ដោយៈ រ៉ាណេត
ភ្នំពេញៈ ក្រុមអ្នកជំនាញ និងវិភាគសេដ្ឋកិច្ចកម្ពុជាបានអះអាងថា ការថមថយល្បឿនសេដ្ឋកិច្ចរបស់ប្រទេសចិន ដែកំពុងមានសង្រ្គាមពាណិជ្ជកម្មជាមួយសហរដ្ឋអាមេរិក មិនប៉ះពាល់ដល់វិស័យសំណង់ និងអចលនទ្រព្យកម្ពុជាទេ។
ចាប់តាំងពីដើមឆ្នាំ២០១៩ រហូតមកដល់ពេលបច្ចុប្បន្ននេះ សម្រាប់កំណើននៃវិស័យសំណង់ និងទីផ្សារអចលនទ្រព្យនៅកម្ពុជាត្រូវបានគេមើលឃើញថា ហាក់មានសភាពទ្រឹងបន្តិច បើធ្វើការប្រៀបធៀបទៅនឹងកាលពីឆ្នាំកន្លងទៅនោះ ដែលស្ថានការបែបនេះក៏ព្រោះតែរងឥទ្ធិពលពីវិបត្តិសេដ្ឋកិច្ចប្រទេសចិន ខណៈដែលគម្រោងវិនិយោគធំៗនៅកម្ពុជាត្រូវបានគ្រប់គ្រងដោយក្រុមហ៊ុនចិន។ តែទោះជាយ៉ាងណា អ្នកជំនាញនៅក្នុងវិស័យមួយនេះនៅតែបង្ហាញពីភាពសុទិដ្ឋិនិយមថា មិនថាឆ្នាំនេះឬឆ្នាំបន្ទាប់នោះទេ អចលនទ្រព្យកម្ពុជានៅតែមានលំនឹង និងមិនធ្លាក់ចុះដូចការលើកឡើងខាងលើនោះឡើយ។
-->
ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោកច្រឹក សុខនីមបានមានប្រសាសន៍កាលពីព្រឹកថ្ងៃទី២១ ខែសីហា នេះថា ជារួមពេលណាយើងនិយាយពីសេដ្ឋកិច្ចពិភពលោក វាមិនមែនពឹងផ្អែកទៅលើតែប្រទេសចិនមួយនោះទេ ព្រោះនៅលើពិភពលោក មានប្រទេសមហាអំណាចធំៗចំនួន៧ដែលជាអ្នកទ្រទ្រង់សេដ្ឋកិច្ច (G 7) ដូច្នេះ ទាល់តែប្រទេសទាំងអស់នេះជួបបញ្ហា ទើបសេដ្ឋកិច្ចពិភពលោកប្រែប្រួល។
លោកបានបញ្ជាក់ថា “យើងទទួលស្គាល់ថាបច្ចុប្បន្ននេះ នៅប្រទេសកម្ពុជាការវិនិយោគលើគម្រោងសំណង់ធំៗភាគច្រើន គឺក្រុមហ៊ុនចិន ប៉ុន្តែមិនមែនមានន័យថាក្រុមហ៊ុនទាំងអស់នេះសុទ្ធតែក្ស័យធុននោះទេ”។ លោកបានបន្តទៀតថា “ទីផ្សារអចលនទ្រព្យនៅកម្ពុជាបច្ចុប្បន្ន ក្រៅពីក្រុមហ៊ុនចិនក៏មានបណ្តាក្រុមហ៊ុនអន្តរជាតិនានាជាច្រើនទៀត ដូចជាប្រទេសកូរ៉េជាដើម ដែលកំពុងតែបង្ហាញពីចេតនាចូលមកបណ្តាក់ទុនបន្ថែមពីលើក្រុមហ៊ុនដែលមានស្រាប់នាពេលបច្ចុប្បន្ននេះ។
លោកបន្តថា “មានកក្តាជាច្រើនដែលពាក់ព័ន្ធ និងជួយជ្រោមជ្រែងទីផ្សារអចលនទ្រព្យនៅកម្ពុជា ឱ្យនៅតែមានភាពល្អប្រសើរ ដោយវាមិនមានភាពប្រថុយប្រថាន ទៅតាមទំនោរនៃវិបត្តិសេដ្ឋកិច្ចប្រទេសចិននោះឡើយ”។
លោកសុខនីមបានបន្ថែមថា វិស័យសំណង់ និងអចលនទ្រព្យមួយនេះបានជួយធ្វើឱ្យមានភាពល្អប្រសើរទាំងវិស័យរដ្ឋាភិបាល ទាំងវិស័យឯកជន រួមជាមួយនឹងប្រជាពលរដ្ឋទូទៅផងដែរ ហើយបច្ចុប្បន្ននេះយើងបានព្យាយាមផ្សព្វផ្សាយយ៉ាងទូលាយ ពីភាពល្អប្រសើរនៃវិស័យនេះ ដើម្បីអាចទាក់ទាញអ្នកវិនិយោគ និងក្រុមហ៊ុនអន្តរជាតិនានានៅលើសាកលលោកមកកាន់កម្ពុជាបន្ថែមទៀត។
លោកថា “ជាទូទៅគ្រប់វិស័យទាំងអស់តែងមានវដ្ដរបស់វា ដែលនៅពេលណាមួយវានឹងមានការប្រែប្រួល មិនស្ថិតស្ថេរជារៀងរហួតនោះទេ ដោយឡែកសម្រាប់វិស័យអចលនទ្រព្យនៅកម្ពុជា មិនថាឆ្នាំនេះ ឬឆ្នាំបន្ទាប់រហូតដល់៣ទៅ៤ឆ្នាំទៀត ក៏នៅតែរក្សាបានភាពល្អប្រសើរដដែល”។
អ្នកវិភាគសេដ្ឋកិច្ចឯករាជ្យកម្ពុជា លោកង៉ែត ជូ បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃដដែលនេះថា ចំពោះស្ថានការណ៍នាពេលបច្ចុប្បន្ននេះ គឺគេពិបាកនឹងធ្វើវិភាគបន្តិច ដែលវាអាចជាឱកាសល្អរបស់កម្ពុជា ហើយក៏អាចប៉ះពាល់ដល់ទីផ្សារកម្ពុជាដោយប្រយោល។ លោកបានបន្តទៀតថា ប្រទេសចិនធំធេងណាស់ ហើយក៏មានក្រុមហ៊ុនជាច្រើនដែលកំពុងតែដំណើរការ បើទោះជាកាលពីពេលថ្មីៗនេះមានក្រុមហ៊ុនសរុបប្រមាណ៣០០ក្រុមហ៊ុនបានប្រកាសក្ស័យធន។
លោកបានបន្តទៀតថា “នៅត្រឹមដំណាក់កាលនេះអាចមានក្រុមហ៊ុនដែលជួបវិបត្តិនៅប្រទេសចិន ឬនៅតាមបណ្តាប្រទេសនានា ងាកមកចាប់អារម្មណ៍នៅកម្ពុជាក៏ថាបានដែរ”។ លោកបានបន្តថា “នៅក្នុងតំណាក់កាលនេះ វាមិនទាន់ជះឥទ្ធិពលខ្លាំងក្លានោះទេ ប៉ុន្តែសង្គ្រាមពាណិជ្ជកម្មរវាងចិន និងអាមេរិកនៅតែបន្តភាពរាំរៃក្នុងរយៈពេល៣-៤ឆ្នាំទៅមុខទៀត ច្បាស់ណាស់ថាពិតជាបង្កភាពលំបាកទូទាំងសាកល”៕
