ដោយវុត្ថា
ភ្នំពេញ៖ រាជរដ្ឋាភិបាលកម្ពុជាមានទិសដៅអភិវឌ្ឍប្រទេសឱ្យកាន់តែប្រសើរប្រកបដោយបរិយាបន្ននិងចីរភាព ផ្ដល់ឱ្យប្រជាជននូវសេចក្ដីសុខ រក្សាបាននូវឯករាជ្យភាព បូរណភាពដែនដី និងប្រទេសជាតិមានសន្តិសុខនិងសុវត្ថិភាពសង្គមល្អ។ សម្រាប់ទិសដៅនេះ រាជរដ្ឋាភិបាលបានដាក់ចេញនូវចក្ខុវិស័យកម្ពុជាឆ្នាំ២០៥០ សំដៅធ្វើឲ្យកម្ពុជាបានក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។
ជាមួយគ្នានេះ រដ្ឋាភិបាលក៏បានដាក់ចេញនូវគោលនយោបាយជាតិ ស្តីពី វិទ្យាសាស្រ្ត បច្ចេកវិទ្យា និងនវានុវត្តន៍ ឆ្នាំ២០២០-២០៣០ ក្នុងគោលបំណងពង្រឹងមូលដ្ឋានគ្រឹះ និងកែលម្អបរិយាកាស នៃ វិទ្យាសាស្ត្រ បច្ចេកវិទ្យា និងនវានុវត្ដន៍ និងកសាងប្រព័ន្ធអេកូនវានុវត្តន៍ ដើម្បីអភិវឌ្ឍប្រកបដោយចីរភាពនិងលើកកម្ពស់គុណភាពជីវភាពប្រជាជនឲ្យកាន់តែប្រសើរនៅគ្រប់កម្រិតនិងគ្រប់វិស័យ។
ដើម្បីធ្វើឲ្យសម្រេចបាននូវគោលបំណងនេះ ស្របតាមចក្ខុវិស័យកម្ពុជាឆ្នាំ២០៥០ ការអភិវឌ្ឍវិទ្យាសាស្រ្ត បច្ចេកវិទ្យា និងនវានុវត្តន៍ ត្រូវសម្រេចគោលដៅសំខាន់ៗ ចំនួនប្រាំគឺ៖ ទី១-កសាងនិងពង្រឹងធនធានមនុស្សបានគ្រប់គ្រាន់ ទាំងបរិមាណ គុណភាព និងសមាសភាព មានសីលធម៌វិជ្ជាជីវៈ និងសមភាពយេនឌ័រ ។
ទី២-ផ្ដល់លទ្ធភាពឲ្យធនធានមនុស្សឆ្នើម ខាង វិទ្យាសាស្ត្រ បច្ចេកវិទ្យា និងនវានុវត្ដន៍បំពេញភារកិច្ចឈានមុខ និងមានយន្តការសម្រាំង និងលើកទឹកចិត្ត ដើម្បីឲ្យធនធានមនុស្សខាងវិទ្យាសាស្ត្រ បច្ចេកវិទ្យា និងនវានុវត្ដន៍ជាតិ ពេញសមត្ថភាព។
ទី៣-ផ្តល់លទ្ធភាពដល់សកម្មភាពស្រាវជ្រាវនិងអភិវឌ្ឍជាតិប្រកបដោយប្រសិទ្ធភាព និងស័ក្តិសិទ្ធភាព ដោយផ្ដោតលើការសម្របបច្ចេកវិទ្យាដែលទទួលបានទៅនឹងស្ថានភាព ជាក់ស្តែងក្នុងស្រុក ជាមួយគ្នានោះ បង្កើនសមត្ថភាពស្រូបយកបច្ចេកវិទ្យាអន្តរជាតិ។
ទី៤-កសាងនិងពង្រឹងប្រព័ន្ធអេកូនវានុវត្តន៍ ប្រកបដោយជវភាព មានសមត្ថភាពសំយោគបច្ចេកវិទ្យា និងវិស្វកម្មឲ្យបានជាស្នាដៃជាតិ មានកម្រិតនវានុវត្តន៍កាន់តែប្រសើរ សំដៅលើកស្ទួយឧស្សាហកម្ម និងធុរកិច្ចជាអាទិភាពជាតិបម្រើឲ្យការប្រើប្រាស់ក្នុងស្រុក និងការនាំចេញកាន់តែប្រសើរឡើង។
និង ទី៥-បណ្ដុះឱ្យមានវប្បធម៌វិទ្យាសាស្ត្រ បច្ចេកវិទ្យា និងនវានុវត្ដន៍នៅក្នុងសង្គមប្រកបដោយ បរិយាបន្ន មានជំនឿទំនុកចិត្តជាសាធារណៈលើផលិតផល និងសេវាដែលប្រើបច្ចេកវិទ្យាជាតិ ទទួលបាននូវការពេញចិត្តទៅលើលទ្ធផលនៃការខិតខំ និងវិនិយោគលើការអភិវឌ្ឍវិទ្យាសាស្ត្រ បច្ចេកវិទ្យា និងនវានុវត្ដន៍របស់ខ្លួន ក៏ដូចជាទៅលើការកែទម្រង់អភិបាលកិច្ចផ្នែកវិទ្យាសាស្ត្រ បច្ចេកវិទ្យា និងនវានុវត្ដន៍៕
