ដោយៈ រ៉ាណេត
ភ្នំពេញៈ ក្រោយពីប្រមុខរាជរដ្ឋាភិបាល បានប្រកាសពិចារណាសាងសង់ព្រលានយន្តហោះនៅតាមបណ្តាខេត្តភូមិភាគឥសាន្ត ដែលជាប៉ូលសេដ្ឋកិច្ចទី៤របស់កម្ពុជា បានធ្វើឲ្យតំបន់នេះចាប់ផ្តើមកំរើកបណ្តើរៗហើយ ពិសេសវិស័យអចលនទ្រព្យកំពុងតែកើនឡើង។
ក្នុងចំណោមបណ្តាខេត្តចំនួន៤ រួមមានខេត្តក្រចេះ ស្ទឹងត្រែង មណ្ឌលគីរី និងខេត្តរតនៈគីរី រដ្ឋាភិបាលមានគំរោងសាងសង់ព្រលានយន្តហោះខ្នាតតូចចំនួន៣ នៅតាមខេត្តទាំងនោះរួមមាន ខេត្តមណ្ឌលគិរី (ធ្វើមុនគេ) រតនគិរី និងខេត្តស្ទឹងត្រែង។ ការប្រកាសសាងសង់ព្រលានយន្តហោះនៅខេត្តមណ្ឌលគិរី ដោយរដ្ឋមន្រ្តីក្រសួងទេសចរណ៍លោកថោង ខុនបានធ្វើឲ្យចរន្តនៃការទិញលក់ ក្នុងវិស័យអចលនទ្រព្យ ជាពិសេសការវិនិយោគលើការអភិវឌ្ឍផ្នែកវិស័យទេសចរណ៍កែច្នៃ បានចាប់ផ្តើមកម្រើកជាបណ្តើរៗហើយ ប៉ុន្តែអ្នកជំនាញព្រមានអ្នកវិនិយោគដីធ្លីខ្នាតតូចគួរប្រុងប្រយ័ត្ន។
-->
រដ្ឋលេខាធិការប្រចាំការ និងជាអ្នកនាំពាក្យអាកាសចរណ៍ស៊ីវិល លោក ជា អូន បានមានប្រសាសន៍តាមទូរស័ព្ទកាលពីរសៀលថ្ងៃទី៧ ខែឧសភា នេះថា គម្រោងសាងសង់ព្រលានយន្តហោះក្នុងតំបន់ខាងលើនេះ គឺកំពុងតែធ្វើការសិក្សាលម្អិត ប៉ុន្តែនៅមិនទាន់ច្បាស់ថា សាងសង់នៅក្នុងខេត្តមួយណាមុននៅឡើយនោះទេ។
លោកបន្តថា “ពេលនេះហេដ្ឋារចនាសម្ព័ន្ធខេត្ត ដែលស្ថិតនៅភូមិភាគឦសានរួមមានផ្លូវថ្នល់ជាដើម គឺត្រូវបានធ្វើការក៏សាងឱ្យមានភាពល្អប្រសើររួចហើយ ដើម្បីងាយស្រួលក្នុងការធ្វើដដំណើរ ប៉ុន្តែវាក៏នៅតែមានឧបសគ្គ ដែលអាចរាំងស្ទះដល់ចំណាប់អារម្មណ៍របស់បណ្តាអ្នកវិនិយោគនៅឡើយ ដោយសារតែចម្ងាយផ្លូវឆ្ងាយ ត្រូវចំណាយពេលវេលាយូរក្នុងពេលធ្វើដំណើរ និងប្រឈមហានិភ័យភ្សេងៗ”។ លោកបន្តថា “ប្រសិនបើនៅក្នុងតំបន់ភាគឦសាន មានព្រលានយន្តហោះមួយរយភាគរយ ដែលអាចធ្វើដំណើរតាមផ្លូវអាកាសបាន នោះទាំងកំណើនភ្ញៀវទេសចរជាតិ អន្តរជាតិ ក៏ដូចជាបណ្តាអ្នកវិនិយោគនានា នឹងងាកទៅកាន់តំបន់ខាងលើនេះ ហើយថែមទាំងគៀងគរនូវចំនួនប្រជាជនឱ្យចូលទៅរស់នៅបន្ថែមទៀតបានច្រើន”។
លោកគង់ វិមាន ប្រធានមន្ទីរទេសចរណ៍ខេត្តមណ្ឌលគីរី ដែលស្ថិតនៅក្នុងតំបន់ប៉ូលសេដ្ឋកិច្ចទី៤ បានមានប្រសាសន៍ប្រាប់តាមរយៈទូរស័ព្ទកាលពីពេលកន្លងទៅនេះថា បច្ចុប្បន្ននេះហេដ្ឋារចនាសម្ព័ន្ធ នៅក្នុងខេត្តគឺមានការអភិវឌ្ឍន៍ច្រើន ជាពិសេសផ្នែកសំណង់សម្រាប់ផ្គត់ផ្គង់លើផ្នែកស្នាក់នៅ ដូចជា សំណង់លំនៅដ្ឋាន សណ្ឋាគារ ផ្ទះសំណាក់ ភោជនីដ្ឋាន ក៏ដូចជាការបង្កើតជារមណីយដ្ឋានកម្សន្តបែបធម្មជាតិកែច្នៃផងដែរ»។ លោកបានបញ្ជាក់ទៀតថា សព្វថ្ងៃនេះ នៅក្នុងខេត្តមណ្ឌលគីរី គឺមានប្រជាជនរស់នៅជាង៨ម៉ឺននាក់ មានសណ្ឋាគារធំៗ សម្រាប់ផ្គត់ផ្គង់ភ្ញៀវទេសចរជាតិ អន្តរជាតិចំនួន៨ ផ្ទះសំណាក់មានចំនួន៤៥ សរុបស្មើនឹងប្រមាណ១១៥១បន្ទាប់។
អ្នកវិភាគសេដ្ឋកិច្ចកម្ពុជា លោក ង៉ែត ជូ បានមានប្រសាសន៍ថា ប្រសិនបើគម្រោងសាងសង់ព្រលានយន្តហោះខ្នាតតូច នៅក្នុងតំបន់ភាគខាងឦសានត្រូវបានធ្វើឡើង គឺពិតជាមានផលចំណេញច្រើនទាំងអ្នកវិនិយោគ ទាំងប្រជាពលរដ្ឋក្នុងតំបន់អភិវឌ្ឍ ក៏ដូចជារាជរដ្ឋាភិបាលផងដែរ។ លោកបានបន្តថា ខេត្តដែលស្ថិតនៅក្នុតំបន់ប៉ូលសេដ្ឋកិច្ចពិសេសនេះ ភាគច្រើនគឺមានភាពល្អប្រសើរទៅលើវិស័យអេកូរទេសចរណ៍ និងវិស័យកសិឧស្សាហកម្ម។ ដូច្នេះចំពោះការបង្កើតឱ្យមានព្រលានយន្តហោះខ្នាតតូច ក្នុងតំបន់គឺបានជួយសម្រួលដល់ការដឹកជញ្ជូនទាំងផលិតផលកសិផល ក៏ដូចជាបង្កើនភាពងាយស្រួលដល់ការអូសទាញផ្នែកទេសចរណ៍។
លោកបន្តថា “ជាទូទៅនៅពេលដែលមានដំណឹងនិយាយពីអភិវឌ្ឍ នៅតំបន់ណា តំបន់នោះ គឺតែងតែមានភាពពុះកញ្ច្រោលទៅលើវិស័យទិញ លក់ដីធ្លី ដែលចំណុចនេះ លោកបានគ្រើនរំលឹកដល់អ្នក ដែលមានបំណងវិនិយោគខ្នាតតូចមួយចំនួនថា ការសិក្សា ក៏ដូចជាការសាងសង់ព្រលានយន្តហោះ គឺត្រូវចំណាយពេលយូរឆ្នាំ ដូច្នេះការវិនិយោគដីធ្លីគួររង់ចាំមើលសកម្មភាពអភិវឌ្ឍជាមុន ទើបសម្រេចចិត្តជៀសវាងទង្វើកាប់បំពង់រង់ចាំទឹកភ្លៀង”។
លើកឡើងស្រដៀងគ្នានេះ ប្រធានសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី ក៏បានមានប្រសាសន៍ផងដែរថា ជារឿងដែលល្អបំផុតសម្រាប់វត្តមាន ព្រលានយន្តហោះ ដែលអាចជួយជំរុញកំណើនសេដ្ឋកិច្ចក្នុងតំបន់ ក៏ដូចជាសេដ្ឋកិច្ចជាតិមានការរីកចម្រើនតាមរយៈការទទួលបានកំណើនភ្ញៀវទេសចរ ក៏ដូចជាវិនិយោគលើវិស័យពាក់ព័ន្ធនានាផងដែរ។ លោកបានបន្តទៀតថា នៅពេលមានព្រលានយន្តហោះ គឺធ្វើឱ្យមានលំហូរចូលនៃកំណើនប្រជាជន ក៏ដូចជាមានការកើនឡើងនូវចំនួនភ្ញៀវទេសចរ ដែលចាំបាច់តម្រូវឱ្យការផ្គត់ផ្គង់ដូចជាវិស័យលំនៅដ្ឋាន សណ្ឋាគារ ភោជនីយដ្ឋានជាដើម។
លោកបន្តថា “ប៉ុន្តែការកើនឡើង និងការអភិវឌ្ឍនេះ គឺមានត្រឹមតំបន់ដែលពាក់ព័ន្ធនឹងការអភិវឌ្ឍប៉ុណ្ណោះ ដូច្នេះចំពោះអ្នកដែលវិនិយោគ ក៏ដូចជាអ្នកដែលមានបំណងធ្វើជំនួញដីធ្លីក៏គួរពិចារណា និងសិក្សាឱ្យបានច្បាស់លាស់មុនពេលសម្រចចិត្តទិញតំបន់ណាមួយជៀសវាងមានហានិភ័យ”៕
