ដោយៈ រ៉ាណេត
ភ្នំពេញៈ មិនថាចំពោះតែការវិនិយោគ ឬធ្វើជំនួញទៅលើវិស័យណាមួយនោះទេ គឺសុទ្ធតែប្រាថ្នាចង់បានភាពជោគជ័យ និងទទួលបានផលចំណេញទាំងអស់ ប៉ុន្តែអ្វីដែលមនុស្សមួយចំនួនមិនបានយល់ដឹងពីវិធីសាស្ត្រ ឬគ្រោងផែនការជាក់លាក់ណាមួយដែលអាចជំរុញឱ្យទៅដល់គោលដៅជោគជ័យ១០០ភាគរយនោះទេ។
ជាការចែករំលែកនូវចំណេះដឹង និងបទពិសោធន៍ផ្ទាល់ខ្លួនទៅលើការវិនិយោគ អ្នកវិភាគសេដ្ឋកិច្ចឯករាជ្យ និងជាអ្នកវិនិយោគនៅក្នុងវិស័យអចលនទ្រព្យ លោក ង៉ែត ជូ ដែលធ្លាប់ឡើងធ្វើបទបង្ហាញពីចំណេះដឹងសាកលជាច្រើនកម្មវិធី បានសរសេរនៅលើបណ្តាញទំនាក់ទំនងសង្គម គណនីផ្ទាល់ខ្លួនថា ការវិនិយោគមួយដែលអាចសម្រេចបាននូវភាពជោគជ័យក្នុងអត្រាខ្ពស់បាន លុះត្រាតែអនុវត្តទៅតាមគោលការណ៍នៃការវិនិយោគចំនួន៣ចំណុច។
-->
ចំណុចទាំង៣ ដែលត្រូវតែធ្វើការវិនិយោគជាលើកដំបូង ដោយខានមិនបានរួមមាន៖
ជំហ៊ានទី១ វិនិយោគលើការអភិវឌ្ឍខ្លួនឯងឲ្យមានសមត្ថភាព (ចំណេះដឹង ជំនាញ និងបទពិសោធន៍)។
ជំហ៊ានទី២ វិនិយោគលើទំនាក់ទំនងសង្គម (ជាមួយមនុស្សល្អៗ និងមានសមត្ថភាព)។
ជំហ៊ានទី៣៖ វិនិយោគទុន (ដាក់ទុន)។
លោកង៉ែត ជូ បានបន្តទៀតថា “ជាអកុសល មនុស្សជាច្រើនមិនបានដើរតាមជំហ៊ានទាំង៣ខាងលើនោះទេ ព្រោះចង់ជោគជ័យឆាប់។ ខ្លះមានសមត្ថភាព និងទំនាក់ទំនងសង្គមល្អ ប៉ុន្តែខ្វះទុន ហើយចង់អោយអ្នកដទៃដាក់ទុនវិនិយោគ ជាមួយខ្លួនស្ទើតែ១០០%”។
លោកបន្តថា ទៅមិនរួចទេ ជំនួញរបស់អ្នក បើអ្នកមិនដាក់ទុន ឬមិនទទួលយកហានិភ័យ គ្មានអ្នកណាហ៊ានវិនិយោគជាមួយនោះទេ (You need to put skin the game)។ អ្នកខ្លះមានទុន ប៉ុន្តែខ្វះសមត្ថភាព និងទំនាក់ទំនងសង្គម ករណីនេះបរាជ័យច្រើនគ្នាណាស់ ហើយឈានដល់បាក់ទឹកចិត្តផងក៏មាន”៕
