ដោយ Donald Lee
ភ្នំពេញៈ ក្រសួងវប្បធម៌ និងទេសចរណ៍ចិន បានចេញសេចក្តីជូនដំណឹងស្តីពីសុវត្ថិភាពចរាចរណ៍សម្រាប់ភ្ញៀវទេសចរចិន ដែលគ្រោងនឹងទៅទស្សនាសហរដ្ឋអាមេរិកនាថ្ងៃម្សិលម៉ិញនេះ។
ក្រសួងបានកត់សម្គាល់ថា មានការបាញ់ប្រហារជាបន្តបន្ទាប់នៅអាមេរិក ការលួចប្លន់ និងបានណែនាំដល់ភ្ញៀវទេសចរចិន ឲ្យពិនិត្យមើលយ៉ាងពេញលេញអំពីគ្រោះថ្នាក់ដែលពាក់ព័ន្ធ នឹងការធ្វើដំណើរទៅកាន់ប្រទេសអាមេរិក។
ក្រសួងការបរទេសចិនបានអះអាងថា កាលពីពេលថ្មីៗនេះទីភ្នាក់ងារអនុវត្តច្បាប់របស់សហរដ្ឋអាមេរិក បានធ្វើឲ្យមានការរំខានដល់ពលរដ្ឋចិន ដែលទៅធ្វើទស្សនាសហរដ្ឋអាមេរិកម្តងហើយម្តងទៀតតាមរយៈការត្រួតពិនិត្យការចេញចូល និងការធ្វើសំភាសន៍ម្តងម្នាក់ៗ និងមធ្យោបាយផ្សេងទៀតៗ។
ក្រសួងការបរទេស ស្ថានទូត និងស្ថានកុងស៊ុលចិននៅសហរដ្ឋអាមេរិកបានក្រើនរំលឹកដល់ប្រជាជនចិន និងស្ថាប័នដែលទទួលបានមូលនិធិពីចិន នៅក្នុងសហរដ្ឋអាមេរិកដើម្បីបង្កើនការយល់ដឹងអំពីសន្តិសុខ និងយកចិត្តទុកដាក់បន្ថែមទៀត។
អ្នកវិភាគមួយចំនួនបានកត់សម្គាល់ថា ការប្រឹក្សាយោបល់ផ្នែកទេសចរណ៍គឺជាផ្នែកមួយនៃការវាយប្រហារសងសឹកដោយរដ្ឋាភិបាលចិន ក្នុងការឆ្លើយតបទៅនឹងសង្គ្រាមពាណិជ្ជកម្ម ខណៈដែលសង្គ្រាមពាណិជ្ជកម្មរវាងសហរដ្ឋអាមេរិក និងចិនបានកើតឡើងកាលពីខែមុន។
លោកប្រធានាធិបតីអាមេរិក ដូណាល់ ត្រាំ (Donald Trump) បានដាក់បញ្ចូលក្រុមហ៊ុន Huawei ក្នុងបញ្ជីខ្មៅ និងហាមឃាត់ក្រុមហ៊ុនអាមេរិក មិនឱ្យធ្វើការជាមួយក្រុមហ៊ុននេះ។
ក្រុមអ្នកវិភាគសេដ្ឋកិច្ចមួយចំនួនចាត់ទុកថា ការដាក់បញ្ជីខ្មៅនេះស្មើនឹង”ការកាត់ទោសប្រហារជីវិត” សម្រាប់ក្រុមហ៊ុនបច្ចេកវិទ្យាយក្ស ដែលមានមូលដ្ឋាននៅទីក្រុង Shenzhen៕
