អ្នកជំនាញប្រាប់ក្បួនរកចំណូលដល់ភ្នាក់ងារអចលនទ្រព្យជាជាងដេកចាំប្រាក់ខែ

May 11, 2019

ដោយៈ រ៉ាណេត

ភ្នំពេញៈ ភាគច្រើនបុគ្គលិកដែលចូលបម្រើការងារនៅក្នុងក្រុមហ៊ុន ឬស្ថាប័នណាមួយ គឺតែងតែរំពឹងទៅលើការទទួលបានប្រាក់ចំណូលជាបៀវត្សរ៍ប្រចាំខែ តបទៅនឹងការខិតខំបញ្ចេញកម្លាំងពលកម្ម ប៉ុន្តែសម្រាប់ការបម្រើការងារផ្នែកវិស័យអចលនទ្រព្យក្នុងនាមជាភ្នាក់ងារវិញ ត្រូវបានអ្នកជំនាញបញ្ជាក់ប្រាប់ថា ការដេកទន្ទឹងរង់ចាំទទួលតែប្រាក់ខែគឺមិនមានភាពរីកចម្រើននោះទេ ប៉ុន្តែបើចង់ទទួលបានចំណូលច្រើន គឺត្រូវតែពង្រឹងសមត្ថភាពក្នុងការលក់ ទើបអាចទទួលបានកម្រៃជើងសារច្រើន។

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ

-->

ស្ថាបនិក និងជាអគ្គនាយកក្រុមហ៊ុនអចលនទ្រព្យអន្តរជាតិ Century21 Dream Property លោក គាម សៀកឡុង បានមានប្រសាសន៍ប្រាប់តាមទូរស័ព្ទ កាលពីព្រឹកថ្ងៃទី១១ ខែឧសភា ឆ្នាំ២០១៩ នេះថា ជាផ្នត់គំនិតទូទៅ ចំពោះការចូលបម្រើការងារនៅក្នុងក្រុមហ៊ុនមួយ គឺគេតែងគិតទៅលើប្រាក់ខែ ប៉ុន្តែចំពោះការងារនៅក្នុងវិស័យអចលនទ្រព្យគឺមានភាពខុសគ្នាពីការងារទូទៅ ដោយសារតែនៅក្នុងការបំពេញភារកិច្ចជាភ្នាក់ងារអាចទទួលបានកម្រៃជើងសារតបទៅនឹងលទ្ធផលរបស់ពួកគេ។

លោកបានបន្តទៀតថា “ការបំពេញតួនាទីជាភ្នាក់ងារលក់អចលនវត្ថុ ប្រៀបបានទៅនឹងការធ្វើជំនួញផ្ទាល់ខ្លួនយ៉ាងដូច្នោះ ហើយអ្វីដែលជាភាពល្អប្រសើរចំពោះពួកគាត់ គឺពួកគាត់មានក្រុមហ៊ុនស្រាប់រួចទៅហើយ គ្រាន់តែគាត់ខំប្រឹងលើតួនាទីរបស់គាត់ដើម្បីទទួលបានចំណូលជាការស្រេច”។ លោកបន្ថែមថា “បើបុគ្គលិកផ្នែកនេះខំប្រឹងកាន់តែខ្លាំង ចំណូលដែលទទួលបានកាន់តែច្រើន”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ឲ្យដឹងផងដែរថា តាមការសង្កេតរបស់លោក ភាគច្រើនអ្នកដែលចូលបម្រើការងារក្នុងនាមជាភ្នាក់ងារអចនទ្រព្យ តែងប្រាថ្នាចង់បានចំណូលជាប្រាក់បៀវត្សរ៍ប្រចាំខែជាជាងការទទួលបានកម្រៃជើងសារ ដែលទទួលបានពីកិច្ចខិតខំប្រឹងប្រែងក្នុងការលក់របស់ខ្លួន។

លោកបានបន្តថា “តាមពិតការទន្ទឹងរង់ចាំទទួលចំណូលពីប្រាក់ខែ វាប្រៀបបានទៅនឹងការដាក់សម្ពាធ និងបិទឱកាសរបស់ខ្លួនយ៉ាងដូច្នោះ។ ភាពជាក់ស្ដែងនៅក្នុងវិស័យអចលនទ្រព្យ ការងារជាភ្នាក់ងារលក់ អាចមានលទ្ធភាពទទួលបានប្រយោជន៍ និងចំណូលច្រើនជាងប្រាក់ខែដោយឥតកំណត់”។

ឧទាហរណ៍ ប្រសើនបើគាត់ខំប្រឹងលក់អចលនវត្ថុលើគម្រោង១ ដែលមានតម្លៃរហូតដល់១លានដុល្លារ ហើយកម្រៃជើងសាររបស់គាត់ទទួលបាន៣ភាគរយ នោះមានន័យថា គាត់នឹងទទួលបានចំណូលពីការលក់រហូតដល់៣ម៉ឺនដុល្លារឯណោះ ដូច្នេះបើប្រៀបទៅនឹងប្រាក់ខែវិញ តើគាត់ត្រូវធ្វើការរយៈពេលប៉ុន្មានខែ ទើបអាចទទួលបានចំណូលខាងលើនេះ។

ប្រធានសមាគមរូបនេះបានបញ្ជាក់ទៀតថា នៅក្នុងបណ្តាប្រទេសជឿនលឿន ដូចជា សិង្ហបុរី ហុងកុង តៃវ៉ាន់ ក៏ដូចជាប្រទេសជប៉ុនជាដើម បុគ្គលិកជាភ្នាក់ងារអចលនទ្រព្យពួកគេមិនទទួលយកប្រាក់ខែនោះទេ ប៉ុន្តែពួកគេព្យាយាមបង្កើតទំនាក់ទំនងចងភ្ជាប់បណ្តាញឱ្យបានច្រើន ពង្រឹងសមត្ថភាពក្នុងការលក់ ដើម្បីអាចទទួលបានចំណូលពីកម្រៃជើងសាររបស់ពួកគេ៕