ដោយវុត្ថា
ភ្នំពេញ៖ កិច្ចសហប្រតិបត្តិការរវាងកម្ពុជា និងកូរ៉េ កាន់តែប្រសើឡើង និងកាន់តែទូលំទូលាយ។ ជាក់ស្តែង គិតត្រឹមឆ្នាំ ២០១៩ សាធារណរដ្ឋកូរ៉េបានផ្តល់បើកផ្តល់ហិរញ្ញប្បទានប្រមាណ ៧០១ លានដុល្លារអាមេរិក ក្នុងនោះ ហិរញ្ញប្បទានឥតសំណងមានទំហំប្រមាណ ៣១២ លានដុល្លារអាមេរិក ។
នេះ បើយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ចេញផ្សាយនៅថ្ងៃទី ២៧ ខែកុម្ភៈ ឆ្នំា ២០២០ នេះ បន្ទាប់ពីកិច្ចប្រជុំរវាងមន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា និងមន្ត្រីជាន់ខ្ពស់នៃទីភ្នាក់ងារសហប្រតិបត្តិការអន្តរជាតិកូរ៉េ – KOICA ប្រចាំកម្ពុជាកាលពីពេលថ្មីៗកន្លងមក។
លោក ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា បានស្វាគមន៍យ៉ាងកក់ក្ដៅ និងបានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនកូរ៉េ ដែលជានិច្ចកាលបានគាំទ្រកម្ពុជា និងជាដៃគូដ៏ល្អក្នុងកិច្ចសហប្រតិបត្តិការអភិវឌ្ឍន៍ ។
សេក្តីប្រកាសព័ត៌មានដដែលបញ្ជាក់ថា ភាគីកម្ពុជា-កូរ៉េ បានពិភាក្សា និងផ្តាល់ប្តូរយោបល់អំពី ១) កម្មវិធីទស្សនកិច្ចផ្លូវការរបស់ប្រធានទីភ្នាក់ងារ KOICA មកកាន់កម្ពុជានាពេលខាងមុខ ២) វឌ្ឍនភាពនៃការអនុវត្តគម្រោងកិច្ចសហប្រតិបត្តិការរបស់ទីភ្នាក់ងារ KOICA ក្នុងឆ្នាំ ២០២០ និង ៣) ពិនិត្យសំណើរគម្រោងអនុវត្តក្នុងឆ្នាំ ២០២១ និង ឆ្នាំ ២០២២៕
