ដោយ វុត្ថា
ភ្នំពេញៈ ក្រុមប្រឹក្សាជាតិអភិវឌ្ឍន៍ដោយចីរភាព កំពុងដាក់ចេញផែនការប្រែក្លាយក្រុងចំនួន៨ទីតាំង ឱ្យក្លាយជាទីក្រុងនិរន្តរភាពនៅត្រឹមឆ្នាំ២០៣០ខាងមុខ ដើម្បីធានាបានផាសុខភាព ការរស់នៅរបស់ប្រជាពលរដ្ឋ រួមទាំងធានាបាននូវការថែរក្សាបរិស្ថានផងដែរ។
ប្រធាននាយកដ្ឋានសេដ្ឋកិច្ចបៃតង នៃក្រុមប្រឹក្សាជាតិអភិវឌ្ឍន៍ នៃក្រសួងបរិស្ថានលោកតាំង ម៉េងអៀង បានមានប្រសាសន៍នៅក្នុងសិក្ខាសាលាត្រួតពិនិត្យលទ្ធផលការងារអភិវឌ្ឍន៍ដោយចីរភាពឆ្នាំ ២០១៩ និងទិសដៅការងារឆ្នាំ ២០២០ នាថ្ងៃទី ២១ ខែតុលាឆ្នាំ ២០១៩ នេះបានឱ្យដឹងថា ថ្មីៗនេះរដ្ឋាភិបាលបានដាក់ឱ្យប្រើប្រាស់ ផែនការអភិវឌ្ឍទីក្រុងនិរន្តរភាពសម្រាប់រាជធានីភ្នំពេញ២០១៨–២០៣០។
លោកបន្តថា “ផែនការអភិវឌ្ឍទីក្រុងចំនួន៧ទីតាំងផ្សេងទៀត អាចនឹងប្រកាសឱ្យប្រើប្រាស់នៅចុងឆ្នាំ២០១៩ រឺដើមឆ្នាំ២០២០ខាងមុខនេះ ដើម្បីផ្ដល់ផាសុខភាព និងភាពងាយស្រួលក្នុងការរស់នៅដល់ប្រជាពលរដ្ឋ ដោយប្រែក្លាយទីក្រុងទាំង៨ឱ្យក្លាយជាទីក្រុងនិរន្តរភាព នៅត្រឹមឆ្នាំ ២០៣០”។
លោកបន្ថែមថា ក្រុងចំនួន៧ ផ្សេងទៀត ដែលក្រុមប្រឹក្សាជាតិអភិវឌ្ឍន៍ដោយចីរភាព នឹងប្រែក្លាយឱ្យទៅជាទីក្រុងនិរន្តភាពសុទ្ធជាទីតាំងប៉ូលសេដ្ឋកិច្ច និងប៉ូលទេសចរណ៍ ដោយក្នុងនោះ រួមមាន ក្រុងសៀមរាប ក្រុងកែប ក្រុងព្រះសីហនុ ក្រុងកំពង់ចាម ក្រុងបាវិត ក្រុងសួង និងក្រុងបាត់ដំបង។
លោកតាំង ម៉េងអៀង បញ្ជាក់ទៀតថា ជុំវិញការងាររៀបចំ ទីក្រុងនិរន្តរភាពនេះ ជាការងារអន្តរក្រសួង ដោយមានក្រុមប្រឹក្សាជាតិអភិវឌ្ឍន៍ ប្រកបដោយចីរភាពជាអ្នកសម្របសម្រួលរួម មានការចូលរួមពីក្រសួង បរិស្ថាន ក្រសួងរៀបចំដែនដី ក្រសួងមួយចំនួនផ្សេងទៀត ទាក់ទងការដឹកជញ្ជូន ការរៀបចំប្រព័ន្ធលូ រួមទាំង មន្ត្រីថ្នាក់មូលដ្ឋាន។
លោកទិន ពន្លក អគ្គលេខាធិការនៃក្រុមប្រឹក្សាជាតិ អភិវឌ្ឍន៍ដោយចីរភាពបានឱ្យដឹងដែរថា ក្រឹមប្រឹក្សាអភិវឌ្ឍន៍ប្រកប ដោយនិរន្តរភាព បានបញ្ចប់ការសិក្សា និងប្រកាសដាក់ឱ្យប្រើប្រាស់នូវ ផែនការអភិវឌ្ឍន៍ទីក្រុងនិរន្តរភាព សម្រាប់រាជធានីភ្នំពេញ២០១៨-២០៣០ សំណើគោលនយោបាយសារពើពន្ធសម្រាប់យានយន្ត របាយការណ៍ស្តីពីដំណោះស្រាយផលប៉ះពាល់ ពីការប្រែប្រួលអាកាសធាតុ លើកំណើនសេដ្ឋកិច្ចក្នុប្រទេសកម្ពុជា។ របាយការណ៍ស្តីពីការកាត់បន្ថយហានិភ័យវិនិយោគ ក្នុងវិស័យថាមពលកកើតឡើងវិញនៅប្រទេសកម្ពុជា របាយការណ៍ជាតិលើកទី៦ ក្រោមអនុសញ្ញាសហប្រជាជាតិស្តីពីជីវៈចម្រុះ ។
លោកបន្ថែមថា អគ្គលេខាធិការដ្ឋាន កំពុងបន្តការសិក្សាស្រាវជ្រាវសំខាន់ៗ មួយចំនួនទៀត ទាក់ទងនឹងប្រសិទ្ធភាពថាមពលក្នុងវិស័យកាត់ដេរ ប្រសិទ្ធភាពសេដ្ឋកិច្ចនៃថាមពលពន្លឺព្រះអាទិត្យ ការទាញយកឥន្ធនៈពីសំណល់រឹង ការគ្រប់គ្រងសំណល់រាវបែបវិមជ្ឈការ ស្តង់ដាអគារបៃតង កម្មវិធីយានយន្តអគ្គិសនី បច្ចេកវិទ្យានុយក្លេអ៊ែរ ការទូទាត់សេវាកម្មប្រព័ន្ធអេកូឡូស៊ី។ល។ ៕
