ដោយ ៖ រ៉ាណេត
មណ្ឌលគីរី៖ គម្រោងសាងសង់ព្រលានយន្តហោះខេត្តមណ្ឌលគីរីរហូតមកដល់ពេលនេះ ស្ថិតនៅក្នុងតំណាក់នៃការសិក្សានៅឡើយ ខណៈដែលរាជរដ្ឋាភិបាលកំពុងតែស្វែងរកក្រុមហ៊ុនវិនិយោគធ្វើជាដៃគូក្នុងការសាងសង់ និងអភិវឌ្ឍក្នុងតំបន់។
គម្រោងសាងសង់ព្រលានយន្តហោះ នៅតំបន់ភូមិភាគឦសាន ដែលស្ថិតនៅក្នុងស្រុកអូររាំង ខេត្តមណ្ឌលគីរី ពេលនេះត្រូវបានរដ្ឋាភិបាលសម្រេចធ្វើការហ៊ុព័ទ្ធទីតាំងគម្រោងដែលមានផ្ទៃដីប្រមាណ៣០០ហិកតា។
រដ្ឋលេខាធិការនៃអាកាសចរណ៍ស៊ីវិល លោក ស៊ិន ចាន់សេរីវុត្ថា បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី៩ ខែតុលា ឆ្នាំ២០១៩នេះថា គម្រោងអភិវឌ្ឍព្រលានយន្តនៅខេត្តមណ្ឌលគីរី ស្ថិតក្នុងស្រុកអូររាំង ដែលមានទំហំ ៣០០ ហិកតា ត្រូវបានរដ្ឋបាលខេត្តរៀបចំរួចរាល់ហើយ ប៉ុន្តែនៅមិនទាន់មានការឈូសឆាយនៅឡើយនោះទេ ព្រោះកំពុងតែស្ថិតនៅក្នុងតំណាក់កាលនៃការសិក្សានៅឡើយ។
លោកបានបន្តទៀតថា “គម្រោងនៃការសាងសង់ព្រលានយន្តខេត្តមណ្ឌលគីរី គឺស្ថិតនៅក្នុងអាទិភាពរបស់រាជរដ្ឋាភិបាលកម្ពុជា ដែលមានគណៈកម្មការកំណែទម្រង់សេដ្ឋកិច្ច និងពង្រឹងភាពប្រកួតប្រជែងកម្ពុជា ដោយមានឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន ជាប្រធាន និងឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ជាអនុប្រធាន ព្រមទាំងអន្តរក្រសួងជាច្រើនទៀតចូលរួម”។
លោកបានបន្តទៀតថា “បច្ចុប្បន្ននេះ នៅមិនទាន់មានសកម្មភាពណាមួយនៅលើទីតាំងគម្រោងនៅឡើយនោះទេ ពោលគឺស្ថិតនៅក្នុងដំណាក់កាលសិក្សាលម្អិតពីហេដ្ឋារចនាសម្ព័ន្ធ ការសាងសង់ ក៏ដូចជាទំហំនៃថវិកាដែលត្រូវចំណាយផងដែរ ដែលយ៉ាងតិចក៏ត្រូវចំណាយពេល៨ខែដែរ”។
លោក ស៊ិន ចាន់សេរីវុត្ថា បានមានប្រសាសន៍បន្តទៀតថា “គម្រោងនៃការសាងសង់ព្រលានយន្តហោះនៅក្នុងខេត្តមណ្ឌលគីរី ក្រៅពីជួយជំរុញ និងសម្រួលដល់វិស័យទេសចរណ៍ ថែមទាំងជួយគាំទ្រដល់វិស័យដឹកជញ្ជូនផលិតផលក្នុងស្រុកផងដែរ”។
លោកបន្តទៀតថា “ ជាទូទៅព្រលានយន្តក្នុងស្រុក សម្រាប់ផ្លូវរត់ត្រង់យ៉ាងហោចណាស់ ក៏ត្រូវមានប្រវែង១៨០០ម៉ែត្រ ប៉ុន្តែនៅក្នុងគម្រោងសាងសង់ព្រលានយន្តហោះថ្មីនេះអាចមានទំហំធំ និងវែងជាងនេះ ហើយត្រូវចំណាយពេលមិនតិចជាង៥ឆ្នាំនោះទេ”។
ជាមួយនឹងគម្រោងសាងសង់ព្រលានយន្តនៅក្នុងភូមិភាគប៉ែកឦសានមួយនេះ រដ្ឋមន្ត្រីក្រសួងទេសចរណ៍ លោក ថោង ខុន ធ្លាប់បានមានប្រសាសន៍ថា ខេត្តដែលស្ថិតនៅក្នុតំបន់ប៉ូលសេដ្ឋកិច្ចពិសេសនេះ ភាគច្រើនមានភាពល្អប្រសើរទៅលើវិស័យអេកូរទេសចរណ៍ និងវិស័យកសិឧស្សាហកម្ម។
លោកបន្តថា “វត្តមានព្រលានយន្តហោះនៅក្នុងតំបន់នេះ នឹងជួយសម្រួលដល់ការដឹកជញ្ជូនទាំងផលិតផលកសិផល ក៏ដូចជាបង្កើនភាពងាយស្រួលដល់ការអូសទាញផ្នែកទេសចរណ៍បានយ៉ាងប្រសើរ”។
លោកបានបញ្ជាក់ទៀត “ជាការបង្កើនចំណាប់អារម្មណ៍ និងភាពទាក់ទាញ ក្រសួងទេសចរណ៍ក៏មានគម្រោងបង្កើតជាសួនបន្លែធម្មជាតិ និងចំការផ្កាដែលមានទំហំនៅក្នុងតំបន់នេះ ដើម្បីជាសោភ័ណភាពសម្រាប់វិស័យទេសចរណ៍ និងសម្រាប់ធ្វើការនាំចេញទៅផ្គត់ផ្គង់នៅតាមបណ្តាខេត្តក្រុងនានាផងដែរ”៕
