ដោយ៖ គង់ សូរិយា
ភ្នំពេញ៖ ធនាគារពិភពលោកបានទទួលស្គាល់ការរីកចម្រើន នៃទីក្រុងភ្នំពេញដែលបានរួមចំណែកបង្កើនឳកាសការងារ និងកាត់បន្ថយភាពក្រីក្រ ប៉ុន្តែធនាគារនេះបានលើកឡើងបញ្ហាប្រឈមជាច្រើន ដែលត្រូវដោះស្រាយ។
ធនាគារពិភពលោក៖ ក្រុងភ្នំពេញរីកចម្រើន តែមានបញ្ហាប្រឈមជាច្រើនដែលត្រូវដោះស្រាយ
យោងតាមការសិក្សាថ្មីមួយ របស់ធនាគារពិភពលោកស្តីពី ការអភិវឌ្ឍទីក្រុងភ្នំពេញ ដែលបានចេញផ្សាយនៅថ្ងៃទី២០ ធ្នូនេះបានឲ្យដឹងថា ការរីកលូតលាសដ៏ឆាប់រហ័សនៃទីក្រុងភ្នំពេញ ក្នុងរយៈពេល១០ឆ្នាំចុងក្រោយនេះ ពិតជាមានរួមចំណែកយ៉ាងច្រើន ក្នុងការបង្កើតឳកាសការងារ ប៉ុន្តែទន្ទឹមនឹងការអភិវឌ្ឍទីក្រុងនេះ មានបញ្ហាប្រឈមជាច្រើន ក្នុងការផ្តល់សេវាកម្មមូលដ្ឋាន ដែលរួមមានប្រព័ន្ឋបង្ហូរទឹកស្អុយ ស្ថានីយ៍កែច្នៃទឹកស្អុយ សេវាកម្មសាធារណៈ ការគ្រប់ គ្រងកាកសំណល់រឹង ការគ្រប់គ្រង និងការផ្តល់ហិរញ្ញប្បទានលើការរៀបចំទីក្រុង ការពង្រឹងអភិបាលកិច្ច និងនិងការគ្រប់គ្រងលើការអភិវឌ្ឍហេដ្ឋារចនាសម្ព័ន្ឋជារឿងចាំបាច់។
ឆ្លើយតបនឹងកង្វល់នេះ ធនាគារពិភពលោកបានផ្តល់អនុសាសន៍ចំនួន៤ចំណុច ដើម្បីអភិវឌ្ឍន៍ទីក្រុងនេះប្រកបដោយភាពសុខដុម ដូចជា ត្រូវកែលំអរ ស្ថាប័ន និងអភិបាលកិច្ច ដើម្បីឲ្យទីក្រុងអាចអភិវឌ្ឍន៍ទៅបាន ប្រកបដោយភាពសុខដុម និងមានប្រសិទ្ឋិភាពជាងមុន។ ត្រូវកែលំអរផែនការរៀបចំទីក្រុង និងការ អនុវត្តន៍ផែនការតាមរយៈ ការបង្កើតបទដ្ឋានគតិយុត្តិ ក្របខ័ណ្ឌច្បាប់ និងពង្រឹងផែនការរៀបចំទីក្រុងដែលមានស្រាប់។ ត្រូវវិនិយោគលើហេដ្ឋារចនាសម្ព័ន្ឋទីក្រុង ប្រកបដោយនិរន្តរភាពដើម្បីលើកកំពស់ជីវភាពរស់នៅ និងការប្រកួតប្រជែងនិងត្រូវធានាថាការរៀបចំទីក្រុង ត្រូវគិតគូរឲ្យបានគ្រប់ជ្រុងជ្រោយ ដើម្បីជៀសវាងវិសមភាព។
ទីក្រុងភ្នំពេញបានរៀបចំផែនការមេរួចហើយ សម្រាប់ឆ្នាំ២០១៥ ២០៣៥ ដែលបាននិងកំពុងអនុវត្តន៍ ប៉ុន្តែអ្នកជំនាញបានមើលឃើញថា ការអភិវឌ្ឍន៍ទីក្រុងនេះតាមផែនការមេមិនបានធ្វើដោយរលូននៅឡើយទេ។
យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់កាលពីឆ្នាំ២០១៣បានរកឃើញថា តង់ស៊ីតេប្រជាពលរដ្ឋរស់នៅក្រុងភ្នំពេញមានចំនួន២៨០០នាក់ក្នុងមួយគីឡូម៉ែត្រ ខណៈទីក្រុងបាងកកមាន៨០០០នាក់ និងទីក្រុងហូជីម៉ិញ ប្រទេសវៀតណាមមាន៤០០០នាក់ក្នុងមួយគីឡូម៉ែត្រ៕
