ដោយ: សហសេវិក
អន្តរជាតិ: ក្រុមហ៊ុនអភិវឌ្ឍន៍អចលនទ្រព្យ Arada របស់ប្រទេសអេមីរ៉ាតអារ៉ាប់រួម គ្រោងទិញភាគហ៊ុនភាគច្រើននៅក្នុងគម្រោងអភិវឌ្ឍន៍អចលនទ្រព្យពហុមុខងារ Thameside West ក្នុងទីក្រុងឡុងដ៍នៃប្រទេសអង់គ្លេស។
យោងតាមសេចក្តីថ្លែងការណ៍បានឲ្យដឹងថា ក្រុមហ៊ុន Arada នឹងកាន់កាប់ភាគហ៊ុនចំនួន៨០ភាគរយក្នុងគម្រោង Thameside West ស្ថិតនៅតាមបណ្តោយមាត់ទន្លេនៅភាគខាងកើតនៃទីក្រុងឡុងដ៍។
គម្រោងនេះគ្រោងចំណាយទុនវិនិយោគសរុបចំនួន២,៥ពាន់លានផោន (ប្រមាណ៣,២៩ពាន់លានដុល្លារអាមេរិក) និងមានលំនៅឋានយ៉ាងហោចណាស់ចំនួន៥.០០០យូនីត។
-->
ក្រុមហ៊ុន Arada បានគូសបញ្ជាក់ថា ដំណាក់កាលដំបូងនៃគម្រោងនេះត្រូវបានគេរំពឹងថានឹងផ្គត់ផ្គង់ផ្ទះចំនួន១.០០០យូនីត ដោយការសាងសង់ត្រូវបានគេរំពឹងថា នឹងចាប់ផ្តើមនៅឆ្នាំ២០២៧ខាងមុខ។
លោក Sultan bin Ahmed Al Qasimi ប្រធានក្រុមហ៊ុន Arada បានមានប្រសាសន៍ឱ្យដឹងថា ការឈានជើងចូលរបស់យើងទៅក្នុងទីផ្សារនេះ ផ្អែកលើទំនុកចិត្តដ៏រឹងមាំរបស់យើងចំពោះទីក្រុងឡុងដ៍ និងភាពទាក់ទាញជាទីក្រុងឈានមុខគេមួយរបស់ពិភពលោក។
ការទិញយកភាគហ៊ុនក្នុងគម្រោង Thameside West បានបង្កើនផលបត្រលំនៅឋាននៅទីក្រុងឡុងដ៍របស់ក្រុមហ៊ុន Arada ដល់ចំនួន១៥.០០០យូនីត ដែលជាផ្នែកមួយនៃយុទ្ធសាស្ត្រដើម្បីបង្កើនគម្រោងអភិវឌ្ឍន៍លំនៅឋាននៅទីក្រុងឡុងដ៍របស់ខ្លួនដល់ចំនួន៣០.០០០យូនីតក្នុងរយៈពេល៣ឆ្នាំខាងមុខ៕ប្រភព: Reuters៕
