ដោយ ៖ រ៉ាណេត
ភ្នំពេញ ៖ ក្រោមឥទ្ធិពលនៃបញ្ហាដែលបណ្តាលមកពីការរីករាលដាល និងរាតត្បាតនៃជំងឺរលាកផ្លូដង្ហើម Covid-19 បានធ្វើឱ្យកំណើនភ្ញៀវទេសចរជួបភាពប្រឈមគួរឱ្យព្រួយបារម្ភ ដោយត្រឹមរយៈពេល២ខែ ដើមឆ្នាំ២០២០នេះ មានធ្លាក់ចុះប្រមាណ១០ភាគរយនៅទូទាំងប្រទេស។
អ្នកនាំពាក្យ និងជារដ្ឋលេខាធិការក្រសួងទេសចរណ៍ លោក ទិត ចន្ថា បានមានប្រសាសន៍នៅក្នុងសន្និសីទសារព័ត៌មានកាលពីថ្ងៃទី២ ខែមីនា ឆ្នាំ២០២០ ថា នៅក្នុងខែមករា និងខែកុម្ភៈ ដើមឆ្នាំ២០២០ កន្លងទៅនេះ ដោយសារតែបញ្ហាជំងឺរលាកផ្លូវដង្ហើម ឬ Covid-19 បានធ្វើឱ្យអ្នកទេសចរថយចុះប្រមាណ ១០ភាគរយ ដោយក្នុងភ្ញៀវទេសចរអន្តរជាតិប្រមាណ ១៥ភាគរយ នៅទូទាងប្រទេសកម្ពុជា ដោយក្នុងនោះតំបន់ទេសចរណ៍ដែលមានភាពប្រឈមខ្លាំងគឺនៅក្នុងខេត្តសៀមរាប អាចថយចុះច្រើនជាង ១៥ភាគរយ។
លោកបានបន្តទៀតឱ្យដឹងទៀតថា “ជាយុទ្ធនាការបន្ទាន់ រដ្ឋាភិបាលបានអនុគ្រោះពន្ធចំនួន៤ខែសម្រាប់បណ្តាផ្ទះសំណាក់ និងសណ្ឋាគារនៅទូទាំងខេត្យតសៀមរាបដែលមានសរុបប្រមាណជាង៣០០ទីតាំង ដើម្បីជាការជួយសម្រួលដល់ភាពប្រឈម ក៏ដូចជាការលើកទឹកចិត្តរបស់ម្ចាស់អាជីវកម្មផងដែរ”។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក៏បានមានប្រសាសន៍កាលពីព្រឹកថ្ងៃទី២ ខែមីនា ឆ្នាំ២០២០នេះ ដោយអំពាវនាវដល់ប្រជាពលរដ្ឋខ្មែរទាំងអស់ដែលមានគម្រោងទេសចរណ៍នៅតាមបណ្តាប្រទេសនានា គួរតែពិចារណា និងងាកមកកម្សាន្តនៅតាមតំបន់កម្សាន្តក្នុងស្រុកនានាវិញ ដែលអាចធានាបាននូវសុខសុវត្ថិភាពពីបញ្ហានៃជំងឺ Covid-19 ហើយក៏ជាការចូលរួមនៅក្នុងការលើកកម្ពស់ក្នុងវិស័យទេសចរណ៍កម្ពុជាផងដែរ៕
