ដោយនៅ ស៊ីវុត្ថា
ភ្នំពេញៈ ការសម្រេចចិត្តចាប់ផ្ដើមដំណើរការអាជីវកម្ម ជារឿងគួរឲ្យរំភើបមួយសម្រាប់មនុស្សគ្រប់រូប ប៉ុន្ដែសូមកុំគិតថាវាជារឿងងាយស្រួលក្នុងការធ្វើវានោះទេ ហើយវាក៏មិនដូចជាការនិទានរឿង ឬអានសៀនភៅនោះដែរ។
ប្រសិនបើអ្នកចង់ឲ្យអាជីវកម្មរបស់អ្នក ឲ្យទទួលបានជោគជ័យយូរអង្វែង សូមពិចារណាពីមូលដ្ឋានគ្រឹះសំខាន់ៗ៤ខាងក្រោមនេះ៖
១. មានដើមទុនគ្រប់គ្រាន់
រយៈពេលរកចំណូលបានសម្រាប់ក្រុមហ៊ុននីមួយៗខុសគ្នា ប៉ុន្ដែគោលការណ៍គ្រឹះគឺដូចគ្នា មានប្រាក់គ្រប់គ្រាន់ ដើម្បីផ្គត់ផ្គង់អាជីវកម្មរបស់អ្នកសម្រាប់រយៈពេល៦ខែ។ គម្រោងថវិកាអាជីវកម្ម អាចជួយទ្រទ្រង់អាជីវកម្មរបស់អ្នក បានរយៈពេលពីរបីខែដំបូង ហើយវាមានសារៈសំខាន់ណាស់សម្រាប់ភាពជោគជ័យ។ អ្នកត្រូវដឹងថា ក្នុងរយៈពេលពីរបីខែដំបូង អ្នកប្រហែលជាមិនទាន់ទទួលបានចំណូលមកវិញឡើយ ដូច្នេះថវិកាបម្រុងមានសារៈសំខាន់ ក្នុងការជួយធ្វើឲ្យអាជីវកម្មរបស់អ្នកលូតលាស់ឡើងក្នុងដំណាក់កាលដំបូង។
២. យុទ្ធសាស្ត្រទីផ្សារ និងការលក់
មានផលិតផល និងសេវាកម្មល្អគឺរឿងអស្ចារ្យមួយ ប៉ុន្ដែអាជីវកម្មរបស់អ្នកអាចនឹងដួលរលំបានប្រសិនបើអ្នកគ្មានអតិថិជន។ អភិវឌ្ឍន៍ផែនការទីផ្សារ ដោយធ្វើយ៉ាងណាឲ្យអតិថិជនទទួលស្គាល់ផលិតផល ឬសេវាកម្មរបស់អ្នក។ មុនដំបូងនៅពេលចាប់ផ្ដើម អ្នកត្រូវរៀបចំយុទ្ធសាស្ត្រ ទាក់ទងជាមួយអតិថិជនគោលដៅ ដើម្បីកសាងមូលដ្ឋាននៃភាពស្មោះត្រង់។
បន្ទាប់មកសាងសង់រចនាសម្ព័ន្ធនៃការលក់របស់អ្នក៖ គិតអំពីកិច្ចសន្យាការលក់ កាតាឡុកផលិតផល ឬក៏អ្វីផ្សេងទៀតដែលអតិថិជន នឹងមើលឃើញនៅពេលពួកគេចង់ទិញផលិតផលពីក្រុមហ៊ុនរបស់អ្នក។
៣. ធនធានមនុស្ស
ធនធានមនុស្ស គឺកត្តាចាំបាច់សម្រាប់ធ្វើអាជីវកម្ម ឱ្យទទួលបានជោគជ័យ។ មនុស្សជាច្រើនបានព្យាយាម ចាប់ផ្តើមអាជីវកម្មផ្ទាល់ខ្លួនរបស់ពួកគេ ដោយមិនចាំបាច់មានចំណេះដឹងផ្នែកជំនួញ ដែលពួកគេត្រូវការដើម្បីធ្វើឱ្យអាជីវកម្ម របស់ពួកគេទទួលបានជោគជ័យហើយ អាជីវកម្មរបស់ពួកគេបានបរាជ័យ។
ដើម្បីចាប់ផ្តើមអាជីវកម្មអ្នក ត្រូវតែមានចំណេះដឹងអំពីទិដ្ឋភាពផ្សេងៗគ្នា នៃអាជីវកម្មនិងមានជំនាញផ្សេងៗជាច្រើន ... ឬយ៉ាងហោចណាស់បានធ្វើការស្រាវជ្រាវ ដើម្បីស្វែងរក និងជួលមនុស្ស ដែលមានជំនាញដែលអ្នកខ្វះខាត។
៤.អំណត់
ចំណុចដែលពិបាកបំផុតក្នុងនាមជាសហគ្រិន គឺភាពអំណត់អត់ធ្មត់ចំពោះបញ្ហាប្រចាំថ្ងៃក្នុងការដំណើរការអាជីវកម្មរបស់អ្នក។ មនុស្សជាច្រើនគិតខុសថា ការរកស៊ីប្រៀបដូចជាការដើរកម្សាន្តក្នុងសួន។ ជាការពិត ការធ្វើអាជីវកម្មមានប្រយោជន៍ច្រើន ដូចជា វាជាការធ្វើការឲ្យខ្លួនឯង អ្នកមានកាលវិភាគការងារដែលអាចបត់បែនបាន ហើយអ្នកក៏មានភាពរីករាយចំពោះជោគជ័យ ដែលកើតចេញពីការខិតខំរបស់អ្នក។ ប៉ុន្ដែអត្ថប្រយោជន៍ទាំងនោះកើត ចេញពីការបណ្ដាក់ទុនផ្ទាល់ខ្លួន ក៏ដូចកេរិ៍ដឈ្មោះរបស់អ្នកដែរ។
មុននឹងចាប់ផ្ដើមអាជីវកម្មផ្ទាល់ខ្លួនរបស់អ្នក ត្រូវប្រាកដថាអ្នកត្រៀមរួចជាស្រេចទាំងចិត្តគំនិត និងរាងកាយ ដើម្បីដើរលើផ្លូវមួយនេះ។ អ្នកត្រូវត្រៀមខ្លួនសម្រាប់ដើរលើផ្លូវដ៏វែងឆ្ងាយ ធ្វើអ្វីដែលពិបាកៗ បូជាទាំងចិត្តទាំងកាយ ខិតខំធ្វើការចំពោះអ្វីដែលអ្នកជឿជាក់ថាវានឹងជោគជ័យ។ ប្រសិនបើអ្នកមិនជឿជាក់ ១០០%ទេ អាជីវកម្មរបស់អ្នកនឹងគ្មានសក្ដានុពលពេញលេញឡើយ៕
