ដោយ: គង់ លាងហួរ
អន្តរជាតិ: តម្លៃអាផាតមុិននៅក្នុងទីក្រុងហូជីមិញនៃប្រទេសវៀតណាមបានកើនឡើងជិត៣ដងក្នុងរយៈពេលមួយទសវត្សរ៍កន្លងមកនេះ ដោយសារតម្រូវការមានស្ថិរភាព ហើយការផ្គត់ផ្គង់ថ្មីនៅមានកំណត់។ នេះបើយោងតាមវេទិកាចុះបញ្ជីអចលនទ្រព្យ Batdongsan។
យោងតាមរបាយការណ៍ដែលចេញផ្សាយដោយវេទិកាចុះបញ្ជីអចលនទ្រព្យ Batdongsan បានឱ្យដឹងថា តម្លៃអាផាតមុិនជាមធ្យមបានកើនឡើងពី៣១លានដុង(១.១៧៥ដុល្លារអាមេរិក)ក្នុងមួយម៉ែត្រការ៉េ ក្នុងឆ្នាំ២០១៥ ដល់៩២លានដុងក្នុងមួយម៉ែត្រការ៉េនៅឆ្នាំនេះ។
អត្រាកំណើនខាងលើនេះស្ថិតនៅលំដាប់លេខរៀងទីពីរ បន្ទាប់ពីតម្លៃដីធ្លី ដែលបានកើនឡើង៤,៨ដងក្នុងរយៈពេលមួយទសវត្សរ៍កន្លងមក។នេះបើយោងតាមការដកស្រង់ចុះផ្សាយដោយសារព័ត៌មាន Vnexpress។
-->
គិតត្រឹមត្រីមាសទី៣ ឆ្នាំ២០២៥ តម្លៃអាផាតមុិនប្រភេទទី២ ជាមធ្យម(Second-hand)នៅក្នុងសង្កាត់លេខ១ មានទំហំទឹកប្រាក់ចំនួន៤១៣លានដុងក្នុងមួយម៉ែត្រការ៉េ។
ចំណែក តម្លៃអាផាតមុិនថ្មី ដែលមានទំហំទឹកប្រាក់ចាប់ពី២០០លានដុង ដល់៥០០លានដុង កំពុងហក់ឡើងថ្លៃក្នុងអត្រាចន្លោះពី១០ភាគរយទៅ៣០ភាគរយជារៀងរាល់ឆ្នាំ។
លោក Nguyen Quoc Anh អនុប្រធានក្រុមហ៊ុន Batdongsan បានមានប្រសាសន៍ឱ្យដឹងថា កង្វះនៃការផ្គត់ផ្គង់អាផាតមុិន និងភាពរឹងមាំនៃតម្រូវការបន្តជំរុញឱ្យតម្លៃអាផាតមុិនក្នុងទីក្រុងហូជីមិញកើនឡើង។
លោកបន្ថែមថា ទីក្រុងហូជីមិញជាមជ្ឈមណ្ឌលប្រមូលផ្តុំដោយសកម្មភាពពាណិជ្ជកម្ម ហិរញ្ញវត្ថុ និងសេវាកម្ម ព្រមទាំងកម្លាំងពលកម្ម និងហេដ្ឋារចនាសម្ព័ន្ធដឹកជញ្ជូនសាធារណៈយ៉ាងច្រើន។ ការណ៍នេះធ្វើឱ្យតម្រូវការលំនៅឋានក្នុងទីក្រុងហក់ឡើងខ្ពស់៕ប្រភព: Vnexpress៕
