ដោយ ម៉ាណេត
ភ្នំពេញៈ ប្រមុខរដ្ឋាភិបាលកម្ពុជាបានជំរុញស្ថាប័នពាក់ព័ន្ធធ្វើការសិក្សា និងពិនិត្យលទ្ធភាពជាក់ស្ដែងដាក់ចេញនូវយន្តការពិសេស ដើម្បីបង្កើនការសម្រួលពាណិជ្ជកម្ម និងផ្នែកឡូជីស្ទីកនៅតាមជាយដែន ដើម្បីត្រៀមលក្ខណៈឆ្លើយតបទៅនឹងកំណើនយ៉ាងកំហុគនៃការដឹកជញ្ជូនឆ្លងកាត់ព្រំដែន ជាពិសេសមួយគម្រោងផ្លូវល្បឿនភ្នំពេញ និងទីក្រុងហូជីមិញ។
នេះបើយោងតាមប្រសាសន៍ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានអញ្ជើញចូលរួមនៅក្នុង សន្និសីទកម្ពុជា-វៀតណាម ស្ដីពីការជម្រុញវិនិយោគ និងពាណិជ្ជកម្ម។
-->
សម្ដេចតេជោ ក៏សូមណែនាំដល់ស្ថាប័នពាក់ព័ន្ធរបស់កម្ពុជា ធ្វើការសិក្សានិងពិនិត្យលទ្ធភាពជាក់ស្ដែង ដាក់ចេញនូវយន្តការពិសេស ដើម្បីបង្កើនការសម្រួលពាណិជ្ជកម្ម និងផ្នែកឡូជីស្ទីក នៅតាមជាយដែនជាពិសេស ដើម្បីត្រៀមលក្ខណៈឆ្លើយតបទៅនឹងកំណើនយ៉ាកំហុស នៃការដឹកជញ្ជូនឆ្លងកាត់ព្រំដែន បន្ទាប់ពីគម្រោងផ្លូវល្បឿនភ្នំពេញ និងទីក្រុងហូជីមិញ មកប្រសព្វគ្នានៅច្រកព្រំដែនអន្តរជាតិបាវិត ដែលជាចំណុចប្រមូលផ្ដុំដ៏សំខាន់មួយ នៅក្នុងរបៀងសេដ្ឋកិច្ចភាគខាងត្បូង ក្នុងក្របខ័ណ្ឌមហាអនុតំបន់មេគង្គ។
គម្រោងហេដ្ឋារចនាសម្ព័ន្ធដ៏សំខាន់នេះ ត្រូវបានពន្យារពេល ចាប់តាំងពីបញ្ចប់ការសិក្សាលទ្ធភាពរបស់ JICA ក្នុងឆ្នាំ ២០១៧ ដោយសារថវិកា ដែលបានស្នើឡើងខ្ពស់ពេកប្រហែល៤ពាន់លានដុល្លារអាមេរិក។
សម្តេចតេជោបន្តថា ក្នុងវិស័យពាណិជ្ជកម្ម សម្តេចពិតជាមានក្តីមោទនភាព ចំពោះការកើនឡើងនូវទំហំពាណិជ្ជកម្មទ្វេភាគី ដែលកាលពីឆ្នាំ២០១៨ ទំហំពាណិជ្ជកម្មសរុបរវាងកម្ពុជា និងវៀតណាមសម្រេចបានចំនួន ប្រមាណជាង៤,៧ពាន់លានដុល្លារអាមេរិកគឺកើនឡើងប្រមាណជា២៤% ធៀបនឹងឆ្នាំ២០១៧។
ដោយឡែកក្នុងរយៈពេល ៦ខែដើមឆ្នាំ២០១៩ ទំហំពាណិជ្ជកម្មសរុបរវាងប្រទេសទាំងពីរសម្រេចបានចំនួន២,៧២ពាន់លានដុល្លារអាមេរិក ដែលយើងរំពឹងថា នឹងសម្រេចដល់ប្រមាណជា៥ពាន់លានដុល្លារអាមេរិក នៅដំណាច់ឆ្នាំនេះ។
ក្នុងវិស័យវិនិយោគវិញ ក្រុមប្រឹក្សាអភិវឌ្ឍន៍កម្ពុជាបានអោយដឹងថា គិតចាប់ពីឆ្នាំ ១៩៩៤ រហូតដល់ខែសីហាឆ្នាំ២០១៩ កម្ពុជាអនុម័តគម្រោងវិនិយោគរបស់ក្រុមហ៊ុនវៀតណាមចំនួន៨៤គម្រោង ក្នុងទុនវិនិយោគសរុបចំនួនប្រមាណជា២,៥ ពាន់លានដុល្លារអាមេរិក ក្នុងនោះវិស័យកសិកម្មមានចំនួនប្រមាណ២ភាគ៣ នៃគម្រោងវិនិយោគទាំងអស់។ ក្រោយពីគម្រោងវិនិយោគ ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា ក៏មានវត្តមាននៃការវិនិយោគក្រុមហ៊ុនវៀតណាម ក្នុងវិស័យនានាដូចជា វិស័យធនាគារ ធានារ៉ាប់រង សេវាកម្ម និងការលក់ដុំ លក់រាយជាដើម៕
