ដោយៈ រ៉ាណេត
ព្រុយណេៈ រដ្ឋមន្ត្រីក្រសួងទេសចរណ៍កម្ពុជា បានជួបពិភាក្សាទ្វេភាគីជាមួយ រដ្ឋមន្ត្រីក្រសួងព័ត៌មាន វប្បធម៌ និងទេសចរណ៍ឡាវ ដោយបានពិភាក្សាជំរុញការងារ ស្តីពីកិច្ចសហប្រតិបត្តិការទេសចរណ៍រវាងប្រទេសទាំងពីរ ដោយធ្វើយ៉ាងណាពង្រឹងវិស័យនេះឱ្យមានភាពល្អប្រសើរ ព្រមទាំងអស់អូសទាញទេសចរមកពីបណ្តាប្រទេសនានាផងដែរ។
នៅក្នុងកិច្ចពិភាក្សាជាផ្លូវការរវាងថ្នាក់ដឹកនាំប្រទេសទាំង២ លោក ថោង ខុន រដ្ឋមន្ត្រីក្រសួងទេសចរណ៍កម្ពុជា ដែលបានធ្វើឡើងនៅប្រទេសប្រុយណេ ភាគីទាំងពីរបានលើកឡើងពីចំណុចសំខាន់ៗ ដែលត្រូវយកចិត្តទុកពង្រឹងទៅកាន់ លោក គិកែវ ខាយ ខាំភិធូន (Kikeo Khaykhamphithoune) រដ្ឋមន្ត្រីក្រសួងព័ត៌មាន វប្បធម៌ និងទេសចរណ៍ឡាវថា ដើម្បីជំរុញឱ្យវិស័យទេសចរណ៍នៃប្រទេសទាំង២ មានភាពល្អប្រសើរព្រមគ្នាត្រូវអនុវត្តនូវកម្មវិធីមួយចំនួនដែលសុទ្ធតែមានប្រសិទ្ធភាពខ្ពស់។
លោកថោង ខុន បានបញ្ជាក់ថា ចំណុចសំខាន់ៗទាំងអស់រួមមានទី១- ជំរុញទេសចរណ៍បើកបរខ្លួនឯង (Self-driving Tour) រវាងប្រទេសទាំង២ ដោយធ្វើការសម្រួលបែបបទផ្សេងៗ ឲ្យមានភាពងាយស្រួល ដល់អ្នកដំណើរនៅពេលបើកបរឆ្លងកាត់ព្រំដែននៃប្រទេសទាំង២។ ទី- ២ ពិភាក្សាលើលទ្ធភាពឲ្យមានការហោះហើរត្រង់ ពីប្រទេសឡាវមកតំបន់ឆ្នេរសមុទ្រកម្ពុជា។ ទី- ៣ ចែករំលែកបទពិសោធន៍ និងអភិវឌ្ឍន៍រួមគ្នាលើសហគមន៍ទេសចរណ៍ និងអេកូទេសចរណ៍ ក្នុងក្របខណ្ឌនៃតំបន់តី្រកោណអភិវឌ្ឍន៍ និងទី- ៤ ជំរុញឲ្យកាន់តែខ្លាំងឡើងថែមទៀត នៃកិច្ចសហប្រតិបត្តិការក្នុងក្របខណ្ឌអនុតំបន់នានា ដូចជា កិច្ចសហប្រតិបត្តិការមហាអនុតំបន់ទន្លេមេគង្គ កិច្ចសហប្រតិបត្តិការមេគង្គ-ឡានឆាង កិច្ចសហប្រតិបត្តិការ ACMECS កិច្ចសហប្រតិបត្តិការ CLMV កិច្ចសហប្រតិបត្តិការ CLV។
បន្ទាប់ពីបានជួបជជែក និងរកដំណោះស្រាយបញ្ហារួចរាល់ ភាគីទាំង២បានសម្តែងនូវការពេញចិត្ត ចំពោះកិច្ចសហប្រតិបត្តិការកន្លងមក ក្នុងស្មារតីមិត្តភាព និងសាមគ្គីភាពជាបងប្អូន ដែលធ្លាប់ឆ្លងកាត់ពេលវេលាដ៏លំបាកពីអតីតកាល។ ភាគីទាំងពីរក៏បានឯកភាពគ្នាជំរុញឲ្យមានការ ចុះអនុស្សរណៈយោគយល់គ្នាស្តីពី កិច្ចសហប្រតិបត្តិការលើវិស័យទេសចរណ៍ ហើយភាគីឡាវបានទទួលយកការអញ្ជើញរបស់ លោក ថោង ខុន រដ្ឋមន្ត្រីទេសចរណ៍កម្ពុជា មកទស្សនកិច្ចនៅកម្ពុជានាពិធីបុណ្យសមុទ្រលើកទី៩ ចុងឆ្នាំ២០២០ នៅកម្ពុជា។
តាមស្ថិតិជាបឋមឆ្នាំ២០១៩ កម្ពុជាបានទទួលស្វាគមន៍ទេសចរបរទេសសរុបប្រមាណ៦.៧លាននាក់ កើនឡើងប្រមាណ៨% ក្នុងនោះរយៈពេល១០ខែ ទេសចរឡាវមានចំនួន២៦៤,២៤៣នាក់ ឈរនៅលំដាប់ទី៤នៃទីផ្សារធំៗទាំង១០៕
