អគ្គនាយកក្រុមហ៊ុន រាជសន្តុសិត លោក ផន វណ្ណិត
ដោយ៖ រ៉ាណេត
ភ្នំពេញៈ បច្ចុប្បន្ននេះ វិស័យអចលនទ្រព្យកំពុងមានសន្ទុះយ៉ាងខ្លាំង ប៉ុន្តែការវិនិយោគក្នុងវិស័យនេះ មិនមែនសុទ្ឋតែទទួលបានផលចំណេញនោះទេ ហើយអ្នកដែលបរាជ័យ ក៏ព្រោះភាគច្រើន ពួកគេមិនបានដឹងពីគន្លឹះក្នុងការធ្វើជំនួញក្នុងវិស័យនេះ។
អគ្គនាយកក្រុមហ៊ុន រាជសន្តុសិត លោក ផន វណ្ណិត បានលើកឡើងពីកត្តាសំខាន់ៗ ៣យ៉ាងដែលអាចជំរុញឱ្យការធ្វើជំនួញ ក៏ដូចជាការធ្វើអាជីវកម្មនៅក្នុងវិស័យអចលនទ្រព្យអាចទទួលបានជោគជ័យខ្ពស់។ លោកបានលើកឡើងថា អ្នកប្រឡូកក្នុងវិស័យអចលនទ្រព្យ អ្វីដែលត្រូវតែដឹងបំផុតនោះ គឺទី១-ពេលវេលានៃការអភិវឌ្ឍសេដ្ឋកិច្ច ទី២-ការស្គាល់ទីតាំងភូមិសាស្ត្រ និងទី៣- ការយល់ច្បាស់ពីព័ត៌មាន។
-->
លោកបានអះអាងថា អ្នកទិញដីមិនអាចចង់ចំណេញភ្លាមៗនោះទេ តែត្រូវរង់ចាំពេលសេដ្ឋកិច្ចកើនឡើង ដីក៏ឡើងថ្លៃទៅតាមនោះដែរ។ ចំណែកឯការស្គាល់ទីតាំង និងស្វែងយល់ព័ត៌មាន រឹតតែមានសារៈសំខាន់សម្រាប់ការពិចារណាក្នុងការទិញដី។
ពេលវេលានៃការអភិវឌ្ឍសេដ្ឋកិច្ច
លោកផន វណ្ណិត បានបញ្ជាក់ថា ការទិញដីទុកលក់យកចំណេញ ត្រូវរង់ចាំពេលវេលាមកដល់ទើបលក់ចំណេញបានច្រើន។ សម្រាប់អ្នកលោភលន់ខ្លាំងពេក គឺមិនអាចជោគជ័យក្នុងវិស័យអចលនទ្រព្យឡើយ ព្រោះមិនបានសិក្សាច្បាស់ ខ្វះភាពអត់ធ្មត់ ដែលពេលខ្លះនាំទៅដល់ការខាតបង់ក៏មាន។ រឿងទិញដីទុក គឺមិនចេះខាតនោះឡើយ ព្រោះដីមិនចេះកើតកូន ចំណែកឯមនុស្សចេះតែមានការកើនឡើង។
ការស្គាល់ទីតាំងភូមិសាស្ត្រ
អគ្គនាយកក្រុមហ៊ុនដែលកើតចេញពីត្រកូលគ្រួសារក្រខ្សត់ នៅខេត្តព្រៃវែងរូបនេះ បានរៀបរាប់ទៀតថា កាលពីអំឡុងឆ្នាំ២០១៦ លោកក៏មានឱកាសបានចូលរួមជាមួយក្រុមហ៊ុនពុះដីឡូត៍បង់រំលស់ ហើយក៏ចាប់ផ្ដើមស្វែងយល់ពីទីតាំងកាន់តែខ្លាំង ដោយលោកធ្វើដំណើរញឹកញាប់ ស្គាល់ច្បាស់គ្រប់ផ្លូវនៅម្ដុំភ្នំរាប ភ្នំប្រសិទ្ធ ហើយអាចយល់ច្បាស់ពីចំណុចប្រសព្វ និងលក្ខណៈពិសេសនៃដីនីមួយៗ ទើបលោកទិញដីទុកបានច្រើន លក់ក៏បានច្រើន រហូតកើទុនដែលអាចបើកក្រុមហ៊ុនខ្លួនឯងបាន។
យល់ច្បាស់ពីព័ត៌មាន
បើតាមបទពិសោធន៍ផ្ទាល់ លោកផន វណ្ណិតបានប្រាប់ឱ្យដឹងថា ជានិច្ចកាលលោកតែងតែស្ដាប់ព័ត៌មាន អានព័ត៌មានពីវិស័យអចលនទ្រព្យ ដើម្បីដឹងព័ត៌មានច្បាស់ពីការអភិវឌ្ឍនានា ព្រោះវាជាជំនួយស្មារតីក្នុងការពិចារណាទិញដី។ អ្នកចង់ជោគជ័យក្នុងវិស័យអចលនទ្រព្យ ត្រូវដឹងនូវអ្វីដែលថ្មីជានិច្ច ហើយត្រូវដឹងមុនគេ មិនអាចរង់ចាំព័ត៌មានមកដល់ឡើយ គឺត្រូវទៅស្វែងរកព័ត៌មានឱ្យបានច្បាស់ជាប្រចាំ។
ទោះជាបែបនេះក្ដី លោកផន វណ្ណិតបានបញ្ជាក់ថា ចំណុចទាំង៣នេះ គឺនៅមិនទាន់គ្រប់គ្រាន់នៅឡើយនោះទេ ព្រោះអ្នកដាក់ខ្លួននៅក្នុងវិស័យអចលនទ្រព្យ ត្រូវតែចេះស្វែងយល់ពីស្ថានភាពសេដ្ឋកិច្ច និងការវិនិយោគនានា ទើបអាចមានឱកាសច្រើន ដើម្បីឆ្ពោះទៅកាន់ភាពជោគជ័យ។
លោកបានសង្កត់ថា “ចំណុចសំខាន់បំផុត គិតច្បាស់ ដាក់ចិត្ត ហើយហ៊ានធ្វើ ទើបឃើញលទ្ធផលជោគជ័យ”៕
