ដោយ Donald Lee
ពិភពលោក៖ ឧស្សាហកម្មរថយន្ដនៅទូទាំងពិភពលោក នឹងខាតបង់ប្រាក់ចំណូលចំនួន៧៦៥ពាន់លានដុល្លារដោយសារសង្រ្គាមពាណិជ្ជកម្មអាមេរិក។ នេះបើយោងតាមរបាយការណ៍សិក្សាស្តីពី ឧស្សាហកម្មរថយន្តរបស់មជ្ឈមណ្ឌលស្រាវជ្រាវយានយន្ត (CAR)។
មជ្ឈមណ្ឌលស្រាវជ្រាវយានយន្ត (CAR) ដែលមានមូលដ្ឋាននៅសាកលវិទ្យាល័យ Duisburg Essen ក្នុងប្រទេសអាឡឺម៉ង់ បានចេញផ្សាយទិន្នន័យកាលពីថ្ងៃពុធកន្លងមកនេះបញ្ជាក់ថា គោលនយោបាយពាណិជ្ជកម្ម របស់ប្រធានាធិបតីអាមេរិកលោក ដូណាល់ ត្រាំ នឹងធ្វើឱ្យឧស្សាហកម្មលក់រថយន្ត បាត់បង់ថវិកាប្រមាណ ៧៦៥ពាន់លានដុល្លារអាមេរិក។
របាយការណ៍នេះបន្តថា សង្គ្រាមពាណិជ្ជកម្ម រវាងសហរដ្ឋអាមេរិករវាងឆ្នាំ២០១៨ និង២០២៤ នឹងអាចបណ្តាលឱ្យបាត់បង់ការលក់ រថយន្តចំនួន ៣៥លានគ្រឿងភាគច្រើនដោយសារតែភាពមិនប្រាកដប្រជា ដែលបង្កឡើងដោយសង្គ្រាមពាណិជ្ជកម្ម រវាងសហរដ្ឋអាមេរិក និងចិន និងផលប៉ះពាល់ដែលវាមានទៅលើការលក់រថយន្ត របស់អាល្លឺម៉ង់នៅក្នុងប្រទេសចិន។
ផលិតកម្មរថយន្តរបស់អាល្លឺម៉ង់ បានធ្លាក់ចុះយ៉ាងខ្លាំងនៅពាក់កណ្តាលឆ្នាំដំបូងនេះ ពោលមានចំនួន ១២ភាគរយ ពីមួយឆ្នាំទៅមួយឆ្នាំដែលជំរុញឱ្យសេដ្ឋកិច្ចអាល្លឺម៉ង់ឆ្ពោះទៅរកការធ្លាក់ចុះ។
ការបាត់បង់ផលិតកម្ម ត្រូវបានបង្កឡើងដោយការលក់រថយន្ត របស់អាល្លឺម៉ង់នៅក្នុងប្រទេសចិនមានការធ្លាក់ចុះ។
សមាគមឧស្សាហកម្មរថយន្តអាល្លឺម៉ង់បានឱ្យដឹងថា ការលក់នៅក្នុងប្រទេសចិនបានធ្លាក់ចុះ ១៣ភាគរយចាប់តាំងពីខែមករានៃឆ្នាំនេះ។
របាយការណ៍របស់ VDA កាលពីខែមុនបានឱ្យដឹងថា “ការលក់រថយន្តដឹកអ្នកដំនើរបានបង្ហាញនិន្នាការអវិជ្ជមាន នៅលើទីផ្សារមួយដ៏ធំបំផុតក្នុងរយៈពេល ១៣ខែហើយ”៕
