ដោយ Donald Lee
ភ្នំពេញៈ យោងតាមការិយាល័យស្ថិតិរដ្ឋាភិបាលកាណាដាបានឱ្យដឹងថា ទីផ្សារអចលនទ្រព្យ ដែលកើនឡើងខ្លាំងនៅប្រទេសកាណាដា កំពុងជំរុញកំណើនសេដ្ឋកិច្ចរបស់ប្រទេសជាតិនេះ ខណៈវិស័យអចលនទ្រព្យនិងសំណង់ បានរួមចំណែកពាក់កណ្តាលនៃអត្រាកំណើនផលិតផលក្នុងស្រុកសរុបរបស់ប្រទេសនេះ។
ទិន្នន័យកំណើនផលិតផលសរុបក្នុងស្រុកចុងក្រោយ ពីប្រទេសកាណាដាបានបង្ហាញថា អត្រាកំណើនផលិតផលក្នុងស្រុកសរុបរបស់ប្រទេសនេះក្នុងខែ ឧសភា បានកើនឡើង ១,៣៧ភាគរយធៀបនឹងរយៈពេលដូចគ្នាកាលពីឆ្នាំមុន។ ពាក់កណ្តាលនៃកំណើននេះត្រូវបានជំរុញដោយវិស័យអចលនទ្រព្យ និងសំណង់។
ផលិតផលក្នុងស្រុកសរុបកាណាដា មានទំហំទឹកប្រាក់ប្រមាណ ១,៩៧ពាន់ពាន់លានដុល្លារក្នុងខែ ឧសភា បន្ទាប់ពីកំណើនកើនឡើង ៤.៥២ពាន់លានដុល្លារ សម្រាប់ខែនេះ។
វិស័យជួល និងការជួលអចលនទ្រព្យ ដែលមានកំណើនខ្លាំងបានរួមចំណែកដល់កំណើន ២៤,២៤ភាគរយ និងវិស័យសំណង់មានជាង២៧ភាគរយ។ ស្ថិតិទាំងពីររួមបញ្ចូលគ្នា គឺជាការចូលរួមចំណែកធំបំផុតដល់សេដ្ឋកិច្ចកាណាដា និងចូលរួមចំណែកជាង ៥១ភាគរយ នៃកំណើនសេដ្ឋកិច្ចរបស់ប្រទេសនេះនៅក្នុងខែ ឧសភា។ នេះបើយោងតាមស្ថិតិកាណាដា។
ក្រុមអ្នកវិភាគជាច្រើនបារម្ភថា ការពុះកញ្ជ្រោលទ្រព្យសម្បត្តិនៅកាណាដា នឹងអាចធ្លាក់ចុះ នៅពេលតម្លៃផ្ទះបានកើនឡើង ខណៈដែលប្រាក់ចំណូលមធ្យមនៅថេរ។
យោងតាមមូលនិធិរូបិយវត្ថុអន្តរជាតិ (IMF) បានឲ្យដឹងថា រដ្ឋាភិបាលកាណាដាបានដាក់ចេញនូវវិធានការណ៍នានា ដើម្បីធ្វើឱ្យតម្លៃអចលនទ្រព្យចុះទាប និងអាចធ្វើឲ្យទីផ្សារធ្លាក់ចុះបន្តិចក្នុងខែ កក្កដានេះ។
បើយោងតាមមូលនិធិរូបិយវត្ថុអន្តរជាតិ (IMF) “បន្ទាប់ពីការឡើងថ្លៃមួយរយៈ ទីផ្សារលំនៅដ្ឋានរបស់កាណាដាកំពុងធ្លាក់ចុះ។
មូលនិធិរូបិយវត្ថុអន្តរជាតិ បានបន្ថែមទៀតថា “វិធានការណ៍ដែលបានរៀបចំឡើងនេះដើម្បីពង្រឹងស្ថេរភាពហិរញ្ញវត្ថុ ដូចជាការធ្វើសាកល្បងកាន់តែតឹងរឹង ទៅលើសមត្ថភាពរបស់អ្នកខ្ចីក្នុងការសងប្រាក់កម្ចីរបស់ពួកគេ រួមជាមួយនឹងអត្រាការប្រាក់ខ្ពស់រួមផ្សំគ្នាដើម្បីធ្វើឱ្យហិរញ្ញប្បទានប្រាក់កម្ចីមានទ្រព្យបញ្ចាំមានតម្លៃថ្លៃជាង។
ទោះយ៉ាងណា មូលនិធិរូបិយវត្ថុអន្តរជាតិព្រមានថា ទីផ្សារលំនៅឋានហួសកម្រិត និងការពឹងផ្អែករបស់កាណាដាលើវិស័យនេះ សម្រាប់កំណើនផលិតផលសរុបក្នុងស្រុកអាចធ្វើឱ្យសេដ្ឋកិច្ចមានភាពវឹកវរ។
មូលនិធិរូបិយវត្ថុអន្តរជាតិបានសន្និដ្ឋានថា “អតុល្យភាពទីផ្សារលំនៅដ្ឋាននៅតែជាកត្តាហានិភ័យក្នុងស្រុកដ៏សំខាន់។
របាយការណ៍នេះបានបន្ថែមទៀតថា “ការផ្លាស់ប្តូរយ៉ាងខ្លាំងចំពោះតម្លៃទីផ្សារផ្ទះ ជាពិសេស ប្រសិនបើមានការកើនឡើងនៃភាពអត់ការងារធ្វើ និងការធ្លាក់ចុះនៃការប្រើប្រាស់របស់ប្រជាជន អាចបង្កហានិភ័យបន្ថែមទៀតដល់ស្ថេរភាពហិរញ្ញវត្ថុ និងកំណើន”៕
