ដោយ គង់ សូរិយា
ភ្នំពេញ៖ មជ្ឈមណ្ឌលពាណិជ្ជកម្ម Elysee តម្លៃ៥០០លានដុល្លារអាមេរិក ដែលវិនិយោគដោយក្រុមហ៊ុន OCIC នឹងបើកស្វាគមន៍អតិថិជនតំបូងនៅដើមឆ្នាំ២០១៨ខាងមុខនេះ។
ប្រធានគ្រប់គ្រងគំរោង Elysee នៃក្រុមហ៊ុន OCIC លោករ៉ា បូរីវុឌ្ឈបានថ្លែងឲ្យដឹងតាមទូរស័ព្ទនាព្រឹកថ្ងៃទី២៦ ធ្នូនេះថា គំរោង Elysee នឹងបញ្ចប់ដំណាក់កា លទី១ ដែលមានផ្ទះសរុបចំនួន១១០ផ្ទះ នឹងបើកទ្វារស្វាគមន៍អតិថិជនៅដើមឆ្នាំ២០១៨ខាងមុខនេះ។ ចំណែកគំរោងដំណាក់កាលទី២ ដែលមានផ្ទះសរុបចំនួន១២៥ផ្ទះ នឹងបញ្ចប់នៅចុងឆ្នាំ២០១៩ខាងមុខ។
លោកបន្តថា “គំរោងនេះក៏បាន និងកំពុងស្វែងរកដៃគូវិនិយោគបន្តនូវដំណាក់កាលបន្តទៀត ហើយគំរោងថ្មីនេះមានផ្ទះសរុបចំនួន១៤៥ និងសណ្ឋាគារចំនួនពីរ។លោកបន្តថា “ប្រសិនជាគិតពីតម្លៃអាគារ គំរោងនេះចំណាយអស់ទឹកប្រាក់ប្រមាណជាង២០០លានដុល្លារអាមេរិក ដោយមិនទាន់គិតបញ្ចូលតម្លៃដីនៅឡើយ។
តម្លៃដីនៅទីតាំងនេះ ត្រូវបានអ្នកជំនាញអចលនទ្រព្យនានាផ្តល់តម្លៃចន្លោះពី៤០០០ទៅ៥០០០ដុល្លារក្នុងមួយម៉ែត្រការ៉េ ដូច្នេះប្រសិនជាគិតថ្លៃដីប្រមាណ៧ហិកតានៃគំរោងនេះ តម្លៃដីនៃគំរោងនេះមានទឹកប្រាក់ជាង៣០០លានដុល្លារអាមេរិកបន្ថែមទៀត ដែលធ្វើឲ្យគំរោងនេះទាំងមូលមានតម្លៃរហូតដល់ជាង៥០០លានដុល្លារអាមេរិក។
លោក រ៉ា បូរីវុឌ្ឈ បានបន្តថា គំរោង Elysee អាចចាត់ទុកជាមជ្ឈមណ្ឌលពាណិជ្ជកម្មចម្រុះ ព្រោះវាមានផ្សារទំនើបក្រោមដី អាគារការិយាល័យ សណ្ឋាគារ ហើយអតិថិជនទិញផ្ទះក្នុងគំរោងនេះ មួយចំនួនបានកែច្នៃលំនៅដ្ឋានរបស់ពួកគេ អាអាផាតម៉ិន និងខុនដូទំនើបផងដែរ។លោកបន្តថា ផ្ទះក្នុងគំរោងនេះមានកំពស់៩ជាន់ ដែលអតិថិជនជាអ្នកដីសាញដោយខ្លួនឯង និងអាចប្រើប្រាស់សម្រាប់ការធ្វើអាជីវកម្មនានា។
លោកបន្តថា “រចនាបថផ្ទះក្នុងគំរោងនេះ ត្រូវបានយកចេញពីរចនាបថមកពីអឺរ៉ុប និងច្របាច់បញ្ចូលគ្នានូវរចនាបថបែបខ្មែរផងដែរ ដើម្បីធ្វើឲ្យមានភាពទាក់ទាញ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានថ្លែងថា គំរោងនៅទីក្រុងកោះពេជ្រ មានភាពពេញនិយមសម្រាប់អ្នកមានលុយច្រើនទិញសម្រាប់វិនិយោគ ហើយរចនាបថនៃគំរោង Elysee មានភាពទាក់ ទាញ ព្រោះការឌីសាញធ្វើឡើងដូចគំរោងនៅបរទេស ប៉ុន្តែផ្ទះក្នុងគំរោងនេះបានឡើងថ្លៃស្ទើតែកល់តម្លៃរួចទៅហើយ តែផ្ទះនៅក្នុងគំរោងនេះល្អ ព្រោះអាចយកធ្វើអាជីវកម្មបាន។
លោកបន្តថា “អ្វីដែលគួរគិតគូរគឺក្រុមហ៊ុនអភិវឌ្ឍន៍ គួរគិតគូឡើងវិញពីចំនួននៃការផ្គត់ផ្គង់ ហើយគួរមានការផ្គត់ផ្គង់មានកំណត់ ព្រោះបើអតិថិជនទិញលែងចំណេញ គំរោងនេះលែងដើរហើយ។លោកបន្តថា “ទីផ្សារអចលនទ្រព្យសំរាប់អ្នកវិនិយោគទី២ មិនមានផលចំណេញទេ ព្រោះអ្នកអភិវឌ្ឍន៍នានាបានយកចំណេញអស់ទៅហើយ។
លោក គីម ហ៊ាង បានបន្តថា ហេតុនេះអ្នកអភិវឌ្ឍន៍គួរ គិតគូរពីការផ្គត់ផ្គង់ ព្រោះបើការផ្គត់ផ្គង់នៅតែបន្ត អ្នកវិនិយោគទិញផ្ទះបែបនេះសម្រាប់ជួល ឬលក់យកចំណេញ ពួកគេមិនអាចជួលបាន និងមិនបានទទួលផលចំណេញនោះទេ ដូច្នេះគួរសាងសង់ក្នុងកម្រិតមួយ ហើយពេលផ្ទះទាំងនោះមានសកម្មភាពអាជីវកម្មច្រើនហើយ ចាំសាងសង់បន្តជាការល្អ ដើម្បីជួយដល់អ្នកវិនិយោគទី២៕
