ដោយវុត្ថា
ភ្នំពេញ៖ ក្រុមហ៊ុន Air Asia បានបង្ហាញមហិច្ឆិតារបស់ខ្លួនក្នុងការបង្កើត Cambodia Air Asia នៅក្នុងប្រទេសកម្ពុជា ខណៈក្រុមហ៊ុននេះមើលឃើញពីវិស័យអាកាសចរណ៍នៅក្នុងប្រទេសកម្ពុជាកាន់តែរីកច្រើនយ៉ាងខ្លាំងនៅក្នុងរយៈពេលប៉ុន្មានចុងក្រោយនេះ។
លោក Bo Lingam ប្រធានក្រុមហ៊ុន Air Asia បានមានប្រសាសន៍បែបនេះ នៅក្នុងជំនួបសំដែងការគួរសម និងពិភាក្សាការងារ ស្តីពីបំណងចង់បង្កើតក្រុមហ៊ុន Air Asia នៅប្រទេសកម្ពុជា (Cambodia Air Asia) ជាមួយ លោកនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរស៊ីវិល កាលពីពេលថ្មីៗនេះ។
លោកថា ដោយមើលឃើញពីវិស័យអាកាសចរណ៏ កាន់តែរីកចម្រើនជាលំដាប់ និងភ្ញៀវទេសចរណ៏មានកំណើនឱ្យកត់សំគាល់ ក្រុមហ៊ុន Air Asia ដែលជាក្រុមហ៊ុនអាកាសចរណ៏សំបុត្រថោក (Low Cost Carrier -LCC) មានយន្តហោះច្រើនជាងគេបំផុតនៅអាស៊ី និងហោះទៅកាន់គោលដៅចំនួន ១៦៥ ជុំវិញពិភពលោក ចង់បង្កើតក្រុមហ៊ុនអាកាសចរណ៍ Cambodia Air Asia ។
លោកនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរស៊ីវិល បានស្វាគមន៏ នូវបំណង ក្រុមហ៊ុន Air Asia ដែលជាក្រុមហ៊ុនអាកាសចរណ៏សំបុត្រថោក (Low Cost Carrier -LCC) ចង់បង្កើតក្រុមហ៊ុនអាកាសចរណ៍ Cambodia Air Asia ព្រោះប្រទេសកម្ពុជា មានសុខសន្តិភាព មានការរីកចម្រើនផ្នែកសេដ្ឋកិច្ច និងជាប្រទេសដែលជាប់លំដាប់ថ្នាក់លេខ ៣ ផ្នែកបរិយាកាសវិនិយោគនៅអាស៊ីសម្រាប់ការវិនិយោគបរទេស។
លោករដ្ឋមន្រ្តី បានណែនាំឱ្យតំណាងក្រុមហ៊ុន Air Asia ធ្វើការជាមួយមន្ត្រីជំនាញរបស់ រដ្ឋលេខាធិការដ្ឋានអាកាសចរស៊ីវិល មុននឹងស្នើសុំគោលការណ៏អនុញ្ញាតិ ទៅប្រមុខរដ្ឋាភិបាលនាពេលឆាប់ៗខាងមុខ។
លោក Fernandes នាយកប្រតិបត្តិ និងជាសហស្ថាបនិកក្រុមហ៊ុន AirAsia Group បានប្រាប់សារព័ត៌មាន Nikkei Asian Review ក្នុងបទសម្ភាសន៍មួយកាលពីពេលថ្មីៗនេះថា លោកកំពុងយកចិត្តទុកដាក់ក្នុងការយកកម្ពុជាជាដៃគូអាជីវកម្ម។ លោកថា “ខ្ញុំចូលចិត្តកម្ពុជា ចិន និងមីយ៉ាន់ម៉ា បន្ទាប់ពីការចចារបរាជ័យក្នុងគោលបំណងបង្កើតសម្ព័ន្ធភាពនៅវៀតណាមកាលពីដើមឆ្នាំ ២០១៩កន្លងមកនេះ”។ លោកបន្តថា ថា “ខ្ញុំមិនមានគម្រោងអ្វីទេនៅវៀតណាមសម្រាប់ពេលនេះ បន្ទាប់ពីព្យាយាម ៣ ដង។
លោកបន្តថា សម្រាប់ច្បាប់របស់កម្ពុជាមិនរឹតត្បិតកម្មសិទ្ធិបរទេសក្នុងឧស្សាហកម្មអាកាសចរណ៍ក្នុងស្រុកទេ ប៉ុន្តែក្រុមហ៊ុនអាកាសចរណ៍ថ្មីត្រូវទាមទារឱ្យមានវិនិយោគរហូតដល់ ៣០ លានដុល្លារនៅក្នុងប្រទេសនេះក្នុងអំឡុងពេល ៣ ឆ្នាំដំបូងដោយមិនរាប់បញ្ចូលយន្តហោះ។
លោកបន្ថែមថា ប្រទេសកម្ពុជាកំពុងកើនឡើងនូវប្រជាប្រិយភាព និងជាគោលដៅទេសចរណ៍ ហើយបានទាក់ទាញក្រុមហ៊ុនអាកាសចរណ៍ដែលគាំទ្រដោយចិនជាច្រើនរួចទៅហើយ ដោយមានក្រុមហ៊ុនអាកាសចរណ៍ចំនួន ៦ គ្រោងនឹងបញ្ចូលគ្នា។នៅខាងក្រៅរាជធានីភ្នំពេញ អាកាសយានដ្ឋានអន្តរជាតិសៀមរាបរបស់ប្រទេសកម្ពុជាគឺមួយក្នុងចំណោមអាកាសយានដ្ឋានអន្តរជាតិមមាញឹកបំផុតនៅអាស៊ីអាគ្នេយ៍៕
