ដោយ ប៊ី
ភ្នំពេញៈ អ្នកដំណើរឆ្លងកាត់អាកាសយានដ្ឋាន អន្តរជាតិកម្ពុជាទាំង៣ ក្នុងឆ្នាំ ២០២០ ត្រូវបានព្យាករណ៍ថានឹងបន្តកើនឡើង ប៉ុន្តែក្នុងល្បឿនយឺតជាង។ នេះបើយោងតាមតួលេខពីត្រីមាសចុងក្រោយ នៃឆ្នាំ២០១៩ របស់ក្រុមហ៊ុន Cambodia Airports។
ការព្យាករណ៍នេះត្រូវបានធ្វើឡើង បន្ទាប់ពីកំណើនពីរខ្ទង់ បានកើតឡើងក្នុងឆ្នាំបន្តបន្ទាប់គ្នា។ នេះបើយោងតាមការរាយការណ៍របសសែតអន្តរជាតិមួយ។
យោងតាមរបាយការណ៍របស់ក្រុមហ៊ុន Cambodia Airports អ្នកដំណើរបានកើនឡើង១០,២ ភាគរយពីមួយឆ្នាំទៅមួយឆ្នាំនៅក្នុងឆ្នាំ២០១៩ ដល់អ្នកដំណើរចំនួន ១១,៦ លាននាក់។
លោក ខែក ណូរីនដា ប្រធានផ្នែកទំនាក់ទំនងនៃ Societe Concessionnaire de l’Aeroport ត្រូវបានរាយការណ៍ថា ការធ្លាក់ចុះនៃកំណើននៅអាកាសយានដ្ឋានអន្តរជាតិសៀមរាប គឺជាកត្តាសំខាន់មួយដែលអាចបន្ថយល្បឿននៃកំណើន។
លោកបានថ្លែងថា “វាគឺជាការសន្មត់ ផ្អែកលើរយៈពេលបីខែចុងក្រោយ នៃឆ្នាំ ២០១៩ នៅពេលដែលកំណើនអ្នកដំណើរធ្លាក់ចុះ៣,១ភាគរយ ដែលឆ្លុះបញ្ចាំងពីតំរូវការអាកាសចរណ៍ពិភពលោកធ្លាក់ចុះ ការធ្លាក់ចុះនៃការមកដល់ខេត្តសៀមរាប និងការថយចុះនៃចរាចរណ៍ បន្ទាប់ពីសកម្មភាពមួយចំនួននៅខេត្តព្រះសីហនុ”។
យោងតាមតួលេខពីក្រុមហ៊ុន Cambodia Airports អាកាសយានដ្ឋានភ្នំពេញបានដឹកអ្នកដំណើរចំនួន៦លាននាក់ កើនឡើងពីមួយឆ្នាំទៅមួយឆ្នាំគឺកើនឡើង១១,២% ខណៈអាកាសយានដ្ឋានអន្តរជាតិ ក្រុងព្រះសីហនុមានការកើនឡើង១៥៨% ពីមួយឆ្នាំទៅមួយឆ្នាំដល់១,៦ លាននាក់។
ម្យ៉ាងវិញទៀតអាកាសយានដ្ឋានខេត្តសៀមរាប ជួបប្រទះការធ្លាក់ចុះនៃកំណើន ១២,៣% ពីមួយឆ្នាំទៅមួយឆ្នាំមកត្រឹម៣,៩ លាននាក់។
ក្រុមហ៊ុនCambodia Airport បានឱ្យដឹងនៅក្នុងរបាយការណ៍ថា “នៅក្នុងប្រទេសកម្ពុជា និន្នាការចរាចរណ៍អ្នកដំណើរ នៅតែមានលក្ខណៈវិជ្ជមានពេញមួយឆ្នាំ បើទោះបីជាការធ្លាក់ចុះនៅត្រីមាសទីបួន ដែលឆ្លុះបញ្ចាំងពីការធ្លាក់ចុះ នៃទេសចរណ៍ចិននៅខេត្តសៀមរាប ដែលត្រូវបានទូទាត់ដោយកំណើនចរាចរណ៍ នៅអាកាសយានដ្ឋានព្រះសីហនុក៏ដោយ”។
ចំនួនភ្ញៀវទេសចរបរទេស ដែលមកទស្សនាខេត្តសៀមរាប ដែលមានប្រាសាទអង្គរវត្ត ដ៏ល្បីឈ្មោះបានថយចុះក្នុងឆ្នាំ២០១៩។ ពួកគេភាគច្រើនជាភ្ញៀវទេសចរចិនដែលបានផ្លាស់ប្តូរទិសដៅ នៃជម្រើសរបស់ពួកគេ ទៅកាន់តំបន់ឆ្នេរសមុទ្រជា ពិសេសនៅក្នុងខេត្តព្រះសីហនុ៕
