ដោយ គង់ សូរិយា
ភ្នំពេញ៖ ទីបំផុតព្រលានយន្តហោះអន្តរជាតិភ្នំពេញថ្មី តម្លៃ១៥០០លានដុល្លារអាមេរិក បានកំណត់ពេលវេលាសាងសង់ ទំហំ និងទីតាំងជាក់លាក់ហើយ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលលោកស៊ិន ចាន់សិរីវុត្ថាបានថ្លែងឲ្យដឹងតាមទូរស័ព្ទនាព្រឹកថ្ងៃទី១៧ មករានេះថា ការសាងសង់ព្រលានយន្តហោះអន្តរជាតិភ្នំពេះថ្មីនេះ អាចនឹងចាប់ផ្តើមនៅដើមឆ្នាំ២០១៩ខាងមុខនេះ ដោយសារគំរោងនេះបានអនុម័យរួចហើយ មានដីរួចហើយ និងមានប្លង់ស្ថាបត្យកម្មរួចហើយ ហេតុនេះរង់ចាំតែពេលវេលាចចាររវាងរដ្ឋាភិបាល និងក្រុមហ៊ុនវិនិយោគសាងសង់ព្រលាននេះប៉ុណ្ណោះ។
លោកបន្តថា “ទៅតាំងសាងសង់ព្រលានយន្តហោះថ្មីនេះ ស្ថិតនៅតាមបណ្តោយផ្លូវជាតិលេខ២១ ជាតំបន់វាលបឹងកំផ្លោកដ៏ធំមួយ(ហៅបឹងរៀន) ដែលស្ថិតក្នុងរង្វង់ផ្លូវក្រវ៉ាត់ក្រុងទី៣នាពេលអនាគត”។លោកបន្តថា “បើសិនជាគិតពីកន្ទុយផ្លូវ៦០ម៉ែត្រ ឬផ្លូវសម្តេចតេជោហ៊ុន សែនគឺទីតាំងព្រលាននេះ មានចម្ងាយប្រមាណ៩គីឡូម៉ែត្រចេញពីកន្ទុយផ្លួវនេះឆ្ពោះទៅមុខ”។
លោកបន្តថា ទីតាំងព្រលានយន្តហោះនេះជាផ្ទៃបឹង ហើយនឹងត្រូវបូមខ្សាច់បំពេញនាពេលខាងមុខនេះ ដើម្បីចាប់ផ្តើមសាងសង់ព្រលានយន្តហោះ និងមជ្ឈមណ្ឌលពាណិជ្ជកម្មជុំវិញនេះ។
គំរោងសាងសង់ព្រលានយន្តហោះភ្នំពេញអន្តរជាតិនេះ ត្រូវបានចុះហត្ថលេខា ក្នុងកំឡុងដំណើរទស្សនកិច្ចរបស់លោកលី ខឺឈាងនាយករដ្ឋមន្រ្តីចិន ដែលបានមកទស្សនកិច្ចកម្ពុជាថ្មីៗនេះ។ គំរោងព្រលានយន្តហោះនេះ គ្រោងវិនិយោគទឹកប្រាក់១៥០០លានដុល្លារ សហការវិនិយោគដោយក្រុមហ៊ុនOCIC និង
ក្រុមហ៊ុនមួយ ដែលមានមូលដ្ឋានមកពីប្រទេសចិន ដោយរួមគ្នាបង្កើតក្រុមហ៊ុនមួយដាក់ឈ្មោះCambodia Airport Investment Co, Ltd។
លោកស៊ិន ចាន់សិរីវុត្ថាបានបន្តថា ទំហំព្រលានយន្តហោះនេះ មានទំហំជាង៧០០ហិកតា ប្រហាក់ប្រហែលនឹងព្រលានយន្តហោះអន្តរជាតិ ខេត្តសៀមរាបថ្មី ចំណែកផ្ទៃដីដែលនៅសល់ គឺជាទីតាំងសម្រាប់សាងសង់មជ្ឈមណ្ឌលពាណិជ្ជកម្ម និងលំនៅដ្ឋាននានា ព្រោះការវិនិយោគព្រលានយន្តហោះមិនអាចរកផលចំណេញបានទេ គឺមានតែការរៀបចំសេវាកម្ម និងមជ្ឈមណ្ឌលពាណិជ្ជកម្មគាំទ្រ ទើបអ្នកវិនិយោគអាចរកផលចំណេញបាន។
លោកបន្តថា “នេះជាគំរោងវិនិយោគដែលគេឲ្យឈ្មោះថា Airport Cityជាគំរោងវិនិយោគចម្រុះ ដែលមានទាំងព្រលានយន្តហោះ និងមជ្ឈមណ្ឌលពាណិជ្ជកម្ម”។
លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានថ្លែងស្វាគមន៍នូវគំរោងវិនិយោគដ៏ធំនេះ ស្របពេលកម្ពុជាបាននិងកំពុងស្ថិតក្នុងគោលដៅ នៃការធ្វើដំណើរកំសាន្តរបស់ភ្ញៀវទេសចរណ៍ទូទាំងពិភពលោក ហេតុនេះការសាងសង់ព្រលានយន្តហោះនេះជាការស្វាគមន៍ ប៉ុន្តែព្រលានយន្តហោះនេះ គួរមានទំហំធំ ដែលអាចឲ្យយន្តហោះប្រភេទ Boeing ធំៗ ចុះចតបាន ព្រោះសមត្ថភាពព្រលានយន្តហោះសព្វថ្ងៃនេះ មិនអាចឲ្យយន្តហោះខ្នាតធំចុះចតបានទេ។
លោកស្រីបន្តថា “ព្រលានយន្តហោះភ្នំពេញសព្វថ្ងៃកំពុងមមាញឹកហើយ ហេតុនេះ យើងត្រូវការព្រលានយន្តហោះថ្មីបែបនេះ ដើម្បីបំពេញតម្រូវការនៃការតភ្ជាប់ផ្លូវអាកាស និងការធ្វើដំណើរ”។លោកស្រីបន្តថា “ព្រលានយន្តហោះថ្មីនេះ ត្រូវតែមានសមត្ថភាពខ្ពស់ និងទទួលអ្នកដំណើរបានច្រើន ដើម្បីឆ្លើយតបនឹងកំនើនភ្ញៀវទេសចរណ៍អន្តរជាតិមកទស្សនាកម្ពុជា”៕
