ដោយ វុត្ថា
ភ្នំពេញៈ គោលនយោបាយអភិវឌ្ឍន៍ វិស័យឧស្សាហកម្មកម្ពុជា២០១៥-២០២៥ ត្រូវបានរដ្ឋាភិបាលកម្ពុជា ប្រកាសផ្សព្វផ្សាយដាក់ឱ្យអនុវត្ដកាលពីឆ្នាំ២០១៥ ដើម្បីឆ្លើយតបទៅនឹងការប្រែប្រួលនៃ រចនាសម្ព័ន្ធសេដ្ឋកិច្ចក្នុងស្រុកនិង សភាពការណ៍ប្រែប្រួលនៃនិម្មាបនកម្មសេដ្ឋកិច្ចតំបន់ និងពិភពលោក។
គោលនយោបាយនេះ គឺជាមគ្គុទេសក៍ជំរុញការអភិវឌ្ឍវិស័យ ឧស្សាហកម្មនៅកម្ពុជា តាមរយៈការធ្វើពិពិធកម្មសេដ្ឋកិច្ច ការពង្រឹងភាពប្រកួតប្រជែង និងការលើកកម្ពស់ផលិតភាព ហើយគោលនយោបាយនេះ នឹងក្លាយជាឧបករណ៍សំខាន់ ក្នុងការរួមចំណែកសម្រេចបាននូវទិសដៅ នៃយុទ្ធសាស្ដ្រចតុកោណ ដើម្បីកំណើនការងារសមធម៌ និងប្រសិទ្ធភាព។
ក្នុងទិសដៅនេះ គោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥ បានកំណត់នូវគោលដៅចំនួន៣ រួមមាន ដូចជា ទី១-បង្កើនចំណែកនៃវិស័យ ឧស្សាហកម្មក្នុងផលទុនជាតិសរុប(ផ.ស.ស) ឱ្យបានដល់៣០ភាគរយនៅឆ្នាំ២០២៥(២៤,១ភាគរយនៃផ.ស.ស.នៅឆ្នាំ២០១៣) ដែលវិស័យកម្មន្ដសាលត្រូវកើនឡើងពី១៥,៥ភាគរយ នៃផ.ស.ស.នៅឆ្នាំ២០១៣ ទៅដល់២០ភាគរយនៅឆ្នាំ២០២៥។
ទី២-ជំរុញពិពិធកម្មមុខទំនិញដោយ បង្កើនការនាំចេញទំនិញកម្មន្ដសាល មិនមែនជាវាយនភ័ណ្ឌឱ្យបាន១៥ភាគរយ នៃបរិមាណនាំចេញសរុបនៅឆ្នាំ២០២៥។ ទន្ទឹមនឹងការជំរុញការនាំចេញ ទំនិញកែច្នៃកសិកម្មឱ្យបាន១២ភាគរយ នៃបរិមាណនាំចេញសរុបនៅឆ្នាំ២០២៥។
ទី៣-កំណត់គោលដៅនៅឆ្នាំ២០២៥ ឱ្យសហគ្រាសធុនតូចចំនួន៨០ភាគរយ និងសហគ្រាសធុនមធ្យមចំនួន៩៥ភាគរយ ត្រូវបានចុះបញ្ជីជាផ្លូវការហើយ សហគ្រាសធុនតូចចំនួន៥០ភាគរយ និងសហគ្រាសធុនមធ្យមចំនួន៧០ភាគរយ មានបញ្ជីការគណនេយ្យនិងតារាងតុល្យការត្រឹមត្រូវ៕
