ដោយ: សហសេវិក
អន្តរជាតិ: តម្រូវការខុនដូនៅទីក្រុងម៉ានីលនៃប្រទេសហ្វីលីពីនកើនឡើង១៩ភាគរយក្នុងត្រីមាសទី១ ឆ្នាំ២០២៦ ដែលជំរុញដោយអ្នកទិញផ្ទះក្នុងគោលបំណងរស់នៅពិតប្រាកដ និងការលើកទឹកចិត្តរបស់បណ្តាអ្នកអភិវឌ្ឍន៍។
យ៉ាងណាមិញ ក្រុមហ៊ុនប្រឹក្សាអចលនទ្រព្យ Leechiu Property Consultants (LPC) បានលើកឡើងថា ការកើនឡើងនេះឆ្លុះបញ្ចាំងពីការងើបឡើងវិញរយៈពេលខ្លី (seasonal rebound) ជាជាងការងើបឡើងវិញពេញលេញនៃទីផ្សារ។
ការទិញយកខុនដូសរុបនៅរដ្ឋធានីម៉ានីលបានកើនឡើងដល់ចំនួន៧.៧៣២យូនីតក្នុងរយៈពេល៣ខែ រាប់ចាប់ពីខែមករាដល់ខែមីនា ឆ្នាំ២០២៦ បន្ទាប់ពីបានធ្លាក់ចុះយ៉ាងគំហុក នៅក្នុងត្រីមាសទី៤ ឆ្នាំមុន។
បើទោះបីជាទីផ្សារបង្ហាញភាពប្រសើរឡើងយ៉ាងណាក្តី LPC ក្រុមហ៊ុនប្រឹក្សាអចលនទ្រព្យ Leechiu Property Consultants បានអះអាងថា ទីផ្សារនៅតែងាយរងគ្រោះ
ដោយសារផលប៉ះពាល់ពីកត្តាខាងក្រៅ។
ហានិភ័យសកល រួមទាំងភាពតានតឹងខាងភូមិសាស្ត្រនយោបាយនៅមជ្ឈិមបូព៌ា អាចជំរុញឱ្យមានអតិផរណា និងការដំឡើងអត្រាការប្រាក់ និងធ្វើឱ្យលំហូរប្រាក់បញ្ញើពីពលករហ្វីលីពីននៅក្រៅប្រទេសថយចុះ។
សកម្មភាពរបស់បណ្តាវិនិយោគិននៅតែមានសភាពស្ងប់ស្ងាត់ ដោយផលចំណេញពីការជួល (Rental Yields) មានអត្រា៣,៨ភាគរយសម្រាប់ខុនដូថ្មី និងអត្រា៤,៦ភាគរយសម្រាប់ខុនដូប្រភេទទី២ (second-hand)។ អត្រាទាំងនេះមិនទាន់គ្រប់គ្រាន់ដើម្បីទូទាត់ថ្លៃដើមខ្ពស់ នៅពេលអ្នកវិនិយោគទិញខុនដូនោះទេ។
ចំណាប់អារម្មណ៍របស់បណ្តាវិនិយោគិននៅតែបន្តធ្លាក់ចុះ ខណៈអត្រាផលចំណេញពីការជួលខុនដូមានកម្រិតទាប ដោយសារតម្លៃជួលខុនដូមានស្ថេរភាព ប៉ុន្តែតម្លៃខុនដូសម្រាប់លក់នៅតែមានកម្រិតខ្ពស់។
ជាងនេះទៅទៀត ទីផ្សារនៅតែបន្តជួបប្រទះស្ថានភាពនៃការផ្គត់ផ្គង់ខុនដូតម្រូវការ ដោយត្រូវចំណាយរយៈពេល៣១ខែ ដើម្បីលក់ខុនដូឱ្យអស់ពីស្តុក ដោយសន្មតថា ពុំមានការផ្គត់ផ្គង់ខុនដូថ្មីបន្ថែមទៀត ក្នុងកំឡុងពេលនេះ។
តម្រូវការខុនដូផ្នែកមធ្យម (mid-market segment) នៅតែមានភាពធន់ ខណៈដែលអ្នកទិញលំនៅឋានលំដាប់ខ្ពស់នៅតែមានការប្រុងប្រយ័ត្ន និងរង់ចាំមើលស្ថានការណ៍។
លោក Roy Golez នាយកទទួលបន្ទុកផ្នែកស្រាវជ្រាវ ប្រឹក្សាយោបល់ និងវាយតម្លៃនៅក្រុមហ៊ុនប្រឹក្សាអចលនទ្រព្យ Leechiu Property Consultants បានអះអាងថា ដោយយោងលើហានិភ័យសកល និងភាពតានតឹងភូមិសាស្ត្រនយោបាយ អ្នកវិនិយោគនឹងរក្សាជំហរប្រុងប្រយ័ត្ន។
ជាមួយគ្នានេះ ពួកគេនឹងវាយតម្លៃយ៉ាងដិតដល់នូវផលប៉ះពាល់ចំពោះខ្សែសង្វាក់ផ្គត់ផ្គង់ រក្សាសាច់ប្រាក់ងាយស្រួល និងពន្យារពេលការពង្រីកអាជីវកម្ម រហូតដល់ស្ថានការណ៍មានស្ថិរភាពវិញ៕ប្រភព: BusinessWorld៕
