ដោយ ៖ រ៉ាណេត
ភ្នំពេញ ៖ នៅក្នុងចំណោមបណ្តានានានៅក្នុងតំបន់អាស៊ី កម្ពុជា នៅតែជាប្រទេសដែលឈានមុខគេក្នុងការផ្តល់ឱកាសវិនិយោគលើវិស័យសំណង់ និងអចលនទ្រព្យ ខណៈដែលប្រទេសមីយ៉ាន់ម៉ា បាន និងកំពុងស្ថិតនៅលំដាប់បន្ទាប់។
អស់រយៈពេលជាង១០ឆ្នាំកន្លងមកហើយ ដែលកម្ពុជាទទួលបានអំណោយផលយ៉ាងខ្លាំងពីវិស័យអចលនទ្រព្យ និងសំណង់ រហូតបានក្លាយជាវិស័យឈានមុខគេក្នុងការជួយទ្រទ្រង់ និងពង្រឹងកំណើនសេដ្ឋកិច្ចជាតិទាំងមូល។
ដោយឡែកសម្រាប់ឆ្នាំ២០១៩ និងឆ្នាំបន្ទាប់ កម្ពុជា នៅតែបន្តមានឱកាសអភិវឌ្ឍនៅក្នុងវិស័យមួយនេះដដែល ខណៈដែលបណ្តាអ្នកវិនិយោគអន្តរជាតិនានា នៅតែបន្តសម្លឹងមើលឃើញពីឱកាសនៃការទទួលបានប្រយោជន៍ពីការវិនិយោគ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី២០ ខែកញ្ញា ថា មិនថានៅក្នុងឆ្នាំ២០១៩ ឬនៅឆ្នាំបន្ទាប់នោះទេ វិស័យអចលនទ្រព្យ និងសំណង់កម្ពុជានៅតែរក្សាបានភាពល្អប្រសើរដដែល។
លោកបានបន្តទៀតថា “សម្រាប់ចំណុចអវិជ្ជមានលើវិស័យអចលនទ្រព្យ និងសំណង់នៅកម្ពុជានាពេលបច្ចុប្បន្ន ក៏ដូចជានៅឆ្នាំបន្ទាប់ខាងមុខនេះ គឺនៅមើលមិនទាន់ឃើញនៅឡើយនោះទេ”។
លោកបានបន្តទៀតថា “នៅក្នុងចំណោមបណ្តាប្រទេសនានាដែលស្ថិតនៅក្នុងតំបន់ ក៏ដូចជានៅអាស៊ីផងដែរ កម្ពុជានៅតែផ្តល់ឱកាសល្អសម្រាប់ក្រុមហ៊ុនវិនិយោគ និងមានឱកាសជាងប្រទេសដទៃទៀត ដែលការវាយតម្លៃនេះត្រូវបានគេលើក យកមកបង្ហាញ និងពិភាក្សានៅក្នុងកិច្ចប្រជុំអចលនទ្រព្យកំពូលអន្តរជាតិ IREC ប្រចាំឆ្នាំកាលពីពេលកន្លងទៅថ្មីៗនេះ”។
លោក ច្រឹក សុខនីម បានមានប្រសាសន៍បន្តទៀតថា “គ្រប់បណ្តាប្រទេសទាំងអស់នៅក្នុងតំបន់អាស៊ី គឺសុទ្ធតែផ្តល់ឱកាសវិនិយោគទាំងអស់ ទាស់ត្រង់ថា ផ្តល់ឱកាសតិច ឬច្រើនដល់អ្នកវិនិយោគតែប៉ុណ្ណោះ”។ លោកបានបន្តទៀតថា “ស្ថានភាពទីផ្សារវិស័យអចលនទ្រព្យនៅប្រទេសចិន ហ្វីលីពីន សាំងហ្គាពួរ ចិន ឡាវ ប៊្រុយណេ អូស្ត្រាលី ថៃ ម៉ាឡេស៊ី ក៏ដូចជាប្រទេសកម្ពុជាផងដែរ នៅមិនទាន់មានសញ្ញាធ្លាក់ចុះខ្លាំងនោះទេ”។
លោកបញ្ជាក់ថា “ផ្ទុយទៅវិញ ប្រទេសកម្ពុជា ហាក់បង្ហាញពីអត្រាខ្ពស់ក្នុងការចាប់អារម្មណ៍ជាងគេ ជាមួយនឹងការផ្តល់ឱកាសវិនិយោគខ្ពស់មិនមានហានិភ័យ”។ លោកបានបន្តថា “បន្ទាប់ពីកម្ពុជា ប្រទេសដែលកំពុងតែដេញតាមពីក្រោយ គឺ មីយ៉ាន់ម៉ា ដោយសារតែប្រទេសមួយនេះបានផ្តល់នូវភាពទាក់ទាញដល់បណ្តាអ្នកវិនិយោគដែលជាជនបរទេសអាចមានលទ្ធភាពគ្រប់គ្រាន់ក្នុងការទិញអចលនទ្រព្យធ្វើជាកម្មសិទ្ធិស្របច្បាប់នៅតាមបណ្តាតំបន់មួយចំនួន ជាពិសេសថែមតាំងមានការផ្តល់សញ្ញាតិ ស្ថិតនៅក្នុងកម្រិតនៃការវិនិយោគណាមួយដែលត្រូវបានកំណត់ដោយច្បាប់របស់ប្រទេស”។
គិតត្រឹមខែសីហា ឆ្នាំ២០១៩កន្លងទៅនេះ ទុនវិនិយោគលើវិស័យសំណង់នៅកម្ពុជា បានកើនឡើងរហូតដល់ប្រមាណ ៦០០០ពាន់លានដុល្លារសហរដ្ឋអាមេរិក ដែលជាចំនួនមួយបង្ហាញពីកំណើន និងភាពរឹងមាំនៅក្នុងវិស័យមួយនេះ។
អ្នកវិភាគសេដ្ឋកិច្ច និងអចលនទ្រព្យកម្ពុជា លោក ង៉ែត ជូ បានមានប្រសាសន៍ថា ផ្អែកតាមទិដ្ឋភាពជាក់ស្ដែងពេលនេះ កម្ពុជា នៅតែរក្សាបានភាពលំនឹងនៃកមណើនប្រចាំឆ្នាំក្នុងវិស័យអចលនទ្រព្យ និងសំណង់ ប៉ុន្តសន្ទុះនៃកំណើនសេដ្ឋកិច្ច ក៏ដូចជាភាពរីកចម្រើននៅក្នុងវិស័យណាមួយវាមិនអាចចេះតែកើនឡើងរហូតបាននោះទេ គឺអាចនឹងដល់ចំណុចណាមួយធ្លាក់ចុះវិញជាមិនខាន។
លោកបានបន្តទៀតថា “សម្រាប់វិស័យអចលនទ្រព្យ និងសំណង់នៅកម្ពុជានៅត្រឹមរយៈ៣ឆ្នាំចុងក្រោយនេះ គឺមានកំណើនយ៉ាងគំហុកហួសពីក្ដីរំពឹង ដោយឡែកសម្រាប់នៅឆ្នាំបន្ទាប់យើងមិនអាចកំណត់ថានឹងមានកំណើនខ្ពស់ដូចនេះទៀតនោះទេ ដែលវាក៏អាស្រ័យទៅលើបរិបថ និងស្ថានភាពនៃស្ថិរភាពក្នុងសង្គមជាក់ស្ដែង”។
លោកបានបន្តទៀតថា “បើធ្វើការប្រៀបធៀបជាមួយប្រទេសជិតខាង ដូចជាប្រទេសថៃ ប្រទេសវៀតណាម វិស័យសំណង់នៅកម្ពុជានៅតែមានភាពល្អប្រសើរដដែល ដោយសារតែកត្តាតម្លៃនៅកម្ពុជាមានកម្រិតទាបជាង ហើយវិសាលភាព និងឱកាសវិនិយោគនៅមានភាពទូលំទូលាយច្រើន”៕
