ដោយ វុត្ថា
ភ្នំពេញៈ ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោក កំពុងធ្វើការសិក្សាបុរេសមិទ្ធិលទ្ធភាព លើគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ។
នៅក្នុងកិច្ចប្រជុំជាមួយមន្ត្រីជាន់ខ្ពស់ក្រសួងសាធារណៈការ និងដឹកជញ្ជូនៅថ្ងៃទី ៨ ខែសីហា នេះ ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោក បានធ្វើបទបង្ហាញអំពីបច្ចុប្បន្នភាព គម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ដោយផ្តោតជាសំខាន់លើការវិភាគស្ថានភាពច្បាប់ និងស្ថាប័នដែលគាំទ្រដល់រចនាសម្ព័ន្ធភាពជាដៃគូរដ្ឋ និងឯកជន (Public-Private Partnership) ទិដ្ឋភាពច្បាប់ទាក់ទងនឹងប្រតិបត្តិការកំពង់ផែ និងតំបន់សេដ្ឋកិច្ចពិសេស និងទិដ្ឋភាពបច្ចេកទេសផងដែរ។
-->
គម្រោងនេះមានគោលបំណងអភិវឌ្ឍន៍ក្រុងព្រះសីហនុ ជាមជ្ឈមណ្ឌលភស្តុភារកម្មដ៏ធំមួយនៅកម្ពុជា ធានាដល់ការអភិវឌ្ឍសេដ្ឋកិច្ច សង្គម និងបរិស្ថានប្រកបដោយចីរភាព ធានាឱ្យមានការគាំទ្រផ្នែកហេដ្ឋារចនាសម្ព័ន្ធចាំបាច់ ដើម្បីជំរុញការប្រកួតប្រជែងក្នុងការដឹកជញ្ជូន ដែលនឹងត្រូវអនុវត្តតាមរយៈភាពជាដៃគូរដ្ឋ និងឯកជន (PPP) ផងដែរ។
លោក កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានជំរុញឱ្យសមាជិកសមាជិកា នៃគណៈកម្មាធិការជាតិភស្តុភារកម្ម និងភាគីពាក់ព័ន្ធផ្តល់ធាតុចូលសំខាន់ៗ ដើម្បីឱ្យគម្រោងសិក្សានេះទទួលបានលទ្ធផលល្អ និងដាក់ជូនថ្នាក់ដឹកនាំក្រសួងធ្វើការពិនិត្យ ឈានទៅបង្កើតមជ្ឈមណ្ឌលភស្តុភារកម្ម ក្រុងព្រះសីហនុប្រកបដោយជោគជ័យ។
រាជរដ្ឋាភិបាលកម្ពុជាកំពុងពិនិត្យលទ្ធភាពអភិវឌ្ឍន៍ មជ្ឈមណ្ឌលភស្តុភារកម្មចំនួនបួន ដែលក្នុងនោះរួមមាន៖ មជ្ឈមណ្ឌលភស្តុភារកម្មភ្នំពេញ មជ្ឈមណ្ឌលភស្តុភារកម្មក្រុងព្រះសីហនុ មជ្ឈមណ្ឌលភស្តុភារកម្មប៉ោយប៉ែត និងមជ្ឈមណ្ឌលភស្តុភារកម្មបាវិត ដើម្បីជំរុញការប្រកួតប្រជែង និងកាត់បន្ថយថ្លៃដើមដឹកជញ្ជូន៕
