ដោយ វុត្ថា
ភ្នំពេញៈ ជាមួយនឹងលំហូរទុនវិនិយោគចូលមកកម្ពុជាយ៉ាងគំហុកក្នុងរយៈពេលពីរទសវត្សរ៍កន្លងមកនេះ កម្ពុជាត្រូវបានគេមើលឃើញក្នុងរូបភាពវិជ្ជមាន និងប្រៀបដូចជាកូនក្រមុំមួយ ដែលទាក់ទាញការចាប់អារម្មណ៍យ៉ាងខ្លាំងពីអ្នកវិនិយោគជាតិ និងអន្តរជាតិ។
លោកស្រី តាំង ហួរ អគ្គនាយិកាក្រុមហ៊ុន AMATAK Property Service Co, Ltd បានឱ្យដឹងតាមទូរស័ព្ទនារសៀលថ្ងៃទី២៣ កញ្ញាកន្លងមកថា អ្នកវិនិយោគនិងអ្នកជំនាញអចលនទ្រព្យអន្តរជាតិ បានមើលមកវិស័យអចលចនទ្រព្យនៅក្នុងប្រទេសកម្ពុជា មានការរីកចម្រើនខ្លំាងក្នុងរយៈពេលប៉ុន្មានឆ្នាំចុងក្រោយនេះ។
លោកស្រីបានបន្តថា “សន្ទុះនៃការរីកចំរើនឥតឈប់ នៃវិស័យអចលនទ្រព្យនៅក្នុងប្រទេសកម្ពុជានេះ ត្រូវបានគេចាត់ចំណាច់ថ្នាក់លេងរៀងទី៦ ក្នុងចំណោមប្រទេសនៅក្នុងតំបន់អាស៊ាន និងនៅលើពិភពលោក។ លោកស្រីទទួលព័ត៌មាននេះ ខណៈដែលលោកស្រីទៅចូលរួមសិក្ខាសាលាមួយ ដែលរៀបចំឡើងនៅក្នុងប្រទេសសឹង្ហបុរី កាលពីកន្លងទៅមកនេះ”។
លោកស្រីតាំង ហួរបានបន្ថែមថា អ្នកដែលនៅក្នុងស្រុកហាក់មិនបានដឹងព័ត៌មានជុំវិញការរីកចម្រើន ក្នុងវិស័យអចលនទ្រព្យនៅក្នុងប្រទេសនោះទេ ហើយក្នុងនោះភាគច្រើន អ្នកដែលរស់នៅខាងក្រៅបានប្រៀបធៀបកម្ពុជា កាលពី៥ឆ្នាំមុន និងបច្ចុប្បន្ននេះមានភាពខុសឆ្ងាយដូចមេឃ និងដី។
លោកបញ្ជាក់ទៀតថា “ការរីកចម្រើនេះ ដោយសាររដ្ឋាភិបាលកម្ពុជាមានទំនាក់ទំនងល្អជាមួយរដ្ឋាភិបាលចិន ដែលបង្កឱ្យមានអ្នកវិនិគិនចិនកាន់តែច្រើនចូលមករកស៊ីលើវិស័យផ្សេងៗ ជាពិសេសអចលនទ្រព្យ”។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងដែរថា ជាការពិតណាស់ក្នុងរយៈពេល៥ឆ្នាំចុងក្រោយនេះ វិស័យអចលនទ្រព្យនៅក្នុងប្រទេសកម្ពុជាមានសន្ទុះរីកចំរើនខ្ពស់ ដោយមានអគារខ្ពស់កប់ពពកជាច្រើន បើធៀបទៅនឹងប្រវត្តិសាស្ត្រ នៃបណ្តាប្រទេសនានានៅក្នុងតំបន់អាស៊ាន និងពិភពលោក។
លោកបន្តថា “ការរីកចំរើនយ៉ាងលឿននេះ ដោយសារប្រទេសកម្ពុជា ដើរលើផ្លូវត្រូវ ដែលធ្វើឱ្យវិនិយោគិនបរទេសជាច្រើនចូលមករកស៊ីនៅក្នុងប្រទេស ហើយអ្នករកស៊ីក្នុងវិស័យនេះ ដែលធំជាងគេគឺមកពីវិនិយោគិនមកពីប្រទេសចិន ជប៉ុន និងកូរ៉េជាដើម”។
ជាមួយគ្នានេះ លោកច្រឹក សុខនីមបានស្នើដល់គ្រប់ភាគីពាក់ព័ន្ធទាំងអស់គួរតែពង្រឹកលើគោលការចំនួន២ រួមមាន ទី១ ពង្រឹងវិស័យអចលនទ្រព្យឱ្យបានរឹងមុំាមួយកម្រិតទៀត និងទី២ អ្នកវិនិយោគ រួមជាមួយនឹងអ្នកដែលរកស៊ីក្នុងវិស័យនេះ ត្រូវចូលរួមណែនាំឱ្យក្រុមហ៊ុនធំទាំងនោះឱ្យបោះទុនវិនិយោគ និងដាក់ការិយាល័យឱ្យធំនៅក្នុងស្រុកឱ្យបានកាន់ច្រើន នឹងធ្វើឱ្យស័យមួយនេះកាន់តែរីកចំរើនទៅមុខបន្ថែមទៀត។
ប្រទេសកម្ពុជានៅក្នុងរយៈពេលប៉ុន្មានចុងក្រោយ ត្រូវបានគេមើលឃើញថា វិស័យអចលនទ្រព្យនៅក្នុងប្រទេសកម្ពុជា មានសន្ទុះរីកចម្រើនខ្លាំងទាំងនៅក្នុងទីក្រុងភ្នំពេ ខេត្តព្រះសីហនុ និងនៅតាមណ្តាខេត្តនានា ហើយបានជំរុញកំណើនសេដ្ឋកិច្ចជាតិកាន់តែរីកចំរើនផងដែរ៕
