវិស័យមួយនេះ លោកឧកញ៉ាក៏បានទទូចឱ្យបណ្តាភ្នាក់ងារដែលកំពុងតែមានសកម្មភាព គួរតែមានការសិក្សាបន្ថែមឱ្យបានច្បាស់ពាក់ព័ន្ធទៅនឹងចំណេះដឹង និងវិជ្ជាជីវៈក្នុងនាមជាអ្នកជំនាញ ជាពិសេសត្រូវមានភាពស្មោះត្រង់ជាមួយអតិថិជនរបស់ខ្លួន។ ដោយឡែកចំពោះអតិថិជនក៏គួរធ្វើការស្វែងយល់ឱ្យបានច្បាស់ពីសាវតារបស់ក្រុមហ៊ុនដែលភ្នាក់ងារ ជៀសវាងមានការខាតបង់ផលប្រយោជន៍ក្រោយពេលសម្រេចចិត្តទិញ៕
